البحر شكله مريح لناس كتير، ولناس تانية نزوله متعة كبيرة، بس البحر نفسه بنحافظ عليه قد إيه؟ والأحياء البحرية الكتير اللي فيه واخدة حقها ولا لأ؟

عبد الرحمن مكاوي مؤسس فريق I-Dive Tribe هو وأعضاء الفريق اتجمَّعوا على حب الكائنات البحرية والشغف بالحفاظ عليها، سواء من الانقراض أو من سوء استخدام الناس ورمي مخلفاتهم في المياه. بيشرح لنا "دياب" عضو في الفريق أكتر، وبيقول إن أسماك القرش بتهاجم الإنسان في فترتين بس للصيد، إنما غير كده بيكون بسبب القمامة اللي بتترمي في المياه وبيكون فيها دم.

شركة I-Dive Tribe بتحاول تنقذ السلاحف البحرية كمان، بيقولنا "دياب": "في مرة لقينا سلحفاة على الرصيف قدام محل للحيوانات الأليفة، عرفنا عن طريق بوست على الفيسبوك. كانت في حالة جفاف شديد، حالة رهيبة. ودي المرة الوحيدة اللي اشتريت فيها سلحفاة عشان أنقذها".

اعرف عنهم أكتر وشوف شغلهم بنفسك من صفحتهم على الفيسبوك.