9 مغنيين لازم تسمعهم عشان تعرف يعني ايه أغاني شعبي؟
امبارح كان عيد ميلاد المطرب الشعبي اللي قالوا عليه صاحب اللحن الواحد، شعبان عبدالرحيم، ومش عارفة امتى بدأت موضة إن الغنا الشعبي ده حاجة "ياي" وإن اللي بيسمعوه دول ناس من مستوى أقل وإن دي أغاني افراح بس مينفعش تشغلها في وقت تاني، ففكرت اعمل ليست بمغنيين شعبيين لازم تسمعهم وتعدي عليهم، بس خلينا نتفق اتفاق .. الليست دي مش هيكون فيها عدوية عشان مينفعش حد اصلًا يختلف عليه! ومش هيكون فيها حكيم عشان هو من احلى الأصوات اللي عدت على مصر، بس خلينا نسخن بتراكين ليهم في البداية كده.
رشدي مغني كبير من زمان، وبيعمل أفلام وينافس عبدالحليم ذات نفسه، بس انا مبدأتش اتعلق بيه غير بعد اخر البومين، وتحديدًا البوم "دامت لمين" يمكن عشان ساعتها كانت مصر كلها مشغلاه فبدأت اركز ولاقيت انه صوت عظيم! وجماله انه يقدر يغني الحزن ويخليك تعيط ويغني الفرح ويضحكك، وكل ده بكلمات بسيطة جدًا، لو مبتحبش أفلام محمد رشدي اديله فرصة تانية في الغنا! ولما رجعت لزمان حبيت أغانيه القديمة اكتر بقى.
حتشبسوووووت، ده سر تعلقي بالراجل ده، دمه خفيف وصعيدي ومجدع، ده اللي بتحسه بمجرد ما تسمعه، ويمكن هو بيؤكد نظرية إن الغنا الشعبي هو الغنا بتاع الصعايدة ومناطق مصر بجد.
دايمًا عندي هاجس إن اللي بيموتوا صغيرين بيبقوا فنانين أحلى وبنخسرهم، رمضان البرنس كان حالة في بداية التسعينات واواخر التمانينات بس مات سنة 1998 وهو عنده 35 سنة، وخسرنا فنان مهم، ممكن يكفيك إنك تعرف إن عدوية كان بيسيب حفلات عشان يحضر فرحه ويغني معاه، وإن هو أول شخص غنى "بتناديني تاني ليه" وكانت من ألحانه!
4. سعيد الهوا
في 2014 الناس كانت بتعمل "كوميكس" على "الأمبليه" وتحديدًا اغنية انا اسمي سعيد الهوا، ومن هنا رجع المغني ده للشهرة بعد ما كان الناس نسيته، الراجل ده اشتهر والناس عرفته اكتر بعد وفاته، ودي اكتر حاجة بائسة في الدنيا وتخليك عايز تسمعه.
مرة كنت بعمل بحث عن مطربين فترة التمانينات وبقرأ عنهم، ولاقيت اغنية اسمها "ياغزال الدرب الأحمر" وفضلت اسمعها، ومن هنا عرفت كتكوت الأمير، اللي كان عازف طبلة في فرقة عبدالوهاب وأم كلثوم قبل ما يتجه للغنا ويبقى من أشهر المطربين الشعبيين في وقته.
الحقيقة الاسم ده المفروض يتحط مع عدوية وحكيم ومنتكلمش عنه لأنه أكبر من كده، بس انا بزعل لما بالاقي ناس مش بتسمعه ومش عارفة قيمته، الراجل صوته جميل لدرجة توجع القلب، اسمعه كده وهو بيغني "متشكرين"، واترحم عليه.
مطرب الميكروباصات الأول طبعًا، وانا في ثانوي نزل البوم "دقيقة حداد" انا حافظاه كله من كتر ما سمعته في الطرق وقتها، طارق الشيخ حزين طول الوقت ومع ذلك تحس انك عايز ترقص على اغانيه وتحضنه كده، تقريبًا احلى حاجة عملوها كايروكي في حياتهم انهم عملوا معاه دويتو، وطبعًا صوت طارق الشيخ حط على صوت أمير عيد.
"ايه الاساتوك ده ؟" لو انت عارف الجملة دي ومتعرفش حمدي بتشان يبقى هي مشكلة تسويق غالبًا، بس ده الراجل اللي غنى الأغنية دي وخلاها اكتر معاكسة تعلق في بالنا.
فيه مطربات شعبيات حلوين جدا زي جمالات شيحا وفاطمة عيد وغيرهم، بس اغلبهم واخد الاتجاه التراثي، لكن "هدى" بصوتها الجميل لما ظهرت الناس كلها كانت بتقول ايه ده؟ مغنية بنت شعبي؟ انا معرفش "هدى" راحت فين دلوقتي وليه مش بتعمل اغاني جديدة مع الحفلات الكتير، بس انا بحبها وماكنش ينفع مقولش اني بحبها
فيه اصوات شعبي تانية عظيمة، بس مكتبناش لأنها غالبًا معروفة، يعني أحمد شيبه خلى كل المطربين الكبار زي صابر الرباعي يغنوا "آه لو لعبت يازهر" لأنها فعلا حلوة ومحتاجة صوت قوي، وفي اغنيته الجديدة مع لطيفة بان قد ايه صوته جميل وبرنس في نفسه كده، ومحمود الليثي، وأمينة، وسعد الصغير رغم اني مش بحبه بس هيفضل علامة مختلفة في الشعبي، دور انت على مغنيين تانيين وقلنا عليهم بقى.
