اختيار المدرسة اللي هدخل أطفالك فيها هو واحد من أصعب القرارات اللي ممكن الأهالي ياخدوها، وفي مصر تحديداً الحوار دا اصعب. نظام التعليم الحكومي في مصر بايظ من زمان وبيتم تصنيفه كواحد من أسوء نظم التعليم في العالم وعلشان كدة مبيبقاش في حل قدام الأهالي غير انهم ينقوا مدرسة بتقدم تعليم مش محلي. بعد ساعات من البحث ومكلمات التليفون الغريبة اللي مش محتاجين نحكي تفاصيلها قدرنا نعمل قايمة بأغلي ١٢ مدرسة في مصر، ممكن يكون في حاجات وقعت مننا بس للاسف الوصول لمعلوامت عن مصاريف الأماكن دي كان شبه مستحيل.

 (Cairo American College (CAC

المدرسة اللي عمرها ٧٠ سنة بتقدم واحدة من أفضل المناهج الأمريكية التعليمية واللي بتكلف مبالغ خزعبلية وموجودة في منطقة دجلة في المعادي، المدرسة بتاخد 23,600$ في فترة الKG لحد سنة ٥ من أول سنة ستة لحد تانية اعدادي بتاخد 24,100$ وبعدها بتزيد في الفترة من تالتة اعدادي لحد تالتة ثانوي لحد ما توصل 24,300$ يعني عشان تدخل ابنك او بنتك CAC محتاج حوالي 310,400$ واللي بيساوي بالمصري تقريبا 5.5 مليون جنية مصري وبكدة تبقي CAC تستحق لقب أغلى مدرسة في مصر .

Schutz American School

Schutz تم تأسيسها سنة ١٩٢٤ وهي تعبتر أقدو مدرسة أمريكية في أفريقيا وبتطلب 10,23$ كمصاريف لمرحلة الحضانة وتبتدي تعلى ببطء لحد ما بتوصل ما بين 11K$ لحد 13k$ لحد سنة تانية اعدادي، بعدها بقي بتحتاج تدفع 14,515$ لأخر كام سنة يعني بالميت كدة محتاج 166,309$ واللي بالمصري بيساوي حوالي ٣ مليون جنية.

Metropolitan School

المدرسة دي أسستها أسرة بعد ٦٠ سنة من الخبرة في التعليم، المدير الأسبق للمدرسة فؤاد حبيب تم تكريمه بجايزة رائد شرفي في التعليم الخاص من قبل الرئيس محمد أنور السادات سنة 1979. المدرسة بتطلب 68K جنية مصري في فترة الحضانة وبتزيد ٢ لـ٣ ألف كل سنة لحد ما سنة التخرج بتكمل تقريباً 92 الف جنية مصري، يعني حط في اعتبارك أنك هتحوش مليون جنية مصري عشان تدخل أولادك المدرسة دي.

Malvern College Egypt

المدرسة دي فتحت في مصر في بداية التسعينات وجابت معاها التعليم البريطاني بجودته اللي كلنا عارفينها بس الموضوع مرسيش علي التعليم بس جابت معاها كمان الأسعار! المدرسة-هتلاقيها علي يمين الدائري- بتاخد ١٥٠ الف جنية مصر عشاني الحضانة وأخر سنين بيكلفوا حوالي ١٩٠ الف جنية يعني محتاج ٢ مليون جنية توتو علي كبوتو عشان تعلم ابنك هناك.

 Pakistan International School in Cairo (PISC)

المدرسة اتبت عام ١٩٨٢ عشان تخدم الباكستانين اللي عايشين في القاهرة، المدرسة بتقدم واحد من أفضل نظم التعليم في البلد بس كل حاجة وليها تمنها. بتبدي ب4,875$ للحضانة وبتوصل 9,750$ في أخر سنة ودا معناه أن مجمل الفلوس اللي محتاج تدفعها في كل السنين هيوصل حوالي مليون ونص جنية مصري.

Canadian International School of Egypt (CISE)

المدرسة دي بقي بتقدم واحد من أفضل نظم التعليم الكندية واللي بتكلف حوالي 65 الف جنية مصري لفترة الحضانة وبتنتهي ب١٠٣ الف جنية مصري في السنين الأخيرة يعني المجمل حوالي 1,111,000 جنية مصري، الرقم خضنا احنا كمان والله.

 International School of Choueifat

المدرسة لبنانية وليها شبكة من أكتر من حرم جامعي، وبتقدم خدمات تعليمية مرتفعة على مستوى العالم، ومصر فيها فرعين واحد في القاهرة الجديدة والتاني في مدينة ٦ أكتوبر. مصاريف المدرسة بتوصل ل٥٣ الف جنية في فترة الحضانة وبتزيد بالتدريج لحد ما توصل ل١٠١ ألف جنية مصري. تكاليف التعليم في المدرسة دي بتوصل حوالي ١،١٣٧،٦٣٨ جنية وبردوا الرقم يخض بس معلش استحملونا للأخر.

British International College in Cairo

بالرغم أن المدرسة تم تأسيسها من سنتين بس لكن مؤسسة التعليم البريطاني العظيمة دي بتقدم نظام بريطاني مكثف من أول فترة ما قبل المدرسة لحد الثانوية العامة وبتبتدي من ٧٢ ألف جنية للحضانة وبتوصل ١١١ ألف علي تالتة اعدادي وبتعلى تاني لـ١٣٨ ألف جنية في أخر سنتين واللي هيكلف في مجمله ١،٤١٤،٠٠٠ وانشاله ما عن حد حوش عادي يعني.

Hayah International Academy

مصاريف المدرسة دي بقي بتتميز كدة بانها واحدة من المدارس القليلة اللي بتطلب جزء من المصاريف يدفع بالدولار. المصاريف بتبقي ٣٢،٢٢٠ جنية لKG1 ومعاهم ٢٧٤٥ $  وبتنتهي بـ50,570 جنية مصري ومعاهم 4,305$ للسنين الأعلى. يعني في المجمل حوالي مليون جنية أو تحديدا 950K جنية مصري.

British International School in Cairo (BISC)

المدرسة أتأسست عام 1976 وهي واحدة من أعرق المدارس في القاهرة ودا ممكن يبقي مبرر شوية لأسعارها اللي بتبدأ من 5,702$ في الترم للحضانة وبتنتهى بـ8,352$ في السنة الأخيرة يعنيكل السنين هتقف حوالي 107,304$ ودا بيساوي بالمصري حوالي 1,947,889 جنية مصري.

New Cairo British International School (NCBIS)

دي المدرسة الوحيدة في مصر اللي بتقدم برنامج هولندي بجانب النظام البريطاني وبتكلف 6,381 يورو لفترة الحضانة وبترتفع لـ 11,685 يورو في السنين الأخيرة يعني مجمل السنين هيكلف 148,085 يورو واللي بيساوي بالمصري حوالي 3,451,231 جنية مصري.

Lycée International Balzac 

المدرسة دي هي المدرسة الوحيدة بالنظام الفرنسي اللي نجحت تخش القايمة بتاعتنا، المدرسة-واللي مكانها في القاهرة الجديدة- بتكلف 35K جنية للحضانة ولما نبتدي نخش في السنين الجد بتضاعف المصاريف وتوصل 65K جنية في سنة التخرج يعني لو أب عايز يدخل ابنه المدرسة دي هيتكلف 775K جنية مصري للطالب الواحد.