لو جاى هنا عشان تشوف بابلو، فـ بابلو راح، ولو جاى عشان تشوف كولومبيا، فـ كولومبيا كمان راحت.

الموسم الجديد من "ناركوس" هيحكى عن قصة إمبراطورية مخدرات مختلفة، ورجعوا بالزمن لأنها اتبنت فى التمنينات، يعنى من قبل امبراطورية "بابلو اسكوبار" اللى كانت فى التسعينات، و فى بلد جديدة هي المكسيك. 

احنا شفنا اول حلقة فى العرض الخاص فى دبى الاسبوع اللى فات وماشفناش غيرها، بس ممكن نقول إن تقريبًا الموسم الجديد و الرابع من "ناركوس" هيحط على المواسم اللى قبله، ورغم ان الناس اتعلقت ب "بابلو اسكوبار"، إلا إن المرة دى النجومية مقسومة على اتنين.. عسكر وحرامى، “فيليكس جالاردو”، اللى وحد كل المجرمين وبنى أكبر إمبراطورية مخدرات فى تاريخ المكسيك، والتانى “كيكى كمارينا” ومتستهونش باسمه، عشان ده اللى عرف يعلم على الأولانى. 

عشان لو اتفرجت متتفاجئش، بس لو مش عايزنا نحرقلك أول حلقة متقراش: 

أول حلقة مليانة تفاصيل وأحداث محتاج تركز فيها بس دى حاجة سهلة عشان كدة كدة هتشدك، والأبطال الاتنين جامدين: “جالاردو” أخطر من غسان مطر، شرير بس برنس، مجرم بس هيبقى مثلك الأعلى، زى ما “بابلو” كان أكبر تاجر مخدرات فى كولومبيا وقتل خمسين ألف بنى أدم مثلا، بس انت بتحبه عادى. ردود أفعاله غير متوقعة بالنسبالك لأنه أخطر بكتير من إنك تتوقعه أو تفهم اللى بيدور فى دماغه. ابتدى صغير بس هيكبر، و محدش هيقدر عليه.

أما “كيكى” بقى فـ ده حاجة كدة زى أحمد السقا، صداع من كتر الشهامة، رجل و الرجال قليلون، ذكى ومخلص لعيلته ولشغله وهدفه الأول والأخير هو "العدالة"، بس كونه من أصول أسبانية عامله مشاكل بسبب العنصرية اللى شافها من الظباط الأمريكان لما كان عايش فى “كاليفورنيا”، فـ قرر إنه ينقل لـ“جوادالاجارا” فى المكسيك، فى نفس الوقت اللى “جالاردو” كان بيبتدى يبنى الامبراطورية. 

أول حلقة بتحكى بدايتهم هما الاتنين كأنها قصتين منفصلتين لحد ما اكيد هايتقابلوا فى النص، بس لحد دلوقتى هما متقابلوش غير فى مشهد صغير: كل واحد فيهم راكب عربية و بيعدوا من جنب بعض والمشترك ما بينهم انت. الاتنين بيدوروا على فرص فى شغلهم، بس واحد عايز يشارك تجار المخدرات، و التانى عايز يبقى ظابط كبير فى مكافحة المخدرات، فسافروا “جوادالاجارا”، واحدة من أهم و أخطر المدن فى المكسيك فى الوقت ده. 

قصة الموسم الجديد طبعا مستوحاة من أحداث حقيقية زى المواسم اللى قبله، بس خطورته بانت من أولها، لما واحد من فريق العمل راح يستكشف الأماكن اللى هيصوروا فيها الموسم الجديد واتقتل بالرصاص، و لحد دلوقتى البوليس مش متأكد إذا كان موته له علاقه بتصوير المسلسل ولا لأ. بس اللى ضامنينه، ان احنا هنتفرج على حاجة متعوب فيها، و بسبب نجاح المواسم اللى فاتت، “نتفليكس” قرروا يكملوا و يعملولنا مفاجأة المكسيك دى.

 بس فى واحد من تصريحات فريق العمل إن: البطل الوحيد المستمر فى “ناركوس” هو “الكوكايين”. فهل ده معناه اننا ممكن نرجع “كولومبيا”؟ احتمال وارد بس احنا مشفناش ده فى أول حلقة، بس شفناه فى التريلر، فطبعا مش فاهمين حاجة، بس لو الموسم الجديد هيحكى عن أول و أكبر امبراطورية مخدرات، اللى ابتدت بماريجوانا فى المكسيك وخلصت بـكوكايين فى كولومبيا يبقى شكلنا هنقعد نعد الأيام لحد يوم 16 نوفمبر، اليوم اللى هتنزل فيه أول حلقة على “نتفليكس”.

المسلسل هيبدأ عرضه بتاريخ 16 نوفمبر 2018 وهيكون 10 حلقات بعنوان Narcos: Mexico، وممكن تشوفه من هنا