مين قال إن لحن الأغنية مجرد مزيكا بتتعزف عليها الكلمات؟ لحن الأغنية حالة كاملة ممكن يخليك تعيط وممكن يخليك تضحك، وممكن يخليك تحلف بروح الموسيقي اللي عمل المزيكا دي، ولأن ربنا بيقسم الأرزاق بطريقته، مش شرط أبدًا اللي صوته حلو يقدر يطلع لحن جميل، ولا صاحب اللحن يقدر يغنيه.. بس دايمًا بيفضل للأغاني نكهة تانية من ملحنيها، بيبقوا حاسين بيها بشكل مختلف يمكن، قادرين يتوحدوا مع الجمل اللحنية اللي عملوها ويوصلوا إحساس جديد، حتى لو مش بنفس حلاوة صوت المغني.

وجيه عزيز
في وقت من حياتي كنت بتضايق لما تيجي سيرة الأغنية دي فيتقال أغنية "أحمد زكي"، يا جماعة لأ دي أغنية وجيه عزيز! أنتم بتهزروا؟! الأغنية من تلحين العظيم وجيه عزيز وأحمد زكي غناها ضمن أغاني فيلم "هيستريا"، بعد ما كان رافض وشايف إنه لا يصلح للغناء، بس بما إنه كان بيلعب دور مطرب فغناها، لكن هتفضل بصوت "وجيه" وإحساسه وعوده ليها طعم تاني مش هيفهمه غير اللي بيسمعها منه لايف أو في برنامج، وعارف إنه مش متقمص الدور، أنا بحب أحمد زكي وكل حاجة بس هو ممثل في الآخر.

بليغ حمدي
اليومين دول فيه موضة بليغ حمدي، كل الناس بقت تحبه فجأة، بس أنا بحبه من طفولتي، وأنا طفلة كنت لما بسمع الأغنية بعرف ألحانه بسهولة، معرفش لأنه مميز فعلًا ولا لأنه أكتر واحد كنت بحبه. بليغ سجل أغاني كتير من ألحانه لأنه قدم برنامج فني وغنى فيه كذا مرة، ولأنه كان بيحب يغني، مش عارفة ممكن أرشح إيه تسمعه من بليغ، بس لازم تشوفه وهو بيغني "العيون السود" و"خليك هنا" مع وردة اللي كانت حب حياته، ولازم تسمعه وهو بيغني "انساك" لحنه الأشهر لأم كلثوم.

محمد عبدالوهاب
عبدالوهاب مغني أحلى ولا ملحن أقوى؟ ده النقاش اللي هيفضل مستمر بين الناس كتير، بس حتى لو مش بتحب تسمع صوت عبدالوهاب، ماينفعش تنكر إنه بيغني ألحانه بتمكن، يعني مثلًا "لا تكذبي" منه أحلى من "نجاة"، بس كمان من مميزات إنك تسمع الأغنية من ملحنها، إنك تسمع البروفات وأولها كان عامل ازاي.

رياض السنباطي
"السنباطي" من أهم اللي لحنوا لأم كلثوم، فيه ناس بتعتبر إن أغنية "الأطلال" من أعظم الألحان، وعلى الرغم من إني بحب أم كلثوم، بس صوت السنباطي بفخامته ورنة عوده بيدي الأغنية طعم تاني غير أم كلثوم خالص، اسمعه كده وهو بيقول: "وحنيني لك يكوي أضلعي، والثواني جمرات في دمي" وبعدين نتكلم.

أحمد الحجار
الاسم اللي اتظلم أو ضحى عشان يبان بداله أخوه علي الحجار، أحمد هو معنى التفاني والتضحية الحقيقي، لكن أغنية "لما الشتا يدق البيبان" اللي كانت من ضمن أسباب شهرة وعلامات حياة علي الحجار، الحزن فيها أحلى بكتير وأنت بتسمعه بنبرة صوت أحمد الحجار وأنين عوده، وتبكي معاه، أنا عمومًا منحازة لأحمد الحجار وبالذات في الأغنية دي.

أحمد منيب
مش حاسة إننا مفروض نتكلم كتير عن أحمد منيب، عشان مافيش 2 يختلفوا يعني إن أغانيه تسمعها منه أحسن بكتير ما تسمعها من محمد منير، وإن منير مجرد هاوي جمبه رغم عظمته، بس اسمع دول كده.

محمد القصبجي
بصراحة أنا بحب أغنية "رق الحبيب" بصوت أم كلثوم أكتر، بس الكلام عن حب القصبجي ليها واللي كان بيداريه في ألحانه وفي الأغاني اللي بيعملها ليها، بيخليني أحب اسمعها بصوته، التويستة بقى إن الأغنية دي كتبها أحمد رامي اللي كان بيحب أم كلثوم برضه، بعد فترة من عدم الكلام بينهم، فأنت ماتبقاش عارف المفروض تتعاطف مع مين فيهم؟! المؤلف ولا الملحن؟

كاظم الساهر
كاظم مابيغنيش غير من ألحانه ومافيش حد بيختلف على جمال صوته وألحانه، بس لما بيغني بقى الأغاني اللي لحنها لحد غيره زي لطيفة مثلًا، أو "لماذا؟" لغادة رجب، بتحس إن كاظم اللي كان مفروض ينزل بالأغنية دي الأول.

سيد مكاوي
وضع سيد مكاوي مختلف شوية، عشان هو أصلًا بيغني وبيعمل حفلات وليه أغاني بتاعته هو لوحده، لكن كمان بيغني أغاني اللي لحنها لغيره، انسى بقى وقار أم كلثوم واسمع دلع وشقاوة صوت سيد مكاوي!

عمار الشريعي

الصوت الحزين الجميل ومن أعظم اللي لحنوا في جيله، أنا شخصيًا بحب صوته وبحبه لما يغني اللي لحنه .. اسمع منه "حبيبتي من ضفايرها طل القمر.