الجواز في مصر بقى مكلف، أوي، خالص. ده كان الدافع الرئيسي اللي خلى النائب البرلماني محمد عطا سليم، يقدم مشروع قانون لإنشاء صندوق تمويل زواج الشباب. المشروع اتوافق عليه من لجنة الشباب والرياضة في البرلمان من حيث المبدأ. المشروع عبارة عن صندوق هيقدم قرض حسن للشباب قيمته 60 ألف جنيه بدون فوائد. الصندوق ده هتكونله شخصية اعتبارية والفلوس اللي فيه أموال عامة تابعة لرئيس الجمهورية.
في شروط الحصول على القرض، زي إن المتقدم مايقلش عمره عن 19 سنة، ويكون أول مرة بيتجوز، باستثناء اللي توفت زوجته الوحيدة أو اللي طلق مراته قبل الدخول بيها. الأولوية هتكون لأصحاب السن الأكبر، سواء الزوج أو الزوجة. التسديد بأقساط شهرية، قيمة القسط ماتزيدش عن 400 جنيه في الشهر، وفترة سماح سنة كاملة. في شرط كمان إن طول مدة السداد مايحصلش طلاق، ولو حصل طلاق يبقى لازم باقي الأقساط تتسدد على 6 شهور.
باقي الأقساط بتسقط فورًا في حالة وفاة الزوج أو العجز الكلي عن العمل.
