كتب الأطفال مش كلها حواديت سنو وايت والسندريلا، فيه كتب أطفال بتتكلم في مواضيع فلسفية وتاريخية بس بأسلوب يناسب المتلقي، في الليستة دي جمعنا نماذج منهم:

1) 30 سؤالًا! - محي الدين اللبَّاد

المصري "محي الدين" بيحاول في قصته القصيرة ضمن سلسلة الرماة الصغار تناول الانتفاضة الفلسطينية بعيون وعقل طفل، من خلال طرح أسئلة زي: من أين الحجارة؟ لماذا يُصفِّر الرجال وتُزغرد النساء كثيرًا في فلسطين؟ لماذا يقوم عسكر الاحتلال بقياس حبات البندورة الفلسطينية؟

بيجاوب "محي" في 36 صفحة، من إصدار الصقر العربي للإبداع

وللتحميل ادخل هنا. 

2) النقطة السوداء - وليد طاهر

نقطة سوداء وقعت على الجنينة اللي بيعلب فيها أطفال ومنعتهم من اللعب، هيحصل إيه؟ والنقطة السوداء دي بترمز لإيه؟ بعد ما تقرأ القصة مش هتبقى متأكد هي للكبار ولا للأطفال، بس الأكيد إنك هتخلص الـ 56 صفحة في قعدة واحدة.

القصة فازت بجائزة اتصالات الإمارات لأدب الطفل اللي قيمتها مليون درهم.

للتحميل ادخل هنا. 

اعرف أكتر عن الكتاب من هنا. ممكن تقرأ لنفس الكاتب "فيزو أصبح سعيدًا".

3) أريد أن أكون سلحفاة - أمل فرح

"= نفسك تبقى إيه لمَّا تكبر؟

- سلحفاة"

السلحفاة دي كانت كلمة السر اللي عرَّفِت الطفلة بطلة القصة على معاني كبيرة زي الانتماء والوطن والمواطنة. القصة فازت بجائزة اتصالات الأمارات في الدورة 35 وهي من إصدار دار شجرة للنشر.

4) أنا غالي - سارة عزيز

مش كل الأبهات والأمهات بيعرفوا يتكلِّموا بالشكل السليم مع أطفالهم لتوعيتهم بحرمة أجسادهم وقدسيتها، لحد ما الأهالي يعرفوا يتناقشوا ازاي، "سارة" عملت كتاب بتحكي فيه قصص مصورة للطفل "سيف" وازاي بيحافظ على جسمه.

اعرف أكتر عن الكتاب من هنا واتفرج على الفيديو ده

5) مالك لا يعرف الخوف - أماني العشماوي

"بتخاف من إيه" ده السؤال اللي كان "مالك" بطل القصة واثق من إجابته عليه، الإجابة كانت "لأ". لحد نقطة فاصلة في القصة بدأت مشاعر الخوف تتسلل لقلب "مالك" ويختبرها لأول مرَّة،

عشان يوصل لإجابة السؤال. القصة عبارة عن 23 صفحة هتناسب الأطفال من سن 9 لـ 12 سنة، من إصدار دار الحدائق للطباعة والنشر والتوزيع.

6) بَحبوح - شوقي حجاب

الكاتب وليد طاهر مشارك في الكتاب ده بالرسم فقط، لكن التأليف فهو للمصري "شوقي حجاب"، اللي بيحكي فيه للطفل بطريقة بسيطة ازاي يتعامل مع حيوانه الأليف وينشأ معاه علاقة تفيده. اعرف أكتر عن الكتاب من هنا.

7) حكاية الكتاب: من لفافة البردي إلى القرص الليزر - محي الدين اللباد

بعد ما الطفل يتعود على القراءة ويحبها، يبقى لازم يعرف تاريخ الكتابة من أول ما بدأ الفراعنة أعمال التوثيق على الحيطان لحد الورق اللي بنلاقيه في كل حتة نكتب عليه بسهولة. الكتاب إصدار دار الشروق وعبارة عن 40 صفحة بس.

اعرف أكتر عن الكتاب من هنا

8) حكايات توفيق الحكيم للصبيان والبنات - توفيق الحكيم

توفيق الحكيم توفى سنة 1987، بس لسه قصصه عايشة وأطفال الجيل ده هيحبوها.

40 صفحة ممكن تحملهم من هنا.

بنرشحلك كمان تقرأ أعمال الكاتب عدلي رزق الله قاص الأطفال اللي عمل لهم كتب بالعربي وبالفرنسي، ومن أهم أعماله المجمعة "حكايات عدلي رزق الله"، وقصص "مياو مياو" و"القرد الطبَّال"، و"الفطيرة الخطيرة" لهديل غنيم، ومجموعة "ملح وفلفل" لنادر أبو الفتوح.