البيت العشوائي فريق روك عربي من الأردن بيبحث عن صوت جديد يميز به الروك العربي عن الروك الغربي غير اللغة العربية، وفي رحلته الموسيقية دي بيحاول يميز نفسه عن باقي الفرق في المشهد العربي وخصوصًا الأردني، وعشان نفهم هو بميز نفسه ازاي وبحاول يعمل ايه اتكلمنا مع قيس جار مؤسس الفريق.

كنت عامل فريق اسمه "civilized apes"  قبل البيت العشوائي و الفرق بينهم 8 سنين، ايه الفرق بينهم؟

أسست فريق civilized apes كان في فترة الجامعة، أنا عمومًا بحب أعمل الساوند بتاع الـ alternative اللي هو زي nirvana الـ Grunge material. فدي كانت مرحلة من ناحية الكتابة وبعدين دخلت في الموضوع من الناحية الأكاديمية وركزت في البرودكشن، كان كل اهتمامي إني أعمل شغل out of the box عشان أجرب الـ experimental music. بعدها بقى عملت "البيت العشوائي".

النقلة من إنك بتقدم أغاني انجليزي لإنك بتقدم أغاني عربي من خلال "البيت العشوائي" جت ازاى؟

في الأول كنت في أمريكا بدرس هندسة الصوت، وماكنتش أعرف عن المشهد اللي تحت الارض، الفن المستقل يعني، بس بدأت أسمع باندات عربية، واتعرفت عليهم أكتر وقتها اللي كان في دماغي إن لأ، فيه حاجة ناقصة. وحسيت إني عايز أعمل حاجة حقيقية أكتر تعبر عننا كعرب وعن خلفياتنا الموسيقية والمزيكا الشرقي ككل.

من هنا طلعت فكرة البيت العشوائي، كنت متحمس جدًا والفكرة extreme لدرجة إن ألبوم "يا عليم" ماكنتش عايز فيه درامز خالص، كنت عايز إيقاعات شرقية بس.

ألبوم "يا عليم"

هل كان في خطة لتجميع الفريق ولا الصدفة خلقت نفسها؟

الصدفة خلقت نفسها، أنا مثلًا كنت في الأول بكتب مع الفرقة، وصاحب طفولتي أحمد الحاج هو البيزيست القديم بتاعنا من أيام فرقة civilized apes. بعدها "الحاج" عرفني على "فراس" و"سيف" الدرامر. فـ اتجمعنا ولقينا بينا كيميا وانسجام.

                                                                                                                   قيس رجا "مؤسس البيت العشوائي" 

قبل ما تعمل روك عربي كنت عارف إن فيه اللون ده؟

كنت عارف اه، أول حاجات سمعتها كانت لفريق "مشروع ليلى"، وعجبني الألبوم الأول بتاعهم بشكل فظيع لإن الشرق الأوسط كان محتاج الصوت ده، وأول حاجة قولتها عليهم كانت "اوف هادي الشي كتير منتظر"، وبعدها سمعت بقى زيد حمدان وياسمين حمدان وكانوا برضه مميزين عشان دخلوا الفلكلور العربي بطريقة modern، كل ده وأنا في أمريكا.

بشكل شخصي أنا شايف إن المزيكا الـ alternative اللي ساعد على ظهورها في العالم العربي كان موسيقى الراي في بلاد المغرب في المقام الأول، وفي المقام الثاني الفنان أحمد منيب. وعشان كده عملتله إهداء مخصوص في الألبوم وكانت أغنية يا مراكبي.

                                                                                                              قاصد احسان 

ليه أهديت أغنية في الألبوم لأحمد منيب؟

في طفولتي كنت بحب كتير اسمعه مع أبويا، واثار اهتمامي بأغنية اسمها "ربك هو العالم". كان سر إنبهاري إن فيه حكمة بالكلام وفي نفس الوقت فيه الكتريك جيتار مع دفوف. فبتلاقي مزيج مزيكا بديع وكلمات حكيمة.

ومين بيأثر فيك من الـ  rockers الاجانب ؟

دي قصة كبيرة، أنا بسمع كل الأنواع، بوب وهيب هوب وكله. وتحديدًا الروك هو اللي خلاني عازف جيتار اليكتريك، كنت بسمع الساوند بتاعه وأقول إيه الصوت الفضائي ده نفسي اعمل زيه!

وعلى مستوى الكتابة أكتر حد آثر فيّا الـ grunge movement -نوع موسيقي متفرع من الروك- وحاولت أخلى فريق civilized apes كان نوعًا ما كده.

طب ده بالنسبة للصوت لكن بالنسبة للفكر الموسيقى ؟

في فترة من حياتي كنت "مدروش"، صوفي يعني على الآخر. وطبيعي أي إنسان يدخل في الطريق ده بيتولد عنده نوع من القناعات وبيشوف صورة معينة من الحقيقة. وده أنعكس وهيفضل ينعكس في كلمات أغنياتي.

ألبوم "نوون" بدايته شبه المستمع العربي وآخره أغنية كسوف اللي هي روك صرف، مين في الفريق بيقرر ده؟

ألبوم نوون هو concept ألبوم، الألبوم كله في إتجاه واحد وكل الاغاني بتكمل بعض عشان كله قصة واحدة. بيبدأ بصوفي بحت بيتكلم على طقوس السمع اللي بيعملوها بالحضرات الذكر، بعدين في أغنية سندباد بتسأل عن الحقيقة، لحد ما يوصل لآخر أغنية "يا عليم" اللي بنسأل فيها الله اعلم.

وقتك كله للمزيكا ولا بتعتبرها هواية؟

أنا في الأساس شغال مهندس صوت وبروديوسر، يعني شغال في نفس المجال. كذلك باقي الفريق، "سيف" الدرامر لسه طالب جامعة، و"سيف ناصر" البيزيست برضه بالجامعة، و"فراس" مهندس ميداني.

هل كونكم في وطن عربي بيقيد حريتكم في تقديم الأفكار؟

لما بدأنا كان فيه تعليقات كتير من الناس العادية ومن فنانين بيقولوا ان "المستمع" لسه مش جاهز للصوت ده اللي بتطرحوه. و أنا كأي فنان في الدنيا ليه الحق إنه يعبر عن ذاته، إلى جانب إني مش حابب فكرة الاستهزاء بالمستمع العربي عشان ده بيصغر الجمهور. يعني معقول الأجنبي هيفهم و يحب مزيكتي و العربي لأ؟ أكيد ده مش صح، عشان احنا والمستمع العربي من نفس الخلفيات، و غير كده الأغنية الحلوة هي أغنية حلوة لأي حد بيسمعها.

فالصراحة مش بحب أقول إن الجمهور مش هيستوعب المزيكا ولا بحب استهين بالأذن العربية.

                                                                                                              سيف أبو حمدان 

                                                                                                                              فراس عرابي 

                                                                                                                سيف الناصر