زمان أيام المسرح القومي ومهرجان المسرح للجميع، كان الفنانين في مصر بيهتموا جدا بالأعمال اللي بيقدموها، عشان كده، ولفترة من الفترات اللي تعتبر أحسن الأيام اللي عدت على المسرح في مصر، اتعملت مسرحيات بتعتبر من أعظم الأعمال اللي اتقدمت في تاريخ مصر الفني كله، خصوصا المسرحيات المأخوذة من أعمال أدبية عالمية. في الليست دي هتعرف 7 من أفضل المسرحيات المصرية المنقولة عن الأدب العالمي.

هاملت

عن المسرحية المعروفة باسم "مأساة هاملت" لويليام شكسبير واللي اتعرضت عن نصها الأصلي لأول مرة سنة 1609. أنتجها محمد صبحي سنة 1978 وقدم واحدة من أحسن الأعمال اللي قدمها في حياته، "صبحي" عمل السيناريو والحوار وشاركه في البطولة نيفين رامز وهناء الشوربجي وعبد المنعم عيسى.

ملك سيام

 مسرحية تانية لمحمد صبحي قدمها سنة 1988 عن رواية الكاتبة الأمريكية Margaret Landon باسم Anna and the King of Siam وبعد كده اتحولت  لمسرحية غنائية من تأليف ريتشارد رودجرز وأوسكار هامرستين سنة 1951، من ترجمة وإعداد يسري خميس وبطولة نورا أرماني، عبد الله مشرف وخليل مرسي.

جوازة طلياني

عن رواية الكاتب الإيطالي Eduardo De Filippo، وبتحكي عن فيلومينا،  ست من مدينة نابولي وبتضطر بسبب فقرها الشديد إنها تشتغل كفتاة ليل، لكنها من جواها رافضة الاتجاه ده بشدة ونفسها تبقى أم، فبتخدع "دومينيكو" عشان يتجوزها وبتقوله إنها مريضة وهتموت، لكن بعد ما بيتجوزوا بيكتشف إنها بصحتها وبيحاول "دومينيكو" يتخلص من الزواج بعد سنين طويلة.  

من بطولة يحيى الفخراني، دلال عبد العزيز والإخراج المسرحي لماريانو ريجليو، وتم إنتاجها سنة 1998، وحصل بسببها يحيى الفخراني ودلال عبد العزيز على جائزة أفضل ثنائي على مستوى العالم حسب ما قالت "دلال" في لقائها في برنامج صاحبة السعادة في فبراير اللي فات.  

قناع السعادة

من بطولة الفنان محمود المليجي، ليلى طاهر وحيد عزت وغيرهم، عن مسرحية من فصل واحد للكاتب والسياسي الفرنسي Georges Clémenceau واتنشرت لأول مرة في بدايات القرن العشرين  تقريبا سنة 1910، بتحكي عن رجل صيني اسمه "تشانغ" وهو أعمى وسعادته الوحيدة  في مراته وابنه وفي يوم وهو ماشي مع الخادم بتاعه بيقابل ساحر ومن وقتها حاجات كتير بتتغير.

كاليجولا

رواية للأديب العالمي ألبير كامو، اتنشرت أول مرة سنة 1944 وكان العرض الأول ليها كمسرحية سنة 1945، بتحكي عن كاليجولا الإمبراطور الروماني واللي بيعتبرأشهر طاغية في التاريخ الإنساني وتولي حكم روما من  سنة 37 لسنة 41 ميلاديا. المسرحية من بطولة نور الشريف، إلهام شاهين وترجمة رمسيس يونان واتعرضت على المسرح سنة 1992.

المصيدة

من بطولة إلهام شاهين، يوسف شعبان، جورج سيدهم وغيرهم من النجوم، عن رواية أجاثا كريستي The Mousetrap واللي صدرت أول مرة سنة 1952، مسرحية بوليسية بتعتبر من أطول المسرحيات اللي تم عرضها في التاريخ بـ 25000 عرض، أعدها للمسرح المصري ماهر ميلاد وأخرجها الفنان سعد أردش.

الملك لير

النسخة المصرية للرواية العالمية لويليام شكيسبير اللي صدرت لأول مرة سنة 1606، قدمها يحيى الفخراني سنة 2001 وبتدور أحداثها عن الملك اللي قرر يوزع أملاكه علي بناته الثلاثة، لكن حرم بنته الصغيرة من الورث عشان قررت إنها ماتنافقش أبوها، بس بناته الاتنين استولوا على ثروة أبوهم وطردوه فمش بيلاقي غير بنته الصغيرة عشان يفضل عندها.

النسخة المصرية للمترجمة فاطمة موسى وشارك في البطولة سوسن بدر، عهدي صادق وهشام الشربيني.