لو ليك قريب أو أخ في مجال الفن، بتفتكر دي نعمة وحاجة هتخليك توصل بسرعة، بس الحقيقة مش ده اللي بيحصل مع كل الناس، فيه ناس وجود أهاليهم في الفن خلاهم يبعدوا عن الأضواء أكتر وواحد بس ياخد الشهرة والمجد، والتاني يتعب من غير نجاح كبير.

أحمد الحجار

بالنسبالي هو الصوت الأحلى في عيلة الحجار اللي خرجت أكتر من فنان، ودايمًا "علي الحجار" في كل اللقاءات بيشيد بأخوه وبيقول إنه سبب نجاحه، "أحمد" لحن أكتر من أغنية صنعت نجومية "علي" منها أولى أغانيه "اعذريني"، وقال في لقاء اخير ليه إنه اكتفى بالتلحين و4 ألبوامات بس لأنه رفض الغناء في أماكن ليها طابع معين زي تقديم الخمور وإنه بيخجل من الظهور كتير.

إسماعيل شبانة

هو الأخ الأكبر لعبد الحليم حافظ، وكان مشهور وبيغني للإذاعة، لكن ظروف كتير –يقال إن منها شهرة أخوه-خلت شهرته تتراجع، ومحدش يفتكر إن كان فيه مطرب بالاسم ده في يوم من الأيام.

هدى حداد

الأخت الشقيقة لفيروز، واللي غنت معاها في أكتر من مسرحية زي "ميس الريم"، بس هدى بقى اسمها مقرون طول الوقت بفيروز، ولو سألت حد عنها هيرد ويقولك دي أخت فيروز؟ وده اختزال كبير لموهبتها، اللي تستحق إنها تكون أعظم وأكبر، كلام كتير دار عن محاربة فيروز ليها، وإنها اقنعتها إن صوتها ضعيف وميغنيش غير لون معين بس، لكن محدش متأكد من صحة ده.

توفيق توفيق

هو أخو المطرب اللبناني وليد توفيق، بدأ في فرقة أخوه قبل ما يستقل ويقرر يغني لوحده، اشتهر في فترة التسعينات وظهر في مسلسلات مصرية كبيرة زي الرجل الآخر، لكن اختفى بعدها بفترة ورجع في 2017 بأغنية جديدة ووقتها صرح إن نجاحه أثر على نجاح أخوه وليد توفيق وده من أسباب بعده عن الفن

غنوة

هي الأخت غير الشقيقة لأنغام، يقال إن  أنغام رفضت احترافها الغناء وده اللي خلاها متقدرش تحقق شهرة كبيرة، رغم إنها قدمت أول أعمالها من 10 سنين تقريبًا، "غنوة" شاركت  في الجزء التاني من مسلسل "الأب الروحي" ، ونجحت وكانت بتحضر لألبومها الأول بس توفت في حادثة.

ياسر قمر

هو أخو مصطفى قمر، وعمل ألبوم واحد في التسعينات، لكن بعدها أبعده أخوه عن الساحة عشان تشابه أصواتهم، ورجع بأغنية واحدة في 2017 بعنوان "صعب الفراق"

نغم صالح

هي أخت "مريم صالح" ورغم إن نغم دخلت طريق تجاري أكتر وعملت أغاني مع شركات إنتاج كبيرة، ومريم اتجهت للغناء المستقل، بس فضلت مريم معروفة أكتر ومشهورة أكتر من أختها