اللى كتب ماماتش، واللى كتب مابيتنسيش حتى لو اللي كتبه ماتعرفش أوي، أو ماخدش حقه، وده لأن الكملة المكتوبة – خصوصًا لو مكتوبة حلو – لازم بتلمس اللى بيقراها وبتنطبع جواه بشكل أو بآخر، والكتابات العظيمة المخفية عننا أو اللي مانعرفهاش كتيرة وماتتعدش، لكن القليل منها ممكن أحيانا يفلت ويقع بين إيدينا شوية كلام فى سطور، لكن لما تقراه تفضل فاكره أكتر من حاجات كتير مشهوره واسمها معروف. متع عينك و دماغك معانا بـ 16 عمل من الأعمال الأدبية، سواء كانت مقال أو رواية، اتظلمت وماخدتش حقها، لكن أكيد هتستمتع بيها.

من وراء الغيم -  يوسف السباعي

على العكس من كتابات يوسف السباعي المشهورة اللى ليها طابع رومانسي شوية، الكتاب ده عبارة عن مجموعة من المقالات اللي اتكتبت في أوقات متفرقة وبتتكلم عن مصر بعد النكسة. الكتاب فيه تحليلات سياسية بسيطة برؤية السباعي عن علاقات مصر إسرائيل وأمريكا والاتحاد السوفييتي، وكمان عن بعض المفاهيم البسيطة عن عقلية العدو الإسرائيلي وإيه سببها من وجهة نظره.

في غرفة العنكبوت - محمد عبد النبي

بعد فترة قضاها هاني في السجن، بيخرج منه مصاب بخرس وبيفقد صوته، ومابيلاقيش صوته في حاجة تانية غير على الورق، فبيحكيله أسراره و ميوله اللي اتغيرت بعد ما قرر يكمل حبسة في أوضة فندق بيشاركه فيها عنكبوت، ياترى هيكتب إيه؟ الرواية  بتتكلم عن وضع المثليين في مصر وأسرار قضية الكوين بوت، ووصلت للقايمة القصيرة لجايزة البوكر. 

محمد عبد النبي هو روائي ومترجم مصري حصل على جائزة ساويرس الثقافية للرواية في دورتها التاسعة ومؤسس ورشة "الحكاية وما فيها" اللي بتهتم بتطويرالكتابة الأدبية. 

 قميص سماوي – محمد عمرو الجمال

من غير حرق أحداث، الرواية بتتكلم عن ظروف البلد اللي أدت لثورة 25 يناير وكمان قضة توريث الحكم. المميز في الرواية دي إنها رواية مكان بامتياز، لأن مدينة الكاتب هي الشخصية الأم في الرواية سواء بحضورها في السرد الذاتي أو وجودها في المستقبل كصدى أو رد فعل للأحداث الكبرى في الشارع المصري.

محمد عمرو الجمال كاتب منوفي بامتياز، فاز بالجائزة الأولى عن الرواية فى المسابقة المركزية لقصور الثقافة، وبيشتغل جيولوجي فى واحدة من شركات البترول في المنوفية.

 الرسائل - مصطفى ذكري

"أكتب لك بعد أربع ساعات من زمن المكالمة. الساعة الآن الثالثة صباحا. أستعيد صوتك أثناء المكالمة بتعب يشبه السعادة المصحوبة بيأس مطلق، مفاده أنني هنا وأنت هناك دون أن تعني تلك الحقيقة شيئا آخر وراءها، حقيقة لا هي عادلة ولا هي ظالمة. أعددت نفسي للمكالمة قبل شهرين، وعندما جاء صوتك علي التليفون تعثرت في فمي الكلمات، وظهر في الحال العداء بين الوقت والرغبة. تخيلت أن إهدار زمن المكالمة في صمت هادىء -يتخلل بدعة مسافات بين الكلمات كما كان يحدث بيننا في زمن آخر- سينفي ضيق الوقت. وبينما كانت الرغبة في اتساع دائم كان الوقت في ضيق مستمر"

مالقيتش وصف أفضل للرواية من وصف الكاتب نفسه. مصطفى ذكري اللي للأسف مش واخد حقه الكافي من الشهرة، تخرج من المعهد العالي للسينما 1992 شعبة سيناريو. كتب فيلم "عفاريت الأسفلت" ونال الفيلم بعض الجوائز، منها جائزة السيناريو في مهرجان الفيلم الأفريقي بجوهانسبرج.

الحقائق القديمة صالحة لإثارة الدهشة- يحي الطاهر عبد الله

 الرواية فيها إسقاطات سياسية كتيرة، فيمكن تحتاج تقراها أكتر من مرة عشان المعنى المقصود يوصلك. أسلوب الكتابة هتحسه جديد ويمكن تحس نبرة الكتابة كئيبة شوية لكنها ممتعة.

 يحيى الطاهر عبد الله  بيعتبر "شاعر القصة القصيرة" وواحد من أبرز أدباء فترة الستينيات، وكانت من أبرز أعماله "الطوق والأسورة" والتى تحولت لفيلم درامى عام 1987، من إخراج خيرى بشارة، وبطولة عزت العلايلى، شريهان". اتولد في الكرنك- محافظة الأقصر سنة 1938. الرواية اترجمت للإنجليزي والألماني والإيطالي والبولندي. 
 

الواجهة- يوسف عز الدين عيسى

الرواية  بتبحث في قضية الإنسان الشريف اللي بيعتنق قيم ومبادىء ويعتقد أن العالم كله زيه بيعيش في الواجهة دى، وإن كل الناس أصحاب أخلاق ومبادئ زيه، بس هل ده حقيقي فعلا؟ دكتور "يوسف عز الدين عيسى"  بيعتبر من الكُتاب اللي ليهم مدرسة خاصة في الكتابة القصصية، بحيث يخلط الواقع والخيال بشكل رمزي وبيعتبر من الأدباء اللي أسسوا مدرسة جديدة في الكتابة بأسلوبه المختلف.

طشاري- إنعام كجه جي

 "هل الأفضل أن يعيش الإنسان في وطنه، مسقط رأسه، بين أهله وكل ما نشأ عليه وألفه حتى وإن كان ذلك يعني بقاءه تحت وطئة الحرب، يتربص به الموت وتحوم حوله الأحقاد؟"

لو لقيت نفسك قدام اختيارين، تعيش في بلدك وتموت، أو تهاجر وتعيش بعيد عن بلدك.. هتختار إيه؟ ده السؤل اللي هتحطه قدامك "إنعام كجه جي"، روائية وإعلامية وكاتبة عراقية عايشة في فرنسا من سنين طويلة، بتشتغل في الصحافة والترجمة واترشحت مرتين لجائزة البوكر العربية (القائمة القصيرة) للروايتين "الحفيدة الأمريكية" و "طشاري".

 كل أحذيتي ضيقة – عادل أسعد الميري

 تخيل معايا إن العالم كله مصنع أحذية، وإن الأحذيه دي هي أحلامك، وإن الأحذية دي برضه أصغر من مقاسك، بس أنت مضطر تمشي بيها، رجلك وجعتك صح؟ الرواية أشبه بالسيرة الذاتية، لكنها مختلفة شوية، لأنك ممكن تلاقي نفسك فيها، فتحس إن الكاتب بيتكلم عنك مش عن نفسه.

عادل أسعد الميري هو طبيب وأديب ومترجم عن الفرنسية، أصدر خمس  كتب هي "القارئ الفضي" 2004، و"القارئ الجالس القرفصاء" 2005، و"تأمّلات جوّال في المدينة" و"الأحوال" 2006، و"تسكّع" 2008، ويعد كده السيرة الذاتيّة شبه الروائيّة "كلّ أحذيتي ضيّقة" اللى صدرت عن دار ميريت سنة 2010.

 دروب المنفى – فيصل الحوراني

الكتاب ده هو الجزء الأول من خماسية "دروب المنفى"، اللى بيحكي فيها الكاتب شهادته عن الأحداث الفلسطينية من أواخر التلاتينات ولحد أواخر السبعينات. المجلد الأول صدر سنة 1994 واتحصرت نشرها في فلسطين بس، فالروية ماوصلتش للجمهور العربي. في الرواية دي هتقرأ حكايات من فلسطين بنظرة فلسطينية خالصة للأحدث، لكاتب هو في الأساس اشتغل في التدريس لحد سنة 1964 وبعدين في الصحافة لحد سنة 1971 وبعد كده اتفرغ للعمل في أجهزة منظمة التحرير الفلسطينية، من سنة 1979 بيشتغل باحث في مركز الأبحاث الفلسطيني في بيروت.
 

 دفاتر الطوفان- سامية خريس

الرواية كلها بتدور حوالين مكان اسمه ( الخربقة) وهو مكان افتراضي يشبه كتيرمن الأماكن اللى بتزورها الكاتبة عشان تدور على تفاصيل حياتها الاجتماعية والسياسية اللي بتحصل في "دارفور"، وتعرف أكتر عن تفاصيل مجمتمع العالم العربي مابيعرفش عنه كتير.

اتولدت الكاتبه في عمان وحصلت على جائزة الدّولة التشجيعيّة في الآداب عن روايتها شجرة الفهود/ تقاسيم الحياة عام 1997 وجائزة أبو القاسم الشابي من تونس عام 2004 عن روايتها دفاتر الطوفان، و2007 حصلت على جائزة الفكر العربي للإبداع العربي.

ألواح ودسر- أحمد  خيري العمري

أول ما تبدأ تقرأ الرواية، هتحس إنها عن  سيدنا نوح  وسفينته اللي أنقذت الإنسانية من الطوفان، والقصة اللي كلنا عارفينها، لكن فجأة هتلاقي نفسك جزء من القصة دي وإن الواقع كله هو امتداد لأحداث الطوفان، وكأن القصة دي مانتهتش، لكن كل الل حصل إن شكل السفينة اتغير. أحمد خيري العمري باحث مهتم بفكر النهضة المستمدة من الثوابت القرآنية، اتولد في بغداد سنة 1970 لأسرة أصلها من الموصل وتخرَّج من كلية طب الأسنان جامعة بغداد عام 1993. أصدر كتابه الأول "البوصلة القرآنية" سنة 2003. 

غريب النهر-  جمال ناجي

الرواية بتحكي عن الواقع الفلسطيني، من خلال عيلة "إسماعيل أبو حلة" ونزوحه هو ومراته وأولاده من قرية "العباسية" القريبة من "يافا"، وتحوله إلى لاجئ في غور الأردن. جمال ناجي هو روائي من أصول فلسطينية، كتب أول رواية له سنة 1977 بعنوان (الطريق إلى بلحارث).

الموت يمر من هنا- عبده خال

غالبا مش هتقدر تسيب الرواية دي من إيدك وهتخلصها في قعدة واحدة، الرواية ملهمة جدًا وهتديلك أمل في وسط الخوف اللي بقى يسكنا كلنا رغم نبرتها الكئيبة، يعنى هتبقى رواية مش هتنساها. الكاتب حاليا بيشتغل مدير تحرير جريدة "عكاظ" السعودية وفاز بالجائزة العالمية للرواية العربية - البوكر سنة 2010.

سيرة الزوال – هاني القط

الرواية فازت بجايزة الشارقة سنة 2010 وبتتكلم عن النظرة الوجودية لرحلة الإنسان مع الحياة والموت، من خلال مواقف مختلفة بيتعرض ليها "صالح" شخصية الرواية الأساسية.

هانى القط اتولد في شبين الكوم- المنوفية، كتب السيناريو لثلاثة أفلام تسجيلية هي: (الفواخرية)، و(العازف)، و(ظل النخيل)، وله سيناريو لفيلم طويل ينتظر الإنتاج وله روايتين هما "سيرة ازوال" و"رايات الموتى".   

خارطة الحب – أهداف سويف

العمل ببساطة يقدم لك أحداث فترتين مهمين في تاريخ مصر الحديث، الفترة بعد الاحتلال الإنجليزي على طول و نهاية الألفية والتطورات اللى حصلت في المجتمع المصري، وازاى الظروف اتشابهت في المرحلتين دول. أهاف سويف هي كاتبة مصرية بتعيش بين القاهرة ولندن، لها رواية تانية بالانجليزي اسمها "عائشة" وأصدرت رواية مشهورة اسمها «في عين شمس» سنة 1992 من 800 صفحة.

غارب – محمد عبد القهار

الرواية بتحكي قصة موسى بن أبي غسّان، الفارس الأندلسي اللي قاد جيوش غرناطة أثناء حصارها الأخير، طفولته وشبابه وازاي مسيرته امتدت من "غرناطة" و"ألمرية" و"مالقة" و"جبال بُشرة"، وامتدت لحد "فاس" المغربية، ورجعت بيه في النهاية ل"غرناطة"، نفس المكان اللي بدأ فيه. محمد عبد القهار هو كاتب ومهندس مصري، من مواليد القاهرة، نشر روايته الأولى :"سراي نامه: الغازي والدرويش" في يونيو 2013، ونُشر له رواية "غارب" في يناير 2011.