مافيش طفل من مواليد التمانينات أو التسعينات إلا وعاش لحظات الترقب قبل ما بابا يدخل علينا البيت ومعاه مجلة بلبل أو علاء الدين، ويبدأ يقرآ فيهم وينسى نفسه في الفريمات الملونة.
بس بلبل وعلاء الدين وبعدهم مجلة فارس اللي صدرت من مؤسسة أخبار اليوم مش هم أول مجلات أطفال اتطبعت واتوزعت في مصر

أول مجلة صدرت في مصر للأطفال كانت مجلة نصف شهرية تحت إسم "روضة المدارس المصرية" أو "صحيفة روضة المدارس" وأول إصدار ليها كان سنة 1870، المجلة اتعملت بأمر مباشر من "ديوان عموم المدارس" اللي بقت ديوان المعارف وبعدها وزارة التربية والتعليم، واللي كان مديرها هو "علي مبارك" وقرر يخلي اللي بيشرف عليها بشكل مباشر هو "رفاعه الطهطاوي" ذات نفسه.
المجلة ماكنش فيها رسومات وكان بيكتب فيها رفاعة الطهطاوي وعلي مبارك وحسين المرصفي، وساعد في انتشارها الخديوي إسماعيل.

تاني مجلة أطفال كانت "جورنال المدرسة" دي اتعملت سنة 1893، بس المجلة كانت متخصصة في المجال التعليمي والموضوعات اللي بتدرس في الدراسة العادية، بس مع الأسف ملقيناش أي صور ليها.

المجلة التالتة كانت مجلة "الأولاد"، ودي تعتبر أول مجلة تتباع بشكل تجاري لإن كل اللي قبلها كان بيتوزع بشكل مجاني على الأطفال في المدارس، المجلة صدرت سنة 1923، واللي بدأها "اسكندر مكاريوس"، ودي تعتبر أول مجلة أطفال تظهر فيها الرسومات، رسم رسوماتها فنان تركي اسمه "علي رفقي"، جه بعدها مجموعة مجلات منهم مجلة "الأولاد المصورة" سنة 1925، ورئيس تحريرها "محمود كمال، سنة 1933 مجلة "سمير التلميذ، سنة 1938 مجلة "بابا صادق، سنة 1939 مجلة "حديقة الأطفال".

بعدها ب 7 سنين، سنة "درية شفيق" عملت مجلة "الكتكوت"1946، نفس السنة اللي ابتدت فيها مجلة "البلبل" اللي استمرت 5 سنين، اللي اتميزت بطريقة رسم مختلفة وأجمل من باقي المجلات، وبعدها كانت مجلة "بابا شارو" سنة 1948 واللي عملها طبعا "محمد محمود شعبان" اللي كان بيقدم برامج أطفال في الوقت ده في الراديو.

لحد ما هلت سنة 1951 و 1952، السنتين اللي صدر فيهم مجلة علي بابا ومجلة السندباد بالترتيب، علي بابا بدأت سنة 1951 وكان اللي بيرسم رسوماتها الفنان "مصطفى كمال" بس بسبب المنافسة مع "السندباد" اضطروا يجيبوا فنان تاني اسمه "حسين فوزي" بس بعد كده المجلة اتوقفت بسبب اتجاهها للمحتوى السياسي، مجلة السندباد اللي بدأت سنة 1952 أهميتها في إنها أول مجلة عربية للأطفال يعني ماكنتش بتتوزع في مصر بس، وكان بيرسمها بالكامل الفنان "حسين بيكار"، كان بيساعده بعد كده مجموعة فنانين، لكن بشكل أساسي كان هو اللي مسئول عن رسومات المجلة، واستمرت لمدة 8 سنين لحد ما اتقدم آخر عدد منها سنة 1960.

سنة 1956 ابتدت مجلة "سمير" اكتر مجلة علقت معانا ومع كل الأجيال اللي سبقتنا واللي إصدارها لسه شغال لحد النهاردة، المجلة كانت رافعة شعار من سن 8 سنين ل 88 سنة، يعني كل الأجيال ممكن تقراها وتتبسط وتستمتع وده اللي حصل فعلا، شخصية سمير أصلا اللي مبتكرها الفنان "برني" الفرنسي، متهيألي مفيش طفل عربي ما قراش مجلة سمير في مرحلة من مراحل عمره، كمان كانت أول مجلة تقدملنا ميكي وبندق، اللي انفصلوا بعد كده 

بعد مجلة سمير في مجلات كتير ابتدت وانتهت وفيه اللي كمل معانا، منهم "كروان" اللي صدرت سنة 1963، ومجلة ويني وقطر الندى، بعديها مجلة "صندوق الدنيا" اللي ابتدت تصدر سنة 1977 بالتعاون مع مؤسسة فرانكلين

بعديها صدرت مجلة "علاء الدين" من دار الأهرام سنة 1994، كانت بتنافسها مجلة "بلبل" اللي أصدرتها من دار أخبار اليوم سنة 1998، وآخر العنقود مجلة "فارس".