نسبة البنات المصريات اللي بتعمل راب في مصر ممكن توصل لـ1% وممكن تكون أقل كمان، لو سألنا عن السبب هتطلع إجابات من نوعية: أصل ده مشهد ذكوري، أصل الراب فن رجالي فقط، أكتر إجابة بقف قدامها هي "البنت مكانها في المطبخ"، ويزيد الطين بلة لما يطلع يوتيوبر يقول إن البنات ما ينفعش تعمل راب ويفضل يتريق على البنات!

من وجهة نظري إن أسباب ضعف نسبة مشاركة البنت في مشهد الراب المصري، سببها حاجات كتير أهمها الأهل والجمهور، وبعد كده أسباب كتير تانية زي مشاغل الدنيا واليأس، بس مهما كانت وجهة نظري أو نظركم، أكيد البنات اللي بتعمل راب أو بتحاول تعمل راب مش بتبطل من فراغ، عشان كده كان لازم أسأل ناس منهم.

دارين

عندها 16، سنة بدأت تعمل راب من سنة 2017 في الإذاعة المدرسية ولها تراكات منها تراك اسمه "قرار ازالة" مع رابر اسمه عابدين، وفكرة التراك عن الناس اللي بترفض إن البنت تعمل راب.

أهلك كان لهم اعتراض على إنك تعملي النوع ده من المزيكا؟

كان في رفض عشان بدأت الموضوع  وقت الدراسة وهم شايفين الدراسة أهم، وعشان المجال ده الولاد فيه كتير وقليل أوي لما بيبقى فيه بنات

مبطلة أو هتبطلي قريب؟

أنا مبطلتش وقريب جدًا في بروجيكت لينا (dop) مع بيج لوو باندا

هل الجمهور ممكن يكون سبب في إنك تبطلي عشان الناس رافضة فكرة إن البنت تراب؟

ردود الأفعال السلبية ماهتمتش بيها زي رفض الجمهور للراب النسائي، لأن الموضوع بالنسبالي بالظبط زي مبدأ عيب الست تشرب سجاير بس الراجل يشرب عادي. أنا هفضل اعمل راب والجمهور هيقتنع بالراب النسائي في يوم من الأيام.

دعاء بدر الدين

بدأت راب وهي عندها 16 سنة وعملت حفلات وعملت فيديو كليب مع شركة "100 نسخة" كمان، بس طبعًا الجمهور كان أقوى منها في الراب فقررت توقف وهي عندها 19 سنة

أهلك كان لهم اعتراض على إنك تعملي النوع ده من المزيكا؟

اه طبعا كان في اعتراض، خصوصًا لما كانوا يلاقوا أي كومنت فيه قلة أدب أو لما بيسمعوا عن المشاكل اللي بتحصل في المجال ده

إيه أكتر حاجة مرهقة نفسيا في الموضوع ده؟

أكتر حاجة هي الفانز؛ لما كنت بغني كنت بحارب مع أهلي حرفيًا عشان يسيبوني أعمل اللي أنا حباه وأسمعه للناس، بس الناس  أصلا مستنيالك غلطة، وبيتدخلوا في كل حاجة في حياتك وهم مايعرفوش حاجة عنها، غير جمهور الراب اللي مستكتر عليك كلمة فنان وليك فانز.

بطلتي تعملي راب امتى؟

لما حسيت إني بحارب أهلي عشان ناس مستعدة تحاربك أصلا، وقفت مزيكا و بقيت أعمل ده لنفسي وبس، وعلى ما أظن أغلب اللي بطلوا راب كان بسبب الجمهور اللي قطموا فيهم، الجمهور رافض البنت اللي بتراب لأن اغلب الجمهور بيراب أصلا ومبقاش في فانز، والبنت بتتشهر أسرع ده طبيعي، هم بيفضلوا يقولوا اتشهرت عشان بنت، بس الحقيقة إننا بنتشهر عشان بنات في مجال معروف إنه للرجالة.

طب والناس اللي بتقول البنت مكانها المطبخ؟

أغلب شيفات العالم رجالة  يعنى المطبخ ده لعبة الرجالة. عامة أي حد ممكن يعترض على أي حد، دي حرية شخصية، بس معلش لو أنا بيسمعني واحد بس وعجباه فأنا هلعب عشانه، حضرتك لو شايف إن ده مش مكاني، بكل سهولة ممكن ماتسمعنيش.

أميرة

عندها 25 سنة، بدأت راب سنة 2015 ، في حركة "16 على الطاير" اللي عملها أدهم عبد الجليل على الفيسبوك، على شكل تحدي بين الرابرز إنهم يعملوا فيديو يقولوا فيه 16 بار (جُملة)، وكانت أميرة قبلها بتعمل راب مع صحابها على القهوة.

أهلك كان لهم اعتراض على إنك تعملي النوع ده من المزيكا؟

أهلي ماكانش عندهم اعتراض وماكانوش داعمين، يعني وقفوا على الحياد، لأنهم مكانوش فاهمين إيه ده أصلا

إيه أكتر حاجة مرهقة نفسيًا في الموضوع ده؟

مافيش أي حاجه مرهقة نفسيًا بالنسبالي أكتر من إنك تحاول تحرك الTeam اللي أنت شغال في وسطه ومش هتعرف تعمل حاجه من غيره، أي حاجة غير كده عادي، أنا قعدت بعد تراك "الحلاج" 3 شهور بتشتم بس وعادي كنت عارفة ومتوقعة.

بطلتي راب ولا لسه؟

أنا مابطلتش، ده توقف سنة و5 شهور تقريبا، اه ماينفعش يكون التوقف في البداية بس تأتي الرياح بما لا تشتهي السفن، الدنيا كانت ملعبكة معايا في الشغل واضطريت اشتغل كذا شغل في نفس الوقت فمفيش مساحة لأي حاجة تانية، بس ناوية أرجع طبعًا ودماغي فيها كذا حاجة.

هل الجمهور ممكن يكون سبب في إنك تبطلي، باعتبار إن الناس رافضة فكرة إن البنت تراب؟

لا طبعًا، ما يرفضوا، الناس في بلدك إلا من رحم ربي رافضة فكرة إن البنت تتكلم أساسًا مش تراب، أنا هعمل الحاجة واللي مش عاجبه بضاعتي مايشتريش، لا ضرر ولا ضرار

طب والناس اللي بتقول البنت مكانها المطبخ؟

ما أنا بخش المطبخ، عشان لو مدخلتش مش هيطفحوا ولو ماطفحوش هيعيطوا ويفرجوا علينا الناس زي العيال الصغيرة، فمعلش بدخل المطبخ وبهاودهم زي عيالي برضه.

هوارة

بدأت تكتب وهي عندها 12 سنة، هوارة مش بتعمل راب بس بتعمل نوع متفرع من الراب اسمه R&B يعني أخت الراب كده، بس اهتمت بالراب ودخلت عالم الراب كمغنية  R&B في 2015، تابعة لفريق كبير اسمه "عشيرة الغوريلات" هي وأميرة. هوارة دلوقتى عندها 25 سنة ولسه موجودة.

أهلك كان لهم اعتراض على إنك تعملي النوع ده من المزيكا؟

كانوا مستغربين، رغم إن بابا كان درامر وبيغني وهو في نفس سني. لما كنت أغني بيفضلوا يضحكوا وفي نظرة إعجاب في نفس الوقت، هو كان اعتراض وسطي جميل كده

إيه أكتر حاجة مرهقة نفسيًا في المجال؟

إني مش حاسه الجمهور مستوعب اللي أنا بعمله، هو حابه بس مش مستوعبه، ومش بيتعب نفسه في إنه يفهم اللي بعمله ده إيه.

أنتي مبطلة راب؟

هو أنا مابطلتش، هو بس موضوع وقت كده لكسر الملل، ومن المشاكل اللي بتخليني آخد وقت، إني مش بلاقي حد يعمل المزيكا اللي أنا متخيلاها، لأن أنا بكتب الكلا م وألحنه وبكون متوقعة المزيكا بشكل معين.

هل الجمهور ممكن يكون سبب في إنك تبطلي، عشان شايفين البنت مكانها المطبخ؟

لا خالص، وأنا مش شايفة رفض من الناس اللي بتسمعني، حتي لو مش فاهمين اللي بعمله، أنا بقيت بلاقي ناس بتحب تسمعني لمجرد إنهم مبسوطين إن في بنت بتعرف تعمل ده بالطريقة دي. أما موضوع المطبخ ده فرده: "زي ما بنراب قايمين ببيوت، لو ضوافرنا اتقطمت مش بنموت"

طب مش عايزة تطلعي بوشك ليه؟

سببين، السبب الأول إني مش عايزه المستمع يتأثر بأي حاجة تانية، هو هيسمعني عشان عايز يسمعنى مش عشان أنا بنت وعايزاه يسمع المنتج كمنتج موسيقي. السبب التاني ملاحظتي إن المشهد المصري فيه بلبلة وكلام كتير مالوش علاقة بالمزيكا، في ناس عايزه الshow أكتر ما هي عايزه مزيكا وأنا رافضة أخش في الدايرة دي، أنا بعمل راب عشان بحب الراب ومش عايزه حياتي الشخصية تتأثر باللي بيحصل.

مها

بدأت تعمل راب في سنة 2004 وهي أول بنت تعمل راب في مصر من قبل أي بنت تانية ومن قبل رابرز رجالة كتير في مصر. عملت تراك مع كاندي من إنتاج "الواي كرو" سنة 2004 اسمه "البنات جت". مها بطلت ودلوقتى عايشة في دبي.

هل أهلك كان ليهم اعتراض على إنك تعملي نوع الفن ده؟

طبعا كان في قيود كتير، مش من أهلي بس، من الناس عمومًا هيقولوا إيه عليا وكده.

إيه أكتر حاجة مرهقة نفسيًا في الموضوع ده؟

بالنسبالي رد فعل الجمهور والناس اللي أنا المفروض أقنعهم بإن فيه راب عربي ومصري وفي بنت بتغني، أنا كنت ساعتها في مساندة كبيرة ورايا، من ناس في مشهد الراب المصري زي "عمر بفلط" و"ياسين زهران"، من غيرهم أنا كنت هكتفي إني أسمع راب غربي وبس.

بطلتي ليه أو إيه اللي خلاكي تبطلي؟

مفيش حاجه معينة، الفكره ساعتها كانت شبه تجريبية وماكناش متأكدين من نجاحنا وتقريبا كان الجمهور يجيب إحباط وشايف البنت عورة ونسبة البنات في المجال كانت قليلة أوي، فبطلت وقلت أربي عيالي.

فكرتي ترجعي تاني للراب؟

الفكره مش بعيدة بس سلكت اتجاه تاني في نمط حياتي وموضوع زي ده لازم تكرسله وقتك كله وتكون مقتنع إنه زيه زي أي كارير.

إيه ردك على الناس اللي بتقول للبنات خشوا المطبخ؟

أقولهم ك*****

تافي

مصرية كانت عايشة في مصر وحاليًا عايشة في إنجلترا وبدأت الراب عندها 16 سنة وهي دلوقتي 19 سنة وهتدرس الإنتاج الموسيقي في جامعة Westminster University في 2019

بتواجهي نفس المشاكل بتاعت رد فعل الجمهور على إن البنت ينفع تراب ولا لأ؟

في انجلترا الموضوع مختلف، الناس هنا مش بتفكر أنت ولد ولا بنت، المهم عندهم بتقدم فن عامل ازاي. أنا بواجه نوع مختلف من الصعوبات، إنهم هنا يفهموا إني ضعيفة في الراب عشان مصرية، لكن في مصر كانت الناس رفضة فكرة إني بنت وبعمل راب أصلا.

طب وأهلك؟

بابا موسيقي كبير في الشرق الأوسط، هو عازف القانون ماجد سرور، وكان رافض لأسباب لها علاقة بمجال الفن في مصر مش لأي سبب تاني.

يوكا شاهين

بدأت وهي عندها 19 سنة في 2010، لما كانت بتسمع الرابرز بيناقشوا في قضايا ليها معنى، سواء كانت معاناة شخصية، أسرية، سياسية واجتماعية، كانت عايشة في مصر وعملت راب عربي وهي دلوقتي في الدنمارك بتعمل راب إنجليزي

هل أهلك كان ليهم اعتراض على إنك تعملي نوع الفن ده؟

أهلي ماعترضوش، على الفن، لكن اعترضوا على الوسط، لكن المرهق في الموضوع المستمعين وعقلياتهم و بعض اللي موجودين في المجال وجهلهم بثقافة الهيب هوب وتحديدًا الراب.

أنتي مبطلة راب؟

لا أنا مش مبطلة، أنا بعدت عن مشهد الراب المصري بس ليا مكانتي ومشاريعي في المشهد الأوروبي ، لأن الأجانب بيقدروا اللي بتعمله وبلاقي مقابل مادي و معنوي

لو حد قالك خشي المطبخ هتقوليله إيه؟

هقوله دخلته وهفضل أدخله بمزاجي وبكيفي، وده لا يتعارض مع إني أفضل أعمل الحاجة اللي حباها ومتميزة فيها.