كلنا عارفين "تيندر" اللي بيعتبر أشهر موقع “مواعدة” لحد دلوقتي، تيندر وصل ل٣ مليار تقييم. الوضع في الوطن العربي مختلف شوية، حيث المواعدة أو الdating ليها أصول مختلفة، رواد أعمال كتير انتهزوا الفرصة دي وعملوا أبلكيشنز تناسب الوطن العربي، بداية من أبلكيشنز المواعدة الحلال لحد التعدد. 

من الحاجات القليلة اللي مابتقذمش أو الناس تزهق منها هي الdating، وده اللي خلى انتشار تيندر شئ مش مفاجئ لناس كتير. تيندر بنى سمعة كموقع ناس كتير بتلجأله علشان تقضي مصلحة سريعة وسهلة وبالرغم من كدة، دا مامنعوش إنه يبقي أكتر أبلكيشن dating اتعمله داونلود في العالم كله. 

في محاولة للاستفادة من شعبية تيندر، مطوريين كتير سعوا إنهم يعملوا مواقع dating تكون مناسبة لظروفهم اللي ممكن تكون جغرافية، ثقافية أو دينية. كتير من الdating أبلكيشنز اللي اتصممت في الوطن العربي خدت الثقافة في الاعتبار، يعني مثلاً حطوا شوية قواعد تخص الدين وقيوده أو الخصوصية. علشان كدة احنا جمعنالكم مجموعة من الdating أبلكيشنز في الوطن العربي، الموضوع ممكن يبان كيوت في بعض الأحيان بس أحيانًا تانية بيتحول لكونه مثير للجدل.

Matchmallows 

الأبلكيشن دا معمول بشكل مختلف علشان يقدر يقاوم الفكرة السطحية في الاعتماد على الصور على عكس تيندر. مؤسسين الأبلكيشن-اللي هم ٣ أصدقاء لبنانين متزوجين- طوروا سلسلة من الأسئلة اللي بتحلل الشخصية علشان تساعد الناس يبنوا حساب شخصي يعبر عنهم، وفكرة إنهم يحطوا صورة ليهم مش شئ إجباري. المطابقة بين الناس أو الmatching بتعتمد على الطريقة اللي الناس بتجاوب بيها الأسئلة اللي عن شخصيتهم، وبيحطوا ليهم نسب توافق. من أهم مميزات الآب ده، التركيز على الخصوصية، مافيش أي ضغط على الناس إنهم يحطوا صورهم أو أي تفاصيل محددة أوي عنهم. الأبلكيشن دا مجاني، بس لو مقتنع أوي بالانجذاب العكسي، ممكن تدفع 9.99 دولار في الشهر علشان تشوف أقل ناس مطابقة ليك.

2- wango

الأبلكيشن ده بقي عارف الستات عايزة إيه أو هم بيقولوا كده. wango هو أول أبلكيشن تكون المؤسسة بتاعته ست ومعمول بوجهة نظر نسائية بلمسة فنية تخلي الرجالة يبقوا جنتل أكتر. جوليانا صميدة اللبنانية، قررت تعمل أبلكيشن يبقى فاهم الستات في ماركت بيحتله الرجالة. الأبلكيشن أخيرًا هيدي فرصة للستات يدورا على الرجالة اللي بيحلموا بيهم، ويجبر الرجالة يلتزموا بقيود معينة. صميدة بتقول إن الرجالة اللي بيسيئوا التصرف بيتم حجبهم من الموقع. اللي بيخلي الأبلكيشن دا مختلف عن غيره -غير القيود اللي بتتحط على الرجالة- هو الطريقة اللي بينظم بيها المواعدة أو الdating. الأبلكيشن دخل شمال أفريقيا في أول ٢٠١٦.

3. Sila Match

رحب معانا بأجدد نسخة من تيندر بس بالحلال! الأبلكيشن اتعمل في مايو ٢٠١٧ واستهدف الوطن العربي أو الشرق الأوسط، الإعلانات بتاعة الأبلكيشن بتاخد وجهة مرحة شوية، وبتلعب دور الوسيط بين نظام المواعدة الحديثة وبين الزواج المترتب اللي معروف عنه الانتشار في الوطن العربي، بمعني أصح جواز الصالونات. إيه اللي بيميز الأبلكيشن ده؟ الستات عندهم اختيار إنهم يخبوا صورهم والأبلكيشن بيسأل مستخدمينه مجموعة من الأسئلة علشان يقارن كل المطابقات المحتملة. أسئلة التوافق ممكن تكون حاجة زي “تحب شريكك يتصل بيك كام مرة؟” بس الموضوع اتطور شوية وبقى في أسئلة زي “هل أنت مقتنع إن المفروض الرجالة بس تشتغل والستات تقعد تربي الأولاد في البيت؟”. البعض ممكن يستعجب ويشوف السؤال عنصري جدًا بس في النهاية كل واحد دماغه مريحاه، وطالما دا هيساعد اتنين رؤيتهم متشابهة يلاقوا بعض، خلاص فين المشكلة؟

٤-  wesal

وصال هو أول أبلكيشن من نوعه في قطاع غزة المعروف عنها التحفظ الديني، حيث تيندر والأبلكيشنز المشابهة ليه محجوبين. مؤسس الأبلكيشن هشام شيخة عنده ٣٣ سنة، أطلق الأبلكيشن في مارس ٢٠١٧، وبعد ٦ شهور بس من إطلاق الأبلكيشن، كان نجح في إتمام ١٦٠ جوازة، ودا رقم مش قليل بالنسبة لأبلكيشن في منطقة محدودة وبظروف معينة في فترة قصيرة.

إيه اللي مخلي الأبلكيشن ده مثير للجدل؟ وصال من المفترض إنه ابلكيشن للمواعدة الحلال وتطبيق نفس القواعد التقليدية القديمة للجواز، بالإضافة لإنه بيسمح للرجالة يدوروا على زوجة تانية وتالتة ورابعة، وبيدي مساحة للستات يختاروا ما بين راجل أعزب أو متزوج.

الأبلكيشن فتح طريق قدام الستات الأرامل إنهم يلاقوا أزواج، لأنه من الصعب يقابلوا حد في الحياة العادية، أو على الأقل مش هيبقى بالبساطة دي. مستخدمين الأبلكيشن بيكتبوا معلومات أساسية عن نفسهم زي السن، المهنة، المرتب، عدد الأطفال، لكن عملية الاختيار مش بتتضمن صور أو أي محادثات بين الطرفين. لما يحصل قبول بين طرفين أو يبقي في اهتمام متبادل، من المتوقع إن العريس المحتمل يروح بيت أهل العروسة خلال ٤٨ ساعة، لو ماعملش كدة بيتم حجبه من الموقع.

5- Muzmatch

الأبلكيشن شبه تيندر بس مش أوي، أسسه شزاد يونس وريان برودي، الأبلكيشن أطلق لأول مرة في المملكة المتحدة، بس بدأ يتوسع لمناطق تانية في العالم ومنها الشرق الأوسط، باعتباره سوق مهم ومليان مسلمين. السبب في نجاح Muzmatch المستمر - أكتر من ٦٠٠ جوازة ولسه- إن التفاعل عليه مش زي تيندر خالص. الأبلكيشين بيطلب من المستخدمين إنهم يعملوا بروفايل مفصّل عنهم علشان يحسن من اقتراحات التوافق. الستات عندهم اختيار إنهم يخبوا صورهم علشان الخصوصية، وممكن المستخدمين يدوا تقييم لتفاعلهم مع الآخرين، وده بيشجعهم يتصرفوا بشكل لطيف. واحد من المؤسسين بيقول إن الأبلكيشن مش لحاجة طياري. الأبلكيشن جمع 920.000 دولار.

6. Ishqr

الأبلكيشن دا مخصص للمسلمين و نوعًا ما محبب للنفس وخفيف ومش واخد الدنيا بجدية زيادة، لو أنتي من مناصرات حقوق المرأة وبتدوري على شريك نسوي، جرئ ومتواضع، فـ Ishrg هو المكان المناسب ليكي، مستخدمينه بينقوا أسامي لنفسهم من حاجات عادية، زي رقم “٣٢” أو كلمة “مهندس”، لحد تعبيرات قوية زي “روح الآلهه” أو “هو أنا شكلي تخين في الصورة دي؟”

7. Way to Nikah

واضح من اسم الموقع إنه جاد جدًا بخوص الجواز، “الطريق إلى النكاح” بيدعي إنه الموقع رقم واحد في العالم للنكاح بين المسلمين-هو اللي بيقول والله مش احنا- الموقع ابتدى في الهند من ١٠ سنين، لكن الأبلكيشن تم إطلاقه مؤخرًا في بداية السنة دي، ومن ساعتها وهو بيجمع أكتر من ٢٥ ألف مستخدم كل شهر. الموقع بيسمح للمستخدمين ينقوا الناس المطابقين ليهم بناءً على بنود كتير، منها الدين، التعليم، الطول، الوضع المادي وأحيانا لون البشرة. الموقع بيشتغل بقيود إسلامية وبيتحمل مسؤولية اتباع تعليمات الإسلام في الجواز، مافيش إمكانية حدوث أي محادثات، والموقع مش للمرح ولا المواعدة، هو بشكل صريح جدًا معمول علشان الجواز. المستخدمين بيدفعوا مبلغ صغير من الدولارات وبيسجلوا على الموقع وبيبقي معاهم “مدير علاقات”.

8. WhosHere

WhosHere هو أكتر أبلكيشن مواعدة مشهور في السعودية والكويت، لكنه ابتدى ينتشر في المنطقة العربية كلها. الأبلكيشن مش طالب أي حاجة غير إن يبقي عندك إيميل علشان تعمل حساب شخصي، وإنك توفر المعلومات الأساسية لحسابك، صورك، اهتمامتك، وأنت بتدور على إيه بالظبط، سواء كان للمواعدة أو مجرد صداقة. الأبلكيشن فيه مكالمات صوتية ومرئية وممكن الناس تشارك صورها مع بعض. من الأسباب اللي خلت الأبلكيشن ده مشهور، هو إنه بيطلب من المستخدمين معلومات شخصية قليلة.

9. Salaam Swipe

الموقع بيعرّف نفسه بإنه مش مختلف عن طرق التوافق التقليدية، باستثناء إنه خرّج عمتك من المعادلة. مستخدمينه ممكن يدورا على الناس عن طريق الموقع، السن، مستوى التدين، الميول السياسية وغيرها. الموقع تم تطويره عن طريق الكندية Aliyah Jessa في ٢٠١٦ وبيدّعى إنه أكتر موقع متطور في السوق للمواعدة بين المسلمين.   

Photographer: Ahmed Najeeb.

علشان تعرف أكتر عن المشاريع الصغيرة في الوطن العربي ادخل هنا