في سنة 1999 أسست كريمة منصور فرقة "معت" وهي أول فرقة مستقلة للرقص المعاصر في مصر، بتدعم مشهد الرقص المعاصر وبتقدم تجارب مختلفة وعروض بتعرف الناس أكتر بالرقص اللي بدأ في العالم في القرن العشرين، وكريمة منصور هي راقصة ومصممة ومخرجة مصرية، حصلت على البكالوريوس ودرجة الماچيستير في الرقص المعاصر من  London Contemporary Dance School، بعد ما خلصت دراستها في المعهد العالي للسينما في القاهرة، أما عن معت او ماعت فده اسم آلهة الحق والعدل عند الفراعنة، وبيتم الرمز ليها بشكل سيدة فوق رأسها ريشة نعام، أو رمز الريشة فقط، ولأن معت كانت بتتحكم في فصول السنة كمان اتقال على مصر زمان "أرض النيل والمعت".

الرقص المعاصر مش فن للنخبة ولا منعزل عن الشارع، لكن هو جزء منه، وكل واحد بيطلع على المسرح هو بطل، والعرض جزء من حياته، ولأننا كنا محتاجين نعرف الرقص المعاصر اكتر في مصر، فبعد تكوين فرقة "معت" اسست كريمة منصور مركز القاهرة للرقص المعاصر CCDC اللي بيخرج ناس بعد دراسة 3 سنين يقدروا يرقصوا ويصمموا ويخرجوا عروض، وبيقدم كمان ورش ومحاضرات وفعاليات مختلفة، وبعد كل السنين دي هترجع فرقة معت تنطلق تاني في 10 مايو الجاي هيتم اطلاقها عشان تخرج ويبقى احتفال بيليق بإطلاق "فرقة معت للرقص المعاصر"، وهيكون فيه 3 عروض مختلفة في الفترة ما بين 10 مايو ولحد 15 مايو 2018 الساعة 8 مساءً في مسرح الفلكي والدخول مجانًا، وهيشارك في العرض خريجي وطلبة برنامج الرقص المعاصر الإحترافي.

عرض "كريدو"

هيتعرض يوم 10، 11، 13، 14، 15 مايو 2018.

ماذا يعني أن يتوقف أحدهم عن الدوران؟ عن الالتزام بالدور الميكانيكي؟ 
كخطأ في ماكينة يترك أثراً مستقبلياً على كامل خط الانتاج، أن تندمج في الجموع، أن تتلاشى في الجموع، أن تحافظ على البحث عن أٌقل قدر ممكن من إمكانية تحديد هويتك، أن تؤمن بأن الإختفاء هو سبيل للهروب من تحديد الهوية، إحساس التيه بعد التشظي الناتج عن المواجهة.
الالتزام، يخلق اعتياداً ينتج عن التكرار والإعادة، ذلك الاعتياد يصعب على الفرد تجاوزه أو كسره بسهولة، ويخلق فيما بعد رغبةً في الاستمرار حتى ولو كان ذلك الاستمرار، استمراراً رتيباً ومرهقاً؛ الهزائم المتتالية المصاحبة لذلك الاستمرار تخلق حالة من التشظي.
العرض مستوحى من عرض قدمته كريمة منصور في ألمانيا سنة 2005 مع 5 راقصين من هناك.

العرض فكرة وتصميم وإخراج: كريمة منصور 
تطوير حركي: كريمة منصور بالتعاون مع العارضين/ات
ملابس: نرمين سعيد 
مدير تقني ومصمم إضاءة: سعد سمير
إنتاج: معت للرقص المعاصر
والعارضون: إبراهيم عبدالحميد، أحمد شامل عزمي، أماني عاطف، سمر عزت، شادي عبدالرحمن، إسلام النبيشي، إسلام العربي، حنين طارق، مصطفى جمال،أمينة أبوالغار

لاس بيرنارداس
هيتعرض أيام 12، 13، 14 مايو 2018

العرض مستوحى من مسرحية للكاتب الإسباني فردريكو غارسيا لوركا، «بيت برناردا آلبا»، اللي بتبحث فيها " ليبرتاد" مع باقي الأبطال عن العلاقة اللي نشأت بين خمس شقيقات عايشين سوا، الأفكار والتأملات والتفسيرات والكلام اللي بيدور بين 3أجيال مختلفة عايشين فترة حداد 8 سنين هي أساس العرض.
ومن خلال إنتاج مسرحي في شكل كولاج، العارضات الخمسة على خشبة المسرح بيدعوا الجمهور يعيشوا حكايات مالهاش نهاية.

تصميم وإخراج: ليبارتد بوزو
موسيقى: بلقيس رياض
ملابس: نرمين سعيد 
مدير تقني و مصمم اضاءة: سعد سمير
إنتاج: معت للرقص المعاصر 
والعارضات: أماني عاطف، بلقيس رياض، مريهان سامي، منى الحسيني، نرمين حبيب.

من قال شيئاً عن الرقص؟
عرض فردي لـ كريمة منصور 

هيتعرض أيام 11، 12، 15 مايو 2018
العرض مستوحى من مواقف مختلفة متعلقة بهوية الفنان والتفاصيل الخاصة بالعملية الإبداعية، وبيناقش ايه قيمة الفن؟ هل الهدف هو الترفيه ولا طرح أسئلة؟ واللهجة الساخرة في العرض ده بتقول إن دايمًا فيه تفاصيل بين السطور.

العرض تم إنتاجه سنة 2015 واتعرض أول مرة في فرنسا لافتتاح متحف اللوفر في مدينة لينس، واتعرض في لشبونة في البرتغال كجزء من مهرجان Cumplicidades وتم اختياره كواحد من أفضل 10 أعمال تمت مشاهدتها في البرتغال عام 2016.

فكرة وتصميم وإخراج: كريمة منصور
نص: كريمة منصور
مدير تقني ومصمم إضاءة : سعد سمير
إنتاج :
باليه دي نورد (فرنسا)
فرقة معت للرقص المعاصر (مصر)

مستنينك تحضر وتكون هناك وتعرف يعني ايه رقص معاصر وتلاقي نفسك وتحررها بالرقص، ممكن تعرف أكتر من صفحة الإيفنت على فيسبوك، أو صفحة مركز الرقص المعاصر على فيسبوك أو انستجرام، وصفحة معت.