"أنا بتهته وأنا بتكلم مع الناس، بس مبتهتهش وأنا بتكلم مع نفسي، بس أنا مش عايز اتكلم مع نفسي أنا عايز اتكلم مع الناس". مشهد مش بيتمسح من الذاكرة لآسر ياسين في "رسائل البحر"، الدور اللي اتحفر في تاريخ السينما المصرية وأثر فينا، وتقريبًا كل يوم ممكن تلاقي صور "يحيي" وكلماته على الفيسبوك رغم مرور سنين طويلة على عرض الفيلم، وفي وسط المسلسلات الكتير اللي اتقدمت في رمضان اللي فات، لمع مسلسل "30 يوم" وكان ليه حالة خاصة جدًا بكل تناقضات الشخصية والمشاكل النفسية اللي في شخصية "طارق"، الدكتور النفسي اللي قدمها "آسر ياسين" أو شخصية "توفيق" اللي قدمها باسل الخياط. قابلنا آسر ياسين وسألناه عن فيلمه الجديد وعن أعماله.

"تراب الماس" رواية أحمد مراد اللي كانت في أعلى المبيعات فترة طويلة وبيعتبرها البعض "أفضل أعماله"، تم الإعلان من سنين إنها هتتعمل فيلم. أحمد حلمي يجي وكريم عبد العزيز يروح والناس تقول كلام كتير وإشاعات، لحد ما عرفنا إن هيبدأ الشهر ده تصوير الفيلم بسيناريو أحمد مراد وإخراج مروان حامد وبطولة آسر ياسين، وكان لازم ده يبقى أول سؤال نسأله وكانت إجابة "آسر": "تصوير تراب الماس هيبقى في شهر 10 أو 11، أنا بقالي سنة ونص بحضر للفيلم ده، كان لازم اتعلم ألعب درامز ولازم أخس شوية، ده غير الشغل اللي على الشخصية".

اللي قرأ "تراب الماس" عارف صراعات طه اللي وصل في الآخر إن "القتل أثرً جانبي"، بيقولنا "آسر": "بنحكي مين طه وتاريخ الشخصية عامل ازاي وردود أفعاله وتصرفاته في موقف معينة، وإيه مدول كل مشهد في السيناريو عشان في الآخر الشخصية تطلع طه مش آسر، بكل ذكرياته ومبررات أفعاله". نجاح الرواية الكبير ممكن يقلق صناع الفيلم لكن ده ماحصلش مع البطل، عشان حسب كلامه "أنا باجي على نفسي وبعمل اللي عليا ومش قلقان عشان المخرج والممثلين وكل الناس بيعملوا اللي عليهم، وفي الآخر الفيلم هو الرواية".

أدوار "آسر" اللي مليانة تقلبات نفسية وغموض ممكن تتعبه كشخص في حياته بعد كده، لكن هو بيقولنا إن الموضوع عامل زي لما تمشي مشية معينة وتتعود عليها وبعدين تحاول ترجع لطبيعتك، اللي بيحافظ على ده وميأثرش على سلامه النفسي هي مساحته الآمنة زي ما بيسميها، المتلخصة في عيلته وأصحابه وأولاده ومراته، وفي كل ده بيحاول يعمل أدوار مختلفة ومش زي بعض خالص، "مش عايز أكرر دور عملته قبل كده، ولازم الشخصية يكون ليها أبعاد بالنسبالي، ومش شرط الأبعاد دي تكون حاجة عميقة وكبيرة، ممكن يكون فيلم كوميدي مجرد تسلية عشان الناس تضحك، لكن في الحالة دي فيه طريقة تانية خالص في أبعاد الشخصية، زي إيقاع كلماتها وحركاتها والتعبير الجسدي عشان تكون بتضحك".

على الرغم من انحيازه دايمًا للسينما زي ما بيقولنا لكن "آسر" بيقرر الفترة الأخيرة ينحاز للدور الجيد والعمل الجيد، وعشان كده بيكون ليه أدوار كتير في التليفزيون، من مسلسل العهد لـ30 يوم لألف ليلة وليلة ولسه بيوعدنا بمسلسلات تانية.

آسر ياسين الممثل اللي بيشاركنا دايمًا اهتمامته، علاقته بعيلته، حبه للمزيكا، وعلاقته بكلبه، عنده جانب تاني مش كل الناس تعرفه وهو إنه مخرج! سألنا آسر عن مشاريعه الإخراجية وقالنا: "أنا عملت كليب ل"أبو" كان أغنية أهواك. عملته عشان أنا بحب المزيكا والفيديوهات واتبسطت جدًا وأنا بعمله، وعملت كمان حلقات على الإنترنت، وعملت مشروع تخرج فيلم قصير لبنت في معهد سينما كانت بتدرس مونتاج وأنا كنت المخرج".

بيحكيلنا "آسر" إنه كان بيجرب، فحسب كلامه، "اتعلمت يعني إيه مونتاج، ويعني إيه تصوير ويعني إيه إضاءة وديكوباج وازاي أوجّه ممثل وأمسك كاميرا، واتعلمت كمان اتكلم امتى واسكت امتى، وأنا مخرج لما كان حد بيسألني عن حاجة ببقى مش عايز اتكلم، فعرفت امتى الوقت اللى ممكن اسأل فيه أو مسألش"، سبب ده بحسب تعبير "آسر": "المخرج بيبقى عنده كمية تفاصيل في دماغه غير طبيعية وأنا بعمل فيديو كليب، فما بالك بحد بيعمل فيلم أو مسلسل". "آسر" ممكن يكرر تجربة الإخراج لو فيه حاجة استفزته ولفتت نظره إنه يخرجها.

 .Shoot by @MO4Network's #MO4Productions

Photos by @CairoZoom