حسب دراسة صادرة عن الجهاز المركزي للتعبئة والإحصاء، بيوضح أسباب تأخر سن زواج البنات في مصر، عدد البنات غير التزوجات وسنهم 35 سنة أو أكتر، وصل ل472 ألف، بنسبة 3.3 من إجمالي الستات في الفئة العمرية دي، مقابل 687 ألف حالة ذكور بنسبة 4.5% من إجمالي أعداد الذكور في نفس الفئة العمرية.

المركزي قال في تقريره إن الناس دول اللي كملوا 35 سنة أو أكتر بيطلق عليهم لقب عنوسة، ورغم إن العنوسة بتطلق على الستات بس، لكن هي بتعبر عن الستات والرجالة اللي اتأخروا في الجواز. التقرير أضاف إن تأخر سن الجواز، أو "العنوسة"، كانت سبب في ظواهر اجتماعية تانية زي الجواز العرفي والأمراض النفسية وحتى الإدمان.

التقرير أوضح إن تأخر الجواز ده وصل بين الذكور في المدن لنسبة  6.8% مقابل 2.4% بالريف خلال 2017، وأرجع التقرير السبب للوضع الاقتصادي والغلاء وتكاليف الجواز اللي زادت بشكل كبير. بالنسبة للبنات فالنسبة 4.2% في المدن، مقابل 2.6% بالريف، وده سببه ارتفاع مستوى تعليم البنات في المدن عكس الريف.

الجهاز حدد في الدراسة أسباب لتأخر سن الزواج: 

1- غلاء المهور، وارتفاع تكاليف الزواج الأخرى الناتجة عن العادات والتقاليد المتبعة.

2- غلاء المعيشة وصعوبة توفير سكن.

3- ارتفاع معدلات البطالة.

4- ارتفاع معدل التعليم بالنسبة للإناث خاصة بالحضر.

5- الانشغال بالعمل أو الوظيفة من قبل الفتاة وعدم الرضا بمن يتقدم إليها (خروج الفتاة للعمل)

6- ضعف الأجور التى يتقاضاها الشباب.