بيُقال إن المتحكم في توقيت عرض الفيلم في الغالب يا بيكون أصحاب دور العرض، يا الشركة المنتجة، والعملية مابتمشيش بقواعد محددة، هي بتمشي بالحب، فـ على أساس الحب، بيتحدد ميعاد نزول الفيلم والمدة اللي هيتعرض خلالها. من المنطلق ده أفلام كتير كانت قيمتها الفنية كويسة جدًا، وفشلت في شباك التذاكر بسبب توقيت نزولها، وإنها لو اتعرضت في توقيت تاني، كان اتغيَّر مصيرها، ومش بعيد كانت هتبقى شباك أول. من أهم الأفلام دي:

معالي الوزير
في 2002 لما نزل فيلم "اللمبي"، حصلت ضجة بين النقاد وصناع السينما؛ ازاي فيلم بالمستوى الفني الضعيف ده ويحقق الإيرادات دي؟ وقتها الفيلم حقق أعلى إيرادات في السنة بـ حوالي 27 مليون جنيه، وكانت سنة النجوم الشباب، هاني رمزي في "محامي خلع"، وكريم عبد العزيز في "حرامية في كي جي 2"، والسقا في "مافيا"، واللي برضه حقق نجاح كبير وإيرادات وصلت 13 مليون جنيه، وبدأ السقا منه مسيرته كـ "فارس وجدع وصاحب صاحبه".

قصاد الأفلام الشبابية نزل النجوم الكبار زي عادل امام بـ "أمير الظلام"، وأحمد زكي بـ "معالي الوزير" في 5 ديسمبر 2002، وحقق الفيلم إيرادات بحوالي 3 مليون جنيه، وخرج أحمد زكي من السباق بجايزة أحسن ممثل عن "معالي الوزير" في مهرجان القاهرة السينمائي.

قص ولزق
رغم الجودة الفنية لـ الفيلم ده، واعتباره من أهم الأفلام في السينما، إلا إنه مأخدش حظه الكافي في شباك الإيرادات. الفيلم نزل في بدايات الموسم الصيفي -شهر مايو 2007- بالتزامن مع أفلام حققت نجاح جماهيري كبير زي "تيمور وشفيقة"، "كده رضا"، و"عمر وسلمى".
في الوقت اللي بيتنافس بيه "كده رضا و"مرجان أحمد مرجان" على كسر حاجز الـ 30 مليون جنيه، كان "قص ولزق" بيخرج من السباق بعد 3 أسابيع بس من الفشل بحوالي 420 ألف! وعلق شريف منير وقتها على فشل الفيلم بإن سببه التوقيت السيء لنزوله، وقلة عدد دور العرض.
الفيلم مثّل مصر في المسابقة الرسمية لمهرجان الرباط السينمائي الدولي، وفاز بجائزة أفضل فيلم عربي في مهرجان القاهرة السينمائي الدولي.

الشوق
5 يناير 2011 
في 2011، تم عرض 22 فيلم سينمائي بإيرادات إجمالية 102 مليون جنيه، وقتها ده كان أقل عدد من الأفلام يتم عرضها وأضعف ايرادات اتحققت خلال 15 سنة. حظ فيلم "الشوق" كان سيء حبتين، لإنه اتعرض أول مرة قبل الثورة بـ 20 يوم، وحقق 2 مليون جنيه، وكان قدامه فرصة قوية يحقق ايرادات مُرضية، لولا الأحداث السياسية. لما الحياة بدأت تدب في السينما تاني، حقق الفيلم 600 ألف بس. قدام الإيرادات الضعيفة كان المكسب الحقيقي إن الفيلم كسب جائزة أحسن فيلم في مهرجان القاهرة السينمائي، وسوسن بدر كأحسن ممثلة في نفس المهرجان، وأثبتت روبي نفسها كممثلة شاطرة محترفة قادرة تقوم بفيلم مهم زي "الشوق".

ميكروفون
فيلم "الشوق" ماكنش تعيس الحظ للدرجة اللي وصلها فيلم "ميكروفون" اللي نزل في دور العرض يوم 25 يناير 2011!
إيرادات الفيلم ماتخطتش حاجز الـ 700 ألف، ومع ذلك خالد أبو النجا ويسرا اللوزي ماهتموش بالإيرادات اللي حققوها وقتها بقدر ما اهتموا بالاعتصام في الميدان يوم 25 يناير.

فبراير الأسود
صناع الفيلم ترددوا كتير لحد ما حددوا الميعاد الرسمي لنزول الفيلم واستقروا على 6 مارس 2013، مع غياب الأسماء التقيلة والأفلام المنتظرة وإن الفيلم ماكانش قصاده أفلام منافسة يتخاف منها، بس للأسف ماكانش ده التوقيت المناسب لنزول الفيلم برضه، لإن 600 ألف في أول اسبوع تُعتبر ايرادات ضعيفة نسبيًا. مقابل ده، الفيلم حاز على تعليقات ايجابية كتير، ونجح لما اتعرض على التليفزيون.  

رسائل البحر 
إن الفيلم ينزل كعرض أول في شهر فبراير، بالنسبالي وبالنسبة لأي حد توقيت غريب، يعني لا في آخر السنة ونقول ماشي، ولا في موسم الصيف. "رسائل البحر" من أقرب أفلام المخرج "داوود عبد السيد" لقلبي، فيلم كل عناصرة متكاملة، وأشاد بيه نقاد كتير على أنه أفضل فيلم في السنة.
في أول اسبوعين حقق 256 ألف جنيه، وبنهاية الاسبوع الـ 11 حقق إيرادات إجمالية 5 مليون جنيه. 

فتاة المصنع
في 2014، بدأت تستعيد السينما حيويتها من تاني، ورجع الفنانين لسباق الموسم، بس "فتاة المصنع" دخل بدري شوية، واتعرض في شهر مارس.

الفيلم من بطولة ياسمين رئيس، وإخراج محمد خان، ورغم إن الفيلم من إنتاج 7 جهات مختلفة، إلا إنه حقق إيرادات مليون و400 ألف، قدام إيرادات كبيرة حققتها أفلام بتتعرض بالتزامن معاه وقتها، زي "لامؤاخذة"، "حلاوة روح"، و"سعيد كلاكيت". بعد دخول الموسم الصيفي والنجاح اللي حققه فيلم "الفيل الأزرق"بحوالي 31 مليون جنيه، كان في منافسة مع "فتاة المصنع" و"لامؤاخذة" في المسابقة اللي بتشكلها لجنة من قِبل نقابة السينمائيين المصرية، عشان ترشح فيلم مصري للأوسكار في فئة أفضل فيلم أجنبي، والاختيار وقع على فيلم "خان".
بجانب الاختيار ده، فازت "ياسمين" بـ جائزة أفضل ممثلة في مهرجان دبي 2014، وجائزة أفضل ممثلة في مهرجان مالمو للسينما العربية.

فيلا 69
قبل ما 2013 تخلص، تم عرض "فيلا 69" في ديسمبر، تحفة آيتن أمين الروائية الأولى، ومن أحلى السيناريوهات اللي اتكتبت. ميزانية الفيلم اتكلفت 5.5 مليون جنيه، وكان منطقي مع التوقيت الغريب لعرض الفيلم انه مايحققش إيرادات غير 600 ألف من وقت عرضه لحد ما اترفع من دور العرض.