زي كل حاجة في مصر بتبدأ جامدة وفجأة تخيّش: مطاعم أم حسن، أوبر، فيلم الأصليين، قوانين المرور.. مسلسل سابع جار برضه من الحاجات اللي عشمتنا وطلعتنا سابع سما وبعدين هبدتنا في الأرضى.

كفاية تمثيل 

فى الأول والأول بس المسلسل أبهرنا بكل حاجة، اللي خلى ملايين يتابعوه إن الممثلين مش ممثلين. دلال عبد العزيز هي أمك، دعاء بنت عمك، هالة بنت خالتك وهبة هي انت أو حد انت تعرفه كويس، أى حد هتتفرج عليه هتبقى عارف منه نسخة في الواقع.

كلهم تلقائيين وطبيعيين وتصرفاتهم وردود أفعالهم مبهرة من كتر ما هي متوقعة وبتعكس الواقع من غير ذواق، بتفاجئك من كتر ما هي شبهك. بس دوام الحال من المحال، فجأة سادت حالة من الأفورة والهبل فى أجواء المسلسل. هبة مثلا أصابها نوع من أنواع التأخر وبقت مابتعرفش تتكلم ولا تعبر عن أي حاجة. طريقتها وهى بتمسك الموبايل أو بتكلم أى حد، تعبيرات وشها وهي في البرنامج اللى المفروض أول ظهور ليها مع خطيبها، وهما في العربية وهي سرحانة في مستقبلها اللى هي شاكة فيه، وهما بيتخانقوا وبيسيبوا بعض، ايه السنتحة دي؟! مفهوم إن شخصيتها اتغيرت لما اتخطبت، بس حالة الذهول اللي حطت عليها دي مش منطقية ومبالغ فيها، واستمرت حتى بعد ما سابوا بعض.

أجمد حاجة فى المسلسل ده إنه كان واقعي، بس الخطوبة دي أصلا ماكانتش واقعية، عشان ده نادر حدوثه فى الحقيقة. ساعات الواقع بيبقى أغرب من الخيال، فماشي عادي.. بس ده بقى ولا حصَّل واقع ولا خيال، يعني ممكن واحد يخطب واحدة عشان شايف فيها زوجة وأم لعياله ودي أولوياته، وعادي ما ده اسمه جواز صالونات، بس لما يتخطبوا مش هيتصرفوا كدة، مش هيتكلموا كدة، هبة لو رضيت بالخطوبة عشان مبهورة بشهرته وشخصيته هتبقى بتحاول ترضيه، ومش بشكل سطحى زى باللبس والباروكة والحلق المدور وكده. مشهد البيت الجديد ومهندس الديكور بيسأل هبة عايزة تعمل ايه فى البيت وهي مذهولة أو ملبوسة، مشهد بيت أصحابهم وهبة بتقترح إن الأزواج مش لازم يعيشوا مع بعض وواحدة من اللى قاعدين مبهورة بكلامها وبتردده بعد كدة لحد تاني.. ايه السذاجة دي؟ ايه السطحية دي؟ ايه القرف ده؟ 

باختصار.. سارة عبد الرحمن تحط على أي ممثل لو رجعت تمثل زي ما كانت بتمثل فى أول المسلسل.

طبعًا لسَّه فيه ناس محافظة على مستواها ومشاهدهم هي الأفضل بغض النظر احنا فى الحلقة الكام

زى "دعاء" -المعلمة -  فدوى عابد

و "لمياء" -العبقرية -  دلال عبد العزيز

و "كريمة" -المسيطرة-  صفاء جلال

و "هند"- المستفزة المستقلة-  نسرين طلعت

مش عادي

المسلسل معودنا إنه حقيقي بس برضه فجأة فشخ الواقع فى شوية مشاهد عايزة الحرق، هحاول اختصر فى الحتة دي بمجرد إني أقول إيه اللي اتفرجنا عليه وماكانش "عادي": 

 مش عادي- إن "مجدي"  يدخل لـ "هبة" الأوضة عشان يقولها كلمتين يصبروها على الخطوبة اللي اتفركشت، مهما كان جوز خالتي قريب مني مش هيخش يقعد معايا على السرير ويحضني و يبوس صحابي.

مش عادي- إنه في نفس المشهد، "مجدي" يفضل يبوس في "مي" جارتهم اللي هو مش فاكر اسمها وهي سايباه وبتضحك.

مش عادي- إن "هبة" راحت لـ "شريف" بعد ما فركشت عشان "مي" قررت توديها.

مش عادي - إن"هبة" و"شريف علاقتهم اتطورت بالسرعة دي و فجأة بقت بتحب شريف وزعلانة إنه مابيعترفش بحبه، مش عادي إن أي حد يحب شريف أصلًا!

مش عادي - إن "ليلى" لما تعرف إن "مجدي" رجع وقاعد في بيتها تتقبل بمنتهى البرود وتفضل قاعدة عند أختها، ولا إنها تقول لـ "لمياء": "اسكتي مش هالة هتطلق النهاردة؟" بمنتهى البرود برضه.

مش عادي - إن "هالة" تبقى بتحب "علي" وهو بيحبها وماحدش فيهم قال للتاني بلاش نتطلق، وقاعدين بيندبوا ويسمعوا أغاني ويتوتروا على واتس آب.

مش عادي - إن "طارق" حس فجأة بحب "نهى" ليه، وهو كمان حس فجأة برضه إنه بيحبها بعد كل الحوارات دي!

مش عادي- إن "دعاء" غيرت مفاهمها ومبادئها لما خطيبها باسها بوسة على الايشارب وقررت توافق على الأغاني و ترقص كمان.

سي بى سي وأنا أسيب 

المشكلة في المسلسلات أو الدراما المصرية بشكل عام إن أغلبها مابيحترمش ذكاء اللي بيتفرج وبيستهزأ بيه، السيناريو بيبقى مليان كلام أهبل مبيتقالش في الحقيقة.. الأحداث كمان لازم تبقى شيقة وتشد فـ بنخش بقى فى سياسة وإرهاب ودين وخيانة وزنا محارم لو أمكن. 

سابع جار كان واقعي ونضيف وفيه إهتمام وعدم إهتمام بالتفاصيل. مش هتلاقي فنانة في سابع جار حاطة ميك اب ولسة صاحية شعرها معمول شينيون زي أي مسلسل من بطولة شيرين رضا مثلًا. عدم الإهتمام ساعات بيبقى إهتمام عشان المخرجات المحترمات بيحاولوا يعكسوا الواقع بس المنتجين بقى فشخوه. يعني ايه مسلسل مدته ساعة إلا ربع يبقى أقل من نص ساعة بقدرة قادر؟ وكمان أول 5 دقائق منهم من الحلقة اللى قبلها. يعني ده بيخدم مين؟ لو كل ده عشان المسلسل يطول فـ الإعلانات تكتر.. يبقى ده كمان نوع من انواع الاستهزاء بالناس اللى بتتفرج. 

مخرجات المسلسل كلهم كتبوا على حساباتهم الشخصية على فيسبوك إن قناة CBC بتشيل وتحط مشاهد وبتعمل مونتاج على مزاجها وإن ده اللي فشخ سياق المسلسل وعشان كدة كمان مدته بقت أقصر، بس لحد دلوقتي ماحدش برضه فاهم ده بيحصل ليه. الضحك بقى إن المسلسل وقف أيام الكريسماس ورأس السنة بسبب الرقابة عشان بيقولوا إنه بيحرَّض المجتمع إنه يعمل حاجات وحشة.

مش عارفة أنهي أوحش فى الحالة دي.. إن المسلسل يتوقف عشان بيحرَّض، ولا يبقى بضا* عشان بيعرَّض..

بس هو أكيد بضا* إن أخر حلقة عبارة عن عشر دقائق من الحلقة اللي قبلها، وتلت ساعة أغنية في مشهد الخطوبة (وعلى فكرة ماحدش بيعمل كوشة في البيت).