شركة جوجل نزلت أبديت جديد لنظام تشغيل أجهزة أندرويد وسمت النظام “أوريو”. حسب سكاي نيوز عربية، فالنسخة دي هي التامنة ضمن سلسلة أنظمة تشغيل أندرويد، وفيها مميزات جديدة، زي تحسين عمر البطارية من غير ما يأثر على كفاءة العمليات المختلفة اللي ممكن تتعمل على الجهاز.

النظام في مميزات تانية كتير، زي إنه بيقلل من استهلاك الأبلكيشنز اللي على الموبايل لطاقة البطارية طالما مش قيد الاستخدام، كمان بيسمح للمستخدم إنه يدور في الإنترنت براحته ويتفرج على فيديو في نفس الوقت، "أوريو" زودلك عدد الأبلكيشنز اللي ممكن تنزلها، وضاف ٦٠ إيموجي جداد.

جوجل حاولت تظبط عدد Notifications اللي بيستقبلها المستخدم، ومن هنا نظام أوريو هيتيح لكل واحد يختار الحاجات الأقرب لاهتماماته. و بما إن عدد كبير بيتضايق من إعادة كتابة الباسوورد كتير كل مرة يفتح أبلكيشن، النظام عمل أوبشن اسمه “اوتو فيل” اللي هيفتكر تفاصيل المستخدم علي الأبلكيشن بشكل كبير.

وعلشان تشتد المنافسة، جوجل عملت أوبشن جديد زي “Find my Iphone” اللي هيتيح لمستخدم أندرويد إنه يلاقي  موبايله ويمسح كل اللي عليه في حالة إنه ضاع أو اتسرق.