أحسن 10 فيديوهات راب مصري على اليوتيوب من بداية 2018
إيه المهم؟ إن الفيديو يكون 4K ولا إن الأغنية نفسها تكون جامدة ولا إن فكرة الفيديو تكون جديدة و جامدة؟
المعادلة دي صعبة، عشان كده أي ألبوم مزيكا بتلاقي فيه من 2 ل 3 تراكات متصورة بفكرة "فيديو كليب"، عشان مش كل الأغاني ينفع تتصور. معنى الكلام ده إن في تراكات لو اتصورت مهما كانت فكرة الفيديو قوية، بس المزيكا نفسها مش قوية هتقتل الفيديو، عشان الصوت بيكمل الفكرة. لكن في حالات لا تعتبر فيديو كليب، زي البوم زاب ثروت، ده مش فيديو كليب ولكن طرح للألبوم على شكل بصري وهو بيغني، إنما الفيديو اللي مع أحمد شيبة مثلًا، ده "فيديو كليب".
في 2018 أغاني الراب المصري بقى الفيديو كليب فيها واخد حقه بدرجة عالية جدًا، وبقى الرابرز مهتمين أخيراً بفكرة إنه لازم يكون عندهم فيديوهات راب على اليوتيوب والفيسبوك كمان عشان شعبيته. 2018 لسه ما خلصتش، بس قولنا نشوف أحسن 10 فيديوهات راب مصري على اليوتيوب لحد دلوقتي، بس طبعاً من غير ترتيب.
بدأت 2018 بفيديو مميز جدًا للراب سانتا. الفيديو بيعبر عن يوم عادي في حياة سانتا، والأهم المراحل اللي بيمر بها أي رابر من "سيركلات"، كأنه بيصور يومه عادي من غير تكليف وزخرفة بصرية.
رابر ليجي سي من طنطا. الفيديو هو حالة أو موود كده، من أول اسم الأغنية "2 بليل" لحد المزيكا اللي بتخليك تندمج في اللون البنفسجي بتاع الفيديو وصوت ليجي سي المؤثر وطريقته والتصوير. تقدر تقول إن الأغنية دى كاملة في كل حاجة.
رابتور رابر متميز صاعد جديد في المشهد المصري، ده أول فيديو له وقدر يطلع الأغنية في أحسن شكل لها، من خلال فريق عمل زي ديابلو، اللي هو مساعد مخرج مسلسل السبع وصايا. اما مدير التصوير هو مصطفى النمر المتمرس في المهنة، بالنسبة للرابرز اللي تحت الأرض.
أول اشتراك ما بين مروان موسى و دوشة، اول عمل مشترك لهم مع بعض هو فيديو كليب يجمع الاتنين، وطبعاً المخرج هو رائد المريش، واحد من أحسن الناس اللي بتقدر تعمل فيديوهات راب واسمه مسمع جداً في مشهد الراب السعودي والمصري. الأغنية نفسها حلوة بس مش أحلى من الفيديو والفرق ما بين الاتنين مش بعيد.
فيديو معبر جداً عن الجيل الجديد في الراب المصري، رغم أن "لورد المرفوض" الرابر مش من الجيل الجديد، بس هو مستمر وقرر ينقل من شكل معين في الراب للشكل الجديد، اللي بنقول عليه "نيو سكول" الفيديو من البوم لورد اللي لسه بيتسجل.
فيديو مميز للرابر فانديتا9 في وقت رابرز كتير بتحاول تعمل فيديوهات راب تعبر عن قوتها ودورها المؤثر في المشهد المصري، أو فيديوهات استعراضية معبرة أكتر عنهم، لكن فانديتا9 عايز يخلق لنفسه شكل يقدر يميزه في الزحمة دي، الأغنية من ألبومه الجاي.
رابر E Evil نزل فيديو في أواخر شهر أغسطس والجديد في الموضوع إنه قرر يبعد عن الموجة بتاعت النيو سكول وزحمة المدينة، ويروح يصور في الصحراء على مزيكا ضاب ستيب نوعاً ما يعني.
من أكتر الفيديوهات المميزة على اليوتيوب في الحتة دي. فيديو مفيهوش تكليف وفكرة إن يكون في ناس بترقص وتعمل حركة في الفيديو مهم جدًا، وكان مناسب عشان ده عمل حركة في الفيديوهات ماكانتش منتشرة في الجيل الجديد، كان الاعتماد على الظهور منفرد أو مع رابر تاني.
التنوع واضح في فيديوهات الراب في المشهد المصري، وبقى كل رابر عايز يميز نفسه عن آخر فيديو نزل على اليوتيوب، زي فيديو كليب الرابر إيريك، اللي عمل فيديو مميز بصرياً عن الموجود. الفيديو من إنتاج Serious Black films، وهي قناة متخصصة في صناعة فيديوهات مهتمة بالراب المصري.
المعادلة لصناعة فيديو كليب ناجح هي مهمة صعبة مش هتكمل، إلا لو العنصرين (سمعي وبصري) كاملين، والعنصر السمعي لازم يكون متوفر من أول الإنتاج الموسيقى لحد قوة الرابر نفسه وكلماته وأدائه، والعنصر البصري هو قدرة المخرج ومؤلف الفكرة إنه يخرّج الأغنية من حالتها (السمعية) لحلتها الجديدة (البصرية) ومطلوب منه يعمل حاجة جديدة تجذب العين وتحير المخ وتبهر العقل، زي ما المخرج وائل علاء قدر يعمل في أغنية أبيوسف "عزرائيل" وبكده تكون المعادلة تحققت.
