٩ مطاعم أكل مصري مشرفانا في بلاد بره
لما تيجي تخرج مع أصحابك، أول حاجة بتفكر فيها: هنروح ناكل فين؟ المصريين معروفين بجبروتهم في الأكل وذوقهم العالي، تخيل نفسك مسافر أي حتة بره وتروح تلاقي صراصير مقلية وشوربة ضفادع وكفتة سمك قرش، تقعد تندب حظك وتتخيل الملوخية والمحشي والمكرونة بالبشاميل من أيدين الحاجة. بس لحظك الحلو، أخواتك المصريين سبقوك وعملوا نسخ ماتتعدش من قهوة المصريين في بلاد مختلفة حوالين العالم، جيبنالك كام مطعم كده ممكن ترم بيهم عضمك وأنت متغرّب، رحلة سعيدة.
Maha’s Egyptian Brunch – Toronto, Canada
كندا برد وفاضية وغالية، بس مها برانش هناك عشان يخفف عنك شوية، أكل وقعدة حلوة، بس اعمل حسابك هتقف في الطابور حبة.
Tut’s Egyptian Eatery – Kuala Lumpur, Malaysia 
ألوان لطيفة وفراعنة وستايل عالي وأكل مصري من اللي قلبك يحبه، العيشة في جنوب شرق آسيا أو ماليزيا لطيفة، بس مش سهل تلاقي أكل يعجبك هناك.
New York Koshary – New York, NY, USA
البرجر مرمي عندنا على كل ناصية شوية، وجيه الوقت اللي الكشري يسحب السجادة وينتشر في نيويورك، عشان احنا مش قليلين يا بلد وباقية وتتمدد بعون الله. وهتلاقي أطعم جديدة زي كشري بالجمبري أو بالفراخ.
Uchimura Restaurant – Tokyo, Japan
هتخش علي المطعم هتلاقي ما شاء الله لا قوة الا بالله في وشك، هتحس بروح مصر بتهفهف ومش بعيد تتوحم على طاجن بامية باللحمة وتخش تحقق أحلامك جوه.
Aladdin Restaurant – Addis Ababa, Ethiopia
أخواتنا الأفارقة بكل فخر بيقدموا أكلات مصرية، في واحد من أفضل المطاعم في العاصمة أديس أبابا.
Restaurant Amira – Berlin, Germany
المطعم ده بتديره أسرة سعيدة، هتقعد تحس نفسك في بيتكم.
Cairo Takeaway – Sydney, Australia
هو احنا مش عارفين الحقيقة أستراليا دي بياكلوا فيها إيه، بس اللي نعرفه إن المصريين اللي هناك بيقولوا إن ده من أحسن الأماكن اللي ممكن تاكل فيها أكل مصري هناك.
Les Pyramides – Cayenne, French Guiana
أمريكا الجنوبية، البرازيل على شمالك والسامبا والسكسي ليدز ومعاهم مطعم بيقدملك أكل مصري، خلاص كده مش ناقصك حاجة.
Micka Falafel – Paris, France
الطعمية راحت فرنسا عادي ومابقاش اسمها جرين برجر ولا حاجة أهو!
