الشوارع اتغرقت، ماما نزّلت خلاص اللبس الشتوي، والجواكيت الجلد ملت شوارع وسط البلد، وينتر إيز هير، وحان الآن موعد لبس الكلسون والتدوير على أفضل أماكن بتعمل شوربة في القاهرة. سألنا الناس وجبنالك أفضل ترشيحات منهم.

شوربة مشروم

اختيار شوربة المشروم المناسبة ليك عملية مش سهلة أكيد، مش أي حد بيعرف يعملها زي ما أنت عايز بالظبط، عايزها كريمي، طب نسبة الكريمة، طب أصلًا مش عايز كريمة، الكثافة ونسبة المشروم في الشوربة، حتى ال side مهم جدًا، التوست بالريحان ولا سوبر سوبريم بالجبنة السايحة، أنت اللي تختار.

Crave

الأداء المتوازن واللعبة الحلوة، المطعم قعدته جميلة والأكل عمومًا لطيف، وبنرشحلك عنده شوربة المشروم، تقدر تعرف مكان المطعم والتليفونات على صفحتهم على فيسبوك من هنا

Euro Deli

شوربة مشروم في مستوى الطالب اللي بيعيط لما ينقص نص درجة، أحسن علاج لصوابعك لو متجمدة من السقعة، ممكن تعرف مكان المطعم ورقم التليفوم من هنا

شوربة الطماطم

ما هو مش أي حد حط مياه سخنة على صلصلة هاينز يبقى عمل شوربة طماطم، الطماطم/القوطة ليها أصول، بنرشحلك بقى مين

Cortigiano

أهالي حي الدقي والمعادي الكرام وما حولهم، شوربة طماطم مظبوطة، مش هتكلم كتير، الحاجات دي ما بنتكلمش فيها كتير. مكان المطعم والتليفونات تقدر توصلهم من صفحة الفيسبوك من هنا

Tutti Matti

قد بلغنا إن الناس بيروحوا أفواجًا ل"Tutti Matti"، فسألنا أصدقائنا، وأجمعوا جميعًا عليها، ممم إنها حقًا لذيذة، وليس الطماطم وحدها، كل أنواع الحساء شهية في هذا المكان، نرشح لكم أيضًا حساء (شوربة يعني) البصل. تستطيعون معرفة المكان وكافة أرقام الاتصالات من صفحتهم على "فيسبوك" إذا ضغطتم هنا 

أنواع تانية من الشوربة

Grapes - شوربة بطاطس

مش هتلاقي ناس كتير بتعمل شوربة بطاطس، ما بالك بقى إنها تكون مظبوطة، الشتا يحب المعادي، والمعادي فيها Grapes، وأنت تقدر توصل للمطعم وأرقامهم من هنا

Mori Sushi - Tom Yom

الحب الحب، الشوق الشوق، بلوبيف بلوبيف، ويل يا ويل، موري لو أقدر أعيش فيه هعمل كده وآكل سوشي كل يوم، حتى اتفاجئت إن عندهم شوربة لما حد من صحابي قالي، أينعم خليته يعزمني عليها عشان أركز أنا في السوشي بس كانت جميلة، تقدر توصل لأماكن الفروع وأرقام التليفونات من هنا

شوربة بلدي

الشوربة، ولاد البلد، ولاد البلد الجدعان، الشتا، شوارع وسط البلد، شبرا وعابدين وكل مناطق القاهرة تربية الفول بالزيت الحار، وأنا وأنت

القزاز - عدس

الشتاء يحب العدس، العدس يحب البرد، البرد يحب الشوربة، الشوربة تحب الجميع، الليست دي أصلًا مكتوبة على أنغام الست وشوربة العدس بالزبدة جمب اللابتوب. ميزة القزاز إنك لو عايز لبن العصفور هتلاقيه عنده، مش هيخذلك أبدًا، في الليالي اللي مش عايز تقعد فيها في المطعم، وتاخد العلبة معاك تاكلها في الشارع وأنت بتتمشى، هتلاقي القزاز صديقك الصدوق ساعتها، جرب من عنده شوربة العدس السادة أو بالزبدة، وبلع بالبصل المخلل والعيش المحمص. تقدر تعرف مكان المطعم وأرقامه من هنا ومن هنا

الدهان - لسان عصفور

أحلى شوربة لسان عصفور، ما تستوهنش بيها، كييف الأكل هو اللي بيعرف يتبسط بكل طبق، ويعرف أجمل طبق ييجي منين، تقدر تعرف مكان المطعم وأرقامه من هنا

كبابجي الأزهر فرحات - شوربة الحمام

الشوربة المحطوطة في مج الشاي، أنت مش محتاج غير مج زي ده وخلي الشتا يدق البيبان براحته، يدق الشبابيك، يخبط الباب برجله، مش قصتك خالص، شوربة حمام هتخليك تنور، تقدر توصل لمكان المطعم وأرقام التليفونات من صفحتهم على فيسبوك هنا

فرحات - شوربة كوارع

الحلويات بقى، الشوربة الحرشة، شمر إيدك وانزل من عربيتك واقلع جاكيت البدلة، واستعد تغطس، الكوارع ما بتتاكلش بالشوكة والسكينة ولا بتتاكل في مطاعم 5 نجوم، احنا قررنا ناخد معلوماتنا من مصدر من منازلهم، إسلام سلامة بعت لصفحة Egyptian Foodies تجربته هناك تقدر تشوفها من هنا