على الرغم من إن مصر –اغلبها- موجودة جوه قارة أفريقيا إلا إننا بنتعامل إننا مش أفارقة، وفكرتنا عن الأفارقة إن لونهم أغمق مننا، -رغم إن ده مش حقيقي دايمًا-، يمكن ده بسبب إننا بنتكلم عربي وبنقول على نفسنا عرب، أو يمكن لأننا بنقع برضه في الشرق الأوسط، بنفتكر إننا "تاج أفريقيا" وأهم دول فيها، وعندنا شوية stereotypes عن القارة السمرا اللي  بيرجح إنها أصل الجنس البشري .. وبما إني روحت دولتين في أفريقيا وقريت شوية عنها، فممكن نتكلم عن شوية من الاعتقادات الغلط دي.

درجة الحرارة العالية

أنا سافرت أفريقيا في شهر أغسطس اللي بنموت فيه من الحر في مصر وبنسيح حرفيًا، الجو كان عظيم، في اثيوبيا كنت متخيلة إن فيه تكييف شغال من كتر مالجو حلو وبرد بليل، وحتى في ايام الحر والرطوبة، وجود الشجر والزرع والمطر بيخلي الجو بليل مقبول، مش كل دول أفريقيا زي "كينيا" و "الكونغو" و"اوغندا" موجودين عند خط الاستواء، وحتى الدول دي الجو فيها مش نار عشان فيه أمطار صيفية، ببحث بسيط على جوجل عن الجو في البلاد دي ممكن تتأكد.

أفريقيا فقيرة

مش هنلاقيهم بيشحتوا في الشوارع وبيقولوا هديك 100 بقرة وتجوزني البت دي، فيه دول إفريقية أقتصادها احسن من مصر وعملتها أعلى ونصيب الفرد في الناتج القومي فيها أكبر، مشكلة القارة السمرا انها فضلت سنين ثرواتها منهوبة، بس هما راجعين بقوة، وممكن تتفرج على جنوب أفريقيا وتقرأ عنها.

الأفارقة متخلفين

مش عارفة مين ادانا الحق نقول على حد متخلف ومتأخر عننا؟ بس لأ مش كلهم متخلفين، مثلًا جامعة كيب تاون في جنوب أفريقيا، اتخرج منها 5 اخدوا جايزة نوبل، وجامعة ويتس في نفس البلد اتخرج منها 3 اخدوا نوبل، وفيه أفارقة علماء وسياسيين عظماء، والشعوب مش متخلفة حتى لو كان "بدائية".

أفريقيا مجاعات

لما سألت ناس ايه اكتر حاجة بتيجي في دماغكم لما نقول "أفريقيا"، بنت عايشة في أمريكا من سنين بتدرس قالتلي الأكل الحلو، عشان الأفارقة زمايلها بيعملوا أكل حلو، أفريقيا مش مجاعات ولا حاجة، مش كلهم الصومال، وفيه مجاعات في حتت تانية في العالم، وفيه دول كتير هناك الفواكه رخيصة، هما بس معندهمش نفس الأكل اللي عندنا.

حيوانات وغابات

ايوه أفريقيا فيها غابات كتير، بس فيه بلاد تاني كتير فيها غابات، منها أمريكا مثلا، والغابات مش معناها ابدًا انك تلاقي جمبك أسد أو قرد، إلا لو انت في منطقة مفتوحة وعايش فيها الحيوانات دي، غير كده انت بتنام وتقوم ومفيش حيوانات بتشوفها إلا سحالي وحاجات عادية جدًا بتعيش في الزرع.

أفريقيا بلد الثروات والخير، ومش كلها زي ما  احنا متخيلين، فلو قدامك فرصة عشان تسافر أفريقيا وتتفسح هناك، أعمل كده وبلاش الـ stereotypes  تأثر عليك.