• اكتب معانا
  • ماتنسناش
  • تابعنا
الموضوع اللي جاي
الفضائيات أعلنت حد أقصى لأسعار شراء المسلسلات وأجور الضيوف
الموضوع اللي فات
تفجير مسجد في العريش واستشهاد ٨٥ مصلي

7 فيديوهات ممكن يغيروا وجهة نظرك عن الشعراوي

أمين وأمين على الأمة

"في مصر ممكن تقول مابتحبش صحابي من الصحابة، بس ماينفعش تقول مابتحبش الشعراوي"، بيقولها لصديقه تعقيبًا على كلامه عن الشيخ. يسرح في مشهد فلاش باك لطفل قاعد في أوضته، سادد ودانه عن صوت صريخ "محمد حسين يعقوب" من الأوضة اللي جمبه: "أنت ما بتصليش لييييه؟!".

محمد حسين يعقوب، محمد حسان، أبو اسحاق الحويني، وغيرهم من شيوخ السلفية قلبوا دنيته جحيم وهم بيرعبوه من جحيم آخرته. يلبس وينزل جري على بيت جده، فيلاقي برنامج لشيخ مبتسم بيتكلم والغريب إنه ماكانش بيصرخ! فيقعد يسمعه، ويضحك بسعادة كل ما يسمع جده بيقول "الله" مع الحاضرين في المسجد استحسانا، بعد ما الشيخ يقول شرح مبسط مسترسل لآية من القرآن، أصبحت مفهومة ومربوطة بالحياة العملية بعد كلامه عنها، فيتسرب حب الشيخ لقلبه. زي الأفلام، بتضلم الشاشة وبيطلع عليها جملة وبعد مرور 15 سنة، مشهد نهار خارجي لشاب بيتفرج على فيديوهات من اليوتيوب وبيكتب على الكيبورد بحزن، ليه مابقتش بحب الشعراوي؟!

في مصر ممكن تقول ما بتحبش صحابي من الصحابة، بس ماينفعش تقول مابتحبش الشعراوي

دول 7 مسائل اتسأل فيهم الشيخ، وجاوب عليهم في فيديوهات مسجلة، الفيديوهات كلها موجودة في المقال عشان الكلام يبقى موثق ونبقى ضامنين إنه مش مقتطع من سياقه، ماحدش بيحاول يقنعك بحاجة، لما تشوف الفيديوهات هتقرر إذا كانت ماشية مع اقتناعاتك ومعرفتك بربنا وفهمك للدين والعقل والمنطق ولا لأ!

ليه ما بقتش بحب الشعراوي؟!

1 - الشيخ الشعراوي بيتسأل عن قول الدين في صوم بلا صلاة، فالشيخ بيرد رد حاسم، إن تارك الصلاة بيتسأل مابيصليش ليه؟ لو كنت منكر لحكم الصلاة، يعني مش معترف بيها، تتقتل، كحد من حدود الإسلام، لو مابتصليش عشان مكسل، تستتاب تلات أيام، يعني في شخص يوعظك ويديلك مهلة تلات أيام تتوب، لو ماتوبتش بعدها تتقتل!

كام شخص في دايرة أهلك ومعارفك الشيخ بيدعوا لقتلهم؟ وهل ده اللي ربنا عايزه؟ الشيخ الشعراوي ليه قصة مشهورة اتروت عنه لكن مالقتهاش في فيديو، بتقول إن واحد من الشباب المتحمس للتفجيرات، سأله عن تفجير نفسه في وسط ناس بتعصي ربنا، عشان ينهي المعصية دي وغيره يتعظ، فالشيخ الشعراوي سأله أنت تفجر نفسك فيهم ويموتوا على معصية هيروحوا فين؟ فالشاب قاله هيروحوا النار طبعًا! فالشيخ رد: طب فرقت أنت إيه كده عن إبليس! تقدر تشوف الفيديو للشيخ أسامة الأزهري بيحكي لخيري رمضان من هنا

2 - الشيخ الشعراوي بيفسر الآية "قُلْ مَن يَرْزُقُكُم مِّنَ السَّمَاءِ وَالْأَرْضِ أَمَّن يَمْلِكُ السَّمْعَ وَالْأَبْصَارَ وَمَن يُخْرِجُ الْحَيَّ مِنَ الْمَيِّتِ وَيُخْرِجُ الْمَيِّتَ مِنَ الْحَيِّ وَمَن يُدَبِّرُ الْأَمْرَ ۚ فَسَيَقُولُونَ اللَّهُ ۚ فَقُلْ أَفَلَا تَتَّقُونَ"، وبيقول إن أعضاء الإنسان ملك الخالق، فمش من حق الإنسان إنه يتصرف فيها، ماينفعش يبيعها أو يتبرع بيها أو يوهبها حتى بعد موته، لإن التبرع ده بيبقى لحاجة ملكك، لكنها ملك الله. بالتالي التبرع بالأعضاء من وجهة نظر الشرع (زي ما بيشوفه الشعراوي) حرام.

أنا عامل الفيديو يبدأ من الدقيقة 4:12، عشان دي بداية النقطة اللي بنتكلم عليها، لكن أنت ممكن تبدأ الفيديو من الأول عادي لو حابب، وهتلاقي فيديوهين تانيين على يوتيوب تقدر توصلهم بكل سهولة. كام شخص اتحكم عليه بالموت لو مشينا على فتوى الشيخ؟ وهل كلامه ينطبق على نقل الدم برضه؟ بما إن الدم ملكيته زي ملكية الجسم كلها لله؟ طب هل ده معناه ما نعملش العمليات الجراحية كلها بما إنها بتحتاج نقل دم؟ أنا مش عارف إجابات الأسئلة دي بس يمكن حد يعرف.



3- بنفس المنطق في المسألة اللي فاتت، وحيث إن جسم الإنسان ملك ربنا مش ملك الإنسان، فالشعراوي بيتكلم عن الفشل الكلوي، وعلاجه بالغسيل الكلوي، الفيديو بيبتدي بالكلام عن نقل الأعضاء من الدقيقة 44:30 وبيعرض فيه نفس الرأي اللي في المسألة اللي فاتت، وبعدين من الدقيقة 48:10، بيقول إن جسمك ملكية انتفاع، بتاخد منفعتك منه بس، ولما المحاور قاله إن الإنسان كده هيموت، رد: طب ما يموت، امنعوا الموت إذًا، انتوا ليه بتباعدوا بينه وبين لقاء ربه، الآفات والعاهات مقصودة، والشذوذ في الخلق مقصود (مش قادر أحدد ده نفس رأيه في المثلية ولا لاء)، بلاش تعذيب الناس بالإنعاشات، وقصروا ألم لقائهم بربهم

طب ما يموت، امنعوا الموت إذًا، انتوا ليه بتباعدوا بينه وبين لقاء ربه

وبينصح الناس اللي بيتشدقوا بالإنسانية وبيقولوا ده حلال: بلاش تقولوا لحسن تكفروا، لإنك أحللت ما حرم الله، قول إنه حرام بس أنا مضطر فساعتها تبقى عاصي، ممكن تتوب.

4 - الشيخ الشعراوي بيرد على مسألة "ضرب الزوجة في الإسلام" بجملة واحدة، أمر الله به أو لم يأمر؟ رأي الشيخ الشعراوي إننا مش أحن على الزوجة من اللي خلقها، وإنه أكيد عارف إن في حاجات ما بتجيش غير بالضرب، لكن ما يبطحش ولا يكسرش (ممكن يبقى أي ضرب ما بيعملش علامات مثلا؟ يعني الشلاليت والأقلام وكل حاجة ما تبطحش ولا تكسر عادي؟)، المحاور بيسأله طب إيه هي حدوده؟ فيرد الشيخ: يكفي أن يكون شجبًا لفعلها، وعدم رضا بيه! كلام الشيخ انتهى بس الأسئلة ما خلصتش. هل ده معناه إن لو زوجتي عملت عمل أنا مش راضي عنه أضربها ضرب لا يبطحها ولا يكسرها؟ هو ده معنى الفتوى؟

أي زوجة ترفض الأمر اللي قاله زوجها، يبقى من حقه يوعظها بعدين يهجرها في السرير بعدين يضربها؟

الشيخ كان في فيديو تاني بيتكلم عن نفس النقطة في تفسير الآية "وَاللَّاتِي تَخَافُونَ نُشُوزَهُنَّ فَعِظُوهُنَّ وَاهْجُرُوهُنَّ فِي الْمَضَاجِعِ وَاضْرِبُوهُنَّ"، فهل هنا المقياس إن الشخص لو خاف من نشوز الزوجة إنه يضربها، بعد ما يستكمل المرحلتين اللي قبلهم الوعظ والهجر في السرير؟ ويعني إيه نشوز الزوجة؟ هل هو عصيان الزوجة لأمر زوجها؟ يعني إيه الضوابط اللي الشيخ يقصدها، أي زوجة ترفض الأمر اللي قاله زوجها، يبقى من حقه يوعظها بعدين يهجرها في السرير بعدين يضربها؟

5 - الشيخ بيتكلم على مسألة التبرج والتحرش، نص الشعب المصري على الأقل شايف إن مشكلة التحرش سببها البنت، هي اللي لبسها، جسمها، صوتها، حركاتها، طريقتها، سبب للتحرش، لكن مش الراجل اللي اتحرش أبدًا، الشخص اللي عمل فعل التحرش نفسه، الجاني، مش هو السبب في التحرش، لكن المجني عليها هي السبب. ده متماشي طبعًا مع الفطرة السليمة لمجتمع بيسيطر عليه الذكور، وشايفين إن شهواتهم المفروض تبقى طليقة بدون لجام ولا تحكم، لكن نتحكم في الضحية، علشان ما تثيرش الشهوة.

الرأي ده لازم يكونله سند ديني، لإننا متدينين بطبعنا، الشيخ الشعراوي قدملنا السند ده من الدقيقة 3:17، وقال إن "إلحاح المرأة في كشفها، إلحاح في عرض نفسها على الرجل، معناها بتقوله فتح يا بجم، مش شايف؟َ!"، نفس اللي قاله في الفيديو اللي بعده، لكنه قال بعدها إن لما السيدات يلبسوا اللبس اللي ما بيكشفش ولا بيوصف، فيتعرف إنهم مش من نوعية الناس المتبرجة اللي بيعرضوا نفسهم على الرجالة، فالرجالة ما يتعرضوش ليهم.

إلحاح المرأة في كشفها، إلحاح في عرض نفسها على الرجل

وده تفسير الشيخ للجزء من الآية "ذَٰلِكَ أَدْنَىٰ أَن يُعْرَفْنَ فَلَا يُؤْذَيْنَ"، هو ماقالش إن ده حلال، لكن شافه فعل مبرر ومنطقي، إن أي سيدة لابسه عكس الوصف اللي وصفه، تبقى بتلح في عرض نفسها على الرجل، وطبيعي إن الرجل هيتحرش، هيعاكس، هيغتصب، طيب أنا مش هتجادل في المنطق، لإن صعب البديهيات نتناقش فيها، بس في صورة من إحصائية الأمم المتحدة عن التحرش في مصر سنة 2013 وبتقول إن النسبة في السيدات 99.3٪ تم التحرش بيهم

هل التحرش الجنسي بالأطفال، بيبقى الأطفال برضه هم السبب في التحرش؟

تقدر بكل سهولة تشوف الستات اللي في محيط معرفتك كام شخصية فيهم محترمة (من وجهة نظرك) ولابسه لبس محترم (من وجهة نظرك)، أحب أؤكد لك إن تم التحرش بيها، تقدر تقرآ التقرير كامل من هنا. ولو الست هي السبب في التحرش، مش الشخص المتحرش، هل في التحرش الجنسي بالأطفال، بيبقى الأطفال برضه هم السبب في التحرش؟

ده الفيديو الأول

وده الفيديو التاني

ودي سكرين شوت من التقرير عشان لو ماعندكش وقت تقرأ


6 - تكملة الفيديو الأولاني، الشيخ بيتكلم في تفسير الآية "وَقَرْنَ فِي بُيُوتِكُنَّ"، الشيخ بيطلب من الست إنها تتعلم الحاجات والصنعات اللي بتضطر تخرج من البيت عشان تقضيها، لو كل أسبوع اتقنتي صنعة منهم، بعد سنة واحدة مش هتبقي محتاجة لأي عامل في البيت، ممكن تتقن السباكة والنجارة وال….. إلخ، فما تحتاجش أبدا تخرج من البيت، وتقر الست في بيتها، لإن في رأي الشيخ لو الست عملت اللي مطلوب منها في البيت لما اتسع زمن الليل والنهار لكي، يعني الليل والنهار مش هيكفوا الأعمال اللي مطلوبة منك في بيتك، عشان يبقى عندنا مجتمع الشارع بتاعه كله ذكور، مافيهوش سيدات إلا في الضرورة القصوى ونبقى كده حلينا كل مشاكل شهوة الذكور اللي مش لاقيه دين ولا أخلاق ولا مروءة يلموها.

7- سنة 2013 طلع تنظيم جهادي سلفي، منشق عن تنظيم القاعدة في بلاد العراق اللي أسسه أبو مصعب الزرقاوي، وسمى نفسه "تنظيم الدولة الإسلامية" أو "داعش"، ويهدف أعضاؤه، حسب اعتقادهم، إلى إعادة "الخلافة الإسلامية وتطبيق الشريعة"، التنظيم شايف إن حكومات الدول العربية بتحتكم لقوانين وضعية، اللي عملها هم البشر مش ربنا، بالتالي هم كافرين، وبيفرضوا كفرهم على الدول اللي بيحكموها وبيأثروا على حريتهم في اختيار الدين الصحيح، بالتالي هم عايزين يحرروا الدول دي من سلطة الحكومات الكافرة ويضموهم للدولة الإسلامية ويفرضوا القوانين الإسلامية عليها.

إيه علاقة ده كله بالشعراوي؟! طيب أنا هكتفي في النقطة دي إني أحط مجموعة فيديوهات بيتكلم فيها الشعراوي عن الخلافة الإسلامية والجهاد، ومش هعلق عليها، كل سؤالي في النقطة دي، هل داعش والقاعدة وبعدهم أنصار بيت المقدس هم اللي صنعوا الإرهاب؟ ولا الإرهاب كان ليه بذرة قديمة موجودة في المجتمع بس خدت وقت عقبال ما كبرت؟!

هم اللي صنعوا الإرهاب؟ ولا الإرهاب كان ليه بذرة قديمة موجودة في المجتمع 

الفيديو الأولاني بيتكلم فيه الشعراوي عن مشكلتنا إننا عايزين نلفق حياة إسلامية، في بلد قانونها غير إسلامي، لازم القانون يبقى إسلامي (الكلام ده أنا سمعته قبل كده) طب وضح يا شيخنا، الشيخ بيقول إنه وضح قبل كده في مثال، إنه لو تعرض لواحد بيشرب خمر (هو هنا شخص عادي لا داعية ولا ولي أمر) أبقى أنا اللي اعتديت على حريته، والشخص اللي بيشرب الخمر يقدر يحاكمه، لكن لو في بلد قانونها إسلامي، لو هم الاتنين اتعرضوا على الحاكم، فالحاكم هيقف في صف الشعراوي، لإنه بيساعد الحاكم.

طب القانون الإسلامي مش بيتطبق في البلد، نعمل إيه؟! الفيديو الثاني الشعراوي بيسأل هل الجهاد هو الدفاع عن النفس بس زي ما أعداء الإسلام عايزينه يبقى دفاع بس؟! الشعراوي بيقول ده كلام بيقوله الناس اللي عايزين يدفعوا عن الإسلام تهمة إنه دين قتال، وإن القتال اللي فيه دفاع فقط، لكن الحقيقة (من وجهة نظر الشيخ)، إنه دفاع برضه عن مطلق الإنسان، عايزين نحميه من أي حاجة تأثر على حريته في اختيار دينه (مابتفكركش الجملة بحاجة).

فالقوة التي تفرض على الناس دينا نزيحها من الطريق، نعلن دعوة الإسلام، فمن وقف أمام هذه الدعوة نحاربه

وبرضه من لم يؤمن بندفع عنه من يؤثر عليه في اختيار دينه، الشيخ بيقول بالنص: "فالقوة التي تفرض على الناس دينا نزيحها من الطريق، نعلن دعوة الإسلام، فمن وقف أمام هذه الدعوة نحاربه، ليه؟ لأنه يفسد على الناس اختيار دينهم". هل الجملة دي لو كان قالها الإرهابي الليبي اللي كان بيحاوره الإعلامي عماد أديب، كان هيبقى رده عليها إيه؟!

الفيديو التالت هو تسجيل صوتي منسوب للشيخ الشعراوي، واللي نشره بيدعي إنه اتمنع لمدة 40 سنة مش عارف ليه، ماقدرتش أتأكد من صحته لكنه نفس الصوت بنفس الأفكار، فهسيبه هنا تسمعوه لو حابين

بعد كل تفجير، رأي متطرف أو غريب، عملية إرهابية تنسب للإسلام، بتطلع جملة تنتشر في كل السوشيال ميديا والبرامج، إن المتهمين لا يمثلوا الإسلام، طب ممكن الناس اللي بتمثل الإسلام الصحيح ترد على اللي ما بيمثلوش الإسلام؟

طب ممكن الناس اللي بتمثل الإسلام الصحيح ترد على اللي ما بيمثلوش الإسلام؟

Home
خروجات النهاردة
Home
Home