في يوم بالليل وأنا قاعدة اتفرج على التليفزيون، على الساعه 12 كده لما الفيلم اللي كنت بشوفه خلص وقاعدة زهقانة ماسكة الريموت وبقلب وخلاص، على أمل ألاقي حاجة اتفرج عليها، لقيت الريموت خدني لمجموعة قنوات تحسها ديب ويب النايل سات، اسمها القنوات الإقليمية، اللي هما قنوات الدلتا والصعيد والقنال، مجموعة قنوات كده تحس إنهم لسه في التمانينات وماجوش معانا في 2018، المهم.. كملت تقليب ووقفت عند قناة الدلتا، ولقيت تمثيلية غريبة شغالة وبقالي ساعة بتفرج عليها وماطلعوش فواصل ولا أنا زهقت، التمثيلية خلصت كلها بعد ساعه ونص.. إيه ده؟

اللي أنا قعدت اتفرج عليها دى سهرة تليفزيونية اسمها "زواج على  ورق سلوفان"

السهرة التليفزيونية كانت شكل من أشكال الدراما اللي بينتجها التليفزيون المصري زمان، وازدهرت بشكل كبير في فترة التمانينات والتسعينات ونجحت وكملت لسنين طويلة، وكان بيشارك فيها نجوم كبار من صناع تاريخ الدراما في مصر، وكمان كانت فرصة كبيرة لممثلين شباب وقتها بقوا دلوقتى نجوم كبار، زي أحمد السقا ومنى زكي، بعد مشاركة ناجحة في سهرة "زواج على ورق سوليفان".

مع بداية الألفينات، بقت المسلسلات الطويلة بتحقق ربح أكبر للمنتجين غير إن إنتاج ماسبيرو الدرامي وقع والسينما سيطرت، كل ده بسببه قل إنتاج سهرات التليفزيون لحد ما اختفت ومابقاش النوع ده من الدراما بيتكب دلوقتى، بس فضلّنا مجموعة من السهرات العظيمة من أرشيف التليفزيون المصري، زي دول:

1- كيف تعيش بمرتبك :

"شوفي بقى يا ست فوزية، بند الجبنة الرومي ده كتير شوية، ازاى يا آدم إذا كنت أنا بقطع قرص الجبنة بنفسي بموس الحلاقة. لاء في طريقة أفضل، تقدري تقطعى قرص الجبن الرومي طرنشات بالفتلة"..

كيف تعيش بمرتبك هى سهرة تليفزيونية مدتها ساعة وخمس دقايق، ومن بطولة عبد الرحمن أبو زهرة، أحمد السقا، محمد سعد وسناء يونس، بتحكي عن قصة أسرة مصرية عادية بتحاول تعيش وتنجو وسط زيادة الأسعار الرهيبة اللي بتتعرضلها البلد، للدرجة اللي اضطرتهم يقطعوا الجبنة الرومي بالفتلة، في إطار اجتماعي كوميدى يخليك تندب حظك وأنت بتضحك. السهرة من تأليف حسام حازم، ومن إخراج طارق النهري وإنتاج قطاع الإنتاج.

2- مش معقول.. الثانوية العامة:

عارفين أغنية عمرو دياب الغريبة بتاعت "يا صم صم يا ثانوية" اللي ماحدش فينا كان فاهم إيه دي ولا اتعملت ليه ولا جت هنا منين؟ الأغنية دى كانت تتر المقدمة للسهرة الإذاعية "مش معقول.. ثانوية عامة" اللي تم إنتاجها سنة 1986، وبتحكي عن معاناة طلاب الثانوية العامة في مصر. من تأليف يوسف عوف وإخراج علوية زكي، وبطولة حسن عابدين وخيرية أحمد وعبد الرحمن أبو زهرة، وشارك فيها عمرو دياب بأغنية التتر ومجموعة أغانى تانية داخل السهرة.

ولو عايز تسمع الأغنية لوحدها، هتلاقيها هنا

3- أم مثالية:

واحدة من أكتر السهرات القريبة لقلبي، دراما بصورة هادية مريحة للعين ورتم مريح للنفس وأنت بتتفرج من غير توتر وقلق. بتحكي عن قصة أم غلبانة بتشتغل عاملة في مدرسة وبتكافح لتربية أولادها، اللي بيتعرضوا لصدامات اجتماعية في حياتهم العاطفية أو في شغلهم بسبب مستواهم الاجتماعي ووظيفة أمهم، وبتتعقد الأمور لما بيتم اختيارها كأم مثالية على مستوى الجمهورية، وأولادها منهم اللي بيرفض التكريم عشان ماحدش يعرف حقيقة أمهم ومنهم اللي بيفتخر بيها.

السهرة من بطولة هدى سلطان، معالي زايد، آثار الحكيم، ممدوح عبدالحليم، ومن إنتاج اتحاد الإذاعة والتليفزيون سنة 1981، تأليف وسيناريو وحوار وفية خيري، ومن إخراج إنعام محمد علي.

4- نص شقة :

من بطولة يحي الفخراني وسهير المرشدي. بتحكى عن عروسة وعريس بيعانوا من أزمة الإسكان اللي سيطرت على مصر في الثمانينات والتسعينات ومش قادرين يلاقوا شقة. السهرة قصة وسيناريو وحوار سلوى الرافعي ومن إخراج أبو اليسر أبو اليسر.

5- لقمة القاضي:

من تأليف أسامة أنور عكاشة وإخراج جمال عبد الحميد، وبطولة ملك الترسو فريد شوقي، زيزي البدراوي وسناء يونس، بتحكي عن مستشار عايش لوحده في القاهرة بعد ما طلع معاش و هاجر ابنه مع أسرته بره البلد، وبيحاول الأب يبدأ حياة جديدة في راحة بعيد عن القاهرة، فبيروح يأجر شقة في إسكندرية وهنا بتبدأ معاه تحديات حياته الجديدة.

6- الآنسة بوابة

سهرة تليفزيونية بتحكى عن قصة رانيا فريد شوقي اللى بتلعب دور بنت البواب اللي بتقرر تشتغل بدل أبوها وهي بتدرس في الكلية، بسبب إن سكان العمارة قرروا يطردوه بسبب مرضه، فبتشتغل هى بدل والدها علشان تحافظ على دخل الأسرة والأوضة الصغيرة اللي عايشين فيها فوق السطوح، وبتتعرض لمضايقات ومواقف كتيرة بسبب كونها آنسة وبوابة.

من بطولة رانيا فريد شوقي، عبد الله محمود، حسين الشربيني، أحمد السقا، ومن إخراج عماد سالم وقصة وسيناريو وحوار حسن المملوك.

7- لا وقت للخوف:

قصة بتدور في إطار درامي اجتماعي، بتحكى عن مشاكل بنت بتعانى من جوز أمها بسبب تحكمه فيها هي وأخواتها واللي بيحاول يجبرها تتجوز من شخص مابتحبهوش، فبتضطر تسيب البيت وتهرب وسط مواقف ومشاكل كتيرة بتقابلها. السهرة تأليق لينين الرملي، وإخراج عباس المصري ومن بطولة منال سلامة، طارق لطفي، محمود مرسي ونادية عزت.