الفترة الأخيرة الاهتمام بالصحة العقلية والأمراض النفسية زاد في مصر والشرق الأوسط، على الرغم من ده لسه فيه وصمة عار للمريض النفسي وكلام زي "مجنون" بيتقال، وفي وسط ده فيه حملة كسر الصمت في مصر أو Break the silence، اللي عملها علي سلامة الموسيقي المصري اللي عايش في كندا، عشان يكسر الصمت حوالين المرض النفسي ويخلي الناس تتكلم عنه. 

علي سلامة قال إنه كان عايش لوحده من ساعة ما كان عنده 17 سنة، لكن اللي ألهمه إنه لقى ناس تانية بتتعامل مع الموضوع وحس إنه يقدر يستخدم الموسيقى وصوته عشان يعبر عن المشاعر اللي جواه. بدأ "سلامة" يقرأ عن أبحاث الصحة العقلية في مصر وعرف ازاي فيه وصم وعار بيلحق بالمرضى النفسيين والعقليين في مصر وقرر يعمل حملته لكسر الصمت، وبمجرد مشاركة الرابط اللي ممكن الناس تحكي عليه، اتفاجئ إن الناس بعتت علي اللينك بسرعة وبتحكي اللي حصلها. 

بيقول "سلامة": "الناس محتاجة حد جمبها، محتاجة حد يسمعها خصوصًا إن أحيانًا بيكونوا خايفين من أسرهم والقريبين منهم". على الرغم من قلق الموسيقى المصري من المستقبل لكنه متفائل عشان ممكن تلاقي حد غريب عنك تمامًا مستعد يساعدك، زي ما هو لقى ناس تدير معاه الصفحة والحملة وهما حاليًا فريقهم 8 أفراد هدفهم زيادة الوعي بالصحة النفسية في مصر.

علي سلامة بيعمل ألبومه الجديد اللي بيتمنى إنه يساهم أكتر في نقل مشاعر الناس وكسر الصمت، ونفسه إن حملة Break the silence يبقى ليها خط ساخن للمساعدة ومنع الانتحار شغال 24/7. 

ممكن تتابع الحملة في مصر من فيسبوك أو إنستجرام. 

وممكن تبعت قصتك من غير ما حد يعرف هويتك من هنا، أو تعرف أماكن لدكاترة نفسيين في مصر من هنا.