تسمع ولا تشوف؟.. مسلسلات إذاعية اتحولت لأعمال ناجحة
لو سألت والدك أو والدتك عن الحاجة اللي كانت بتسليهم في فترة الستينات ولحد منتصف التمانينات، هيقولوك كلمة واحدة بس "الراديو"، لأن في الفترة دي التلفيزيون كان بيعتبر رفاهية كبيرة ومش أي بيت فيه تليفزيون، وحتى لو في تليفزيون البث كان محدود جدا، فكان الاعتماد الأكبر على الإذاعة، وده كان سبب رئيسي إن أغلب الفنانين الكبار في الوقت ده بيتجهوا لتقديم أعمال للراديو، ومن هنا بدأت المسلسلات الإذاعية اللي كانت بتتذاع طول السنة مسلسل وراء التاني، مش في مواسم محددة أو في المناسبات زي دلوقتي.
الأعمال اللي اتقدمت في الإذاعة وقتها نجحت نجاح ضخم جدًا، ومن النجاح ده اتحولت لأفلام سينمائية حققت نجاح أكبر ولحد دلوقتي بتعتبر من الكلاسيكيات المهمة في تاريخ السينما المصرية أو مسلسلات درامية بتعبتر علامات. في الليست دي هنقولك على 7 من أهم المسلسلات الإذاعية اللي بقت أفلام أو مسلسلات تليفزيونية، عشان تسمع الأصل وتحكم بنفسك، اسمع معايا يا سيدي.
المسلسل المشهور اللي اتذاع سنة 1996 على التليفزيون من بطولة نور الشريف وعبد الرحمن أبو زهرة وعبلة كامل، كان في الأساس مسلسل إذاعي بنفس القصة والأحداث لكن بطقم ممثلين مختلفين تمام، فكان ملك الترسو فريد شوقي هو "عبد الغفور البرعي" وشاركه لأول مرة في دور إذاعي ليها رانيا فريد شوقي، أما الأبطال كانوا هشام عبد الحميد وسوسن بدر وصبرى عبد المنعم وماجدة حمادة وزهرة العلا وأخرجه أحمد علام
كتب كلمات المقدمة والنهاية للمسلسل بخيت بيومي ولحنها الموسيقار محمد علي سليمان وغناها عماد عبد الحليم.
الفيلم الشهير "أفواه وأرانب" كان هو كمان مسلسل إذاعي من جزئين هما "أفواه وأرانب" للجزء الأول واللي أحداثه هي نفس أحداث الفيلم، و الجزء التاني بعد ما "نعمة" و "محمود بيه" اتجوزوا، لكن بطقم ممثلين مختلف تماما للمسلسل الإذاعي – عدا الشخصيتين الرئيسيتين فاتن حمامة ومحمود ياسين- ضم سمير غانم، نبيلة عبيد، جميل راتب، هدى رمزي وحسن مصطفى وغيرهم. غنى تتر المسلسل الإذاعي وردة، أما أغنية الفيلم غنتها الفنانة فاطمة عيد.
مسلسل إذاعي من بطولة نور الشريف - بوسي- جلال الشرقاوي - محمد الدفراوي - نادية السبع - جورج سيدهم اتحول بعد كده لفيلم "الفول" اللي قام ببطولته عادل إمام، قصة المسلسل هي نفس قصة الفيلم اللي بتحكي عن صحفي بيحاول يلاقي دليل أو شاهد على قضية قتل حصلت في واحدة من البارات اللي بيسهر فيها، وبيقدر أبو المتهم صاحب النفوذ إنه يبعد التهمة عن ابنه، وفي نفس الوقت بيقع في حب المذيعة المشهورة بنت صاحب النفوذ وأخت الجاني.
فيلم "الدنيا على جناح يمامة" اللي قام ببطولته محمود عبد العزيز وميرفت أمين، كان فى الأصل مسلسل إذاعي بنفس الاسم سنة 1987، لكن من بطولة محمود عبد العزيز ونجلاء فتحي وكان أول عمل إذاعي لمحمود عبد العزيز في مسيرته، وشاركه في المسلسل فاروق الفيشاوي وضيف الحلقات الفنان عبد الله فرغلي.
المسلسل من تأليف وحيد حامد وإخراج يوسف حجازي واتذاع لأول مرة سنة 1987 أما الفيلم فكان كمان من تأليف وحيد حامد وإخراج عاطف الطيب ونزل السينمات سنة 1989.
مسلسل "صابرين" اللي تم إنتاجه سنة 72 بيعتبر من أشهرالأعمال الإذاعية اللي قدمتها شادية، وكان من تأليف جاذبية صدقي، وإخراج عادل خفاجة، وموسيقى وألحان بليغ حمدى، وهو من بطولة شادية، وصلاح ذو الفقار، ويوسف شعبان، وعماد حمدى وسميحة أيوب، وبيحكي عن والدة صابرين اللي بتمرض مرض شديد فبتزورهم خالتهم عشان تطمن على صحة أختها، فبينجذب الأب للخالة وبتبدأ توقعه في شباكها وتستنزف فلوسه.
المسلسل اتحول لفيلم تم إنتاجه سنة 1975 بطولة نجلاء فتحي، هدى سلطان، عادل إمام، عماد حمدي ويوسف شعبان.
كواليس المسلسل ليها قصة شهيرة وهي اختفاء بليغ حمدي اللى عمل الموسيقى التصويرية للمسلسل وماكانش التتر جهز ورمضان قرب لحد ما صلاح ذو الفقار، اللى كان عارف بليغ بيستخبى فين في إسكندرية، راحله ولقى بليغ قاعد متطمن ومخلص كل المزيكا، وسجلت شادية التتر في نفس اليوم.
مسلسل إذاعي من بطولة سميحة أيوب ومحسن سرحان وتوفيق الدقن وسعد أردش واتذاع في أواخر الخمسينات، بتحكي قصته عن المهرب سلطان اللي بيقع في حب الراقصة سمارة اللي قتلت أمها وأندمجت في أعمال المخدرات. المسلسل كتبه للإذاعة عبد المنعم السباعي -محمود إسماعيل وأخرجه يوسف الحطاب. اتحول بعد كده لفيلم من بطولة تحية كاريوكا ومحسن سرحان ومحمود المليجي.
اتقدم للإذاعة من تأليف بهجت قمر وبطولة فؤاد المهندس وشويكار ومحمود المليجي ووداد حمدي وغيرهم من نجوم الفترة دي، بعد كده سنة 1970 اتحول لفيلم نجح نجاح كبير جدا بنفس الاسم لنفس الأبطال، من إخراج نيازي مصطفي وتأليف بهجت قمر بالاشتراك مع عبد الحي أديب.
