الأفلام واحدة من أعظم اختراعات البشرية، بتحكيلك قصص وتسفرك بلاد وتحببك فى ناس وتكرهك فى غيرهم وأنت قاعد مكانك، لكن كمان الأغاني تقدر تدخلك في حالة معينة وتلمس إحساسك وذكرياتك، وتقدر تبكيك أو تضحكك وترقصك في دقايق قليلة. أغاني الأفلام من العشرينات أو حتى من قبل كده، هي الحاجة اللي بتسند أي فيلم أو خلينا نقول تكمله. لكن زي ما التلميذ أحيانًا بيتفوق على أستاذه، في أغاني من حلاوتها اتفوقت على الأفلام اللي اتعملت فيها وبقت هي النجم. دى ليست هتفكرك بـ 7 أغانى كلت الجو من الأفلام اللى اتعملت فيها، حبيناها وبنسمعها رغم إننا ممكن نكون مش فاكرين الفيلم بتاعها، أو حتى مش عارفينه، أو بنحاول نتناساه من كتر ما هو وحش.

1- قلب واحد:           

أغنية رومانسية تقريبًا ماحدش مايعرفهاش، وكانت نجمة لرقصة "السلو" في الأفراح وقت ظهورها. غناها بطل أغانى الأفلام في فترة الألفينات مدحت صالح، اللي كل أغاني الأفلام والمسلسلات كانت لازم تنزل بصوته. الأغنية كانت لفيلم "غرفة 707"، دورنا عليه عشان نفتكره، لاقيناه من بطولة مجدى كامل ورولا سعد وإنتاج سنة 2010.

دى كنت تجربة التمثيل السينمائية الأولى والأخيرة لرولا لحد دلوقتي –سجدة شكر-، الفيلم يمكن ماحدش فينا فاكره لكن أنا شخصيًا ممتنة ليه، لأنه قدملنا أغنية بالجمال ده وعرفنا من خلال الأغنية، ملحن شاب موهوب جدًا اسمه "أحمد حمدي رؤوف"، اللي رغم سنه اللي مايتعداش 30 سنة، قدم ألحان لفنانين كبار زي علي الحجار في أغنية "ست الكل"، وقدم لمحمد منير لحن أغنية "أنا منك اتعلمت".

2- عمرى إيه:

دويتو جمع بين اتنين من نجوم الغناء في مصر، إيهاب توفيق ومدحت صالح، أغنية بتحكيلنا حكاية شابين في 3 قايق ونص، بلحن جميل وكلمات بسيطة وواقعية. الأغنية من فيلم "عجميستا" اللى بتدور قصته عن شابين من طبقات اجتماعية مختلفة هدفهم واحد وفي نفس الوقت بيحاولوا يوصلوله بطرق مختلفة.

الفيلم من بطولة خالد أبوالنجا وشريف رمزي وإنتاج سنة 2007 وماحققش نجاح كبير قصاد أفلام تانية اكتسحت موسم السينما في السنة دي، زي فيلم "هي فوضى"، وأغنيته "هو أنتي ليه بعيدة كدة"، غناء ممدح بيرم وألحان الموسيقار ياسر عبد الرحمن، وفيلم "أنا مش معاهم" اللي حقق نجاح كبير بأغنيته اللى بنفس الاسم وغناها بهاء سلطان، من كلمات بهاء الدين محمد وألحان محمد مصطفى. 

3-  ماقدرش أقول:

أغنية جميلة بقصة حلوة من فيلم قصته معتادة و مكررة، نجحت نجاح كبير وقت نزولها ولحد دلوقتي الناس فاكراها، وفي معظم الأوقات بتبقى هي أول أغنية في بلاي ليست أي بنت فسخت خطوبتها أو سابت الولد اللي هي مرتبطة بيه. الأغنية من كلمات الشاعر بهاء الدين محمد ، وألحان محمد الهادى.

أما الفيلم هو فيلم "90 دقيقة"، من بطولة سامو زين، غادة عبدالرازق وزينة والفيلم بيتكلم عن ولد غني "سامو زين"، أهله بيرفضوا ارتباطه ببنت فقيرة "زينة" فبيتفقوا مع بنت تانية "غادة عبد الرازق" علشان توقعه في حبها، لكن بيحصل العكس وبتحبه هي. الفيلم من إنتاج سنة 2006.

4- أجدع صحاب:

أغنية تانية لسوما، لحد دلوقتي مابطلتش تشتغل في الأفراح بين العروسة وصاحباتها، وفي حفلات التخرج وأعياد الميلاد، من كلمات أيمن بهجت قمر وألحان محمد يحيي. الأغنية من فيلم "أعز أصحاب" اللي تم إنتاجه سنة 2009، بيحكى عن مجموعة صحاب بيتقابلوا للمرة الأولى بعد 10 سنين وبتحصل بينهم شوية مشاكل. ممكن تكون ماشوفتش الفيلم بس أكيد عارف الأغنية.

5-  كلامي انتهى:

من كلمات ملاك عادل وألحان محمد عبد المنعم وغناء أحمد سعد، نجحت جدًا وقت صدورها وكانت hit بنسمعه في كل حتة، وحبيتها أكتر لما سمعتها من أصالة وأنغام وأحمد سعد مع بعض في حلقة من حلقات برنامج "صولا". الأغنية من فيلم "محترم إلا ربع"، وده فيلم من الأفلام اللي عمل بطولتها محمد رجب، ليه وامتى؟ الله أعلم. 

الأغنية من برنامج صولا 

6- الأيام:

من كلمات سامح العجمى وألحان أشرف سالم، غنت سمية "الأيام"، اللى بتحكي فيها ازاي الدنيا سلف ودين وإن الأيام مابتنساش. أغنية حلوة بصوت اتعرف بالشجن. الأغنية من فيلم "كشف حساب"، تأليف محمد رفعت وإخراج أمير رمسيس. قصة الفيلم عن سها اللي بتشتغل في مجال رسم الوجوه الجنائية في الشرطة، وبتسيب جوزها وتروح تعيش لوحدها فبتقابل فريد وبتبدأ بينهم قصة حب، لكن لما المباحث بتطلبها علشان ترسم وصف لصورة واحد متهم في قضية اغتصاب، بتكتشف إن المجني عليها وصفت فريد. الفيلم من بطولة خالد أبو النجا، نور، أميرة العايدى، بسمة وراندا البحيري، إنتاج سنة 2007.

7- البلياتشو:

أغنية كمان للفنان مدحت صالح، من كلمات أيمن بهجت قمر وألحان محمد يحيى. الأغنية فيها واحدة من أشهر الجمل اللي تقريبا كل الشعب المصري مافهمهاش أول مرة سمعها: "الزمن لطشوه أفاه فحرقه بجاز". الأغنية من فيلم "البلياتشو"، قصته بتحكي عن بلياتشو سيرك اكتشف إنه متهم في قضية قتل، اتسبب فيها واحد من زمايله اللي كانوا معاه في السيرك، بعد كده بيهرب البلياتشو من القسم علشان يحاول يثبت برائته. الفيلم من تأليف محمد الفقي وعماد البهات ومن إخراج عماد البهات برضه، بطولة فتحي عبد الوهاب، هايدي كرم، عزت أبو عوف وأحمد راتب، ومن إنتاج سنة 2007.