"مزنوق" تطبيق جديد هيساعد المستخدمين يلاقوا أقرب حمام ليهم في المنطقة اللي هما موجودين فيها، من خلال تحديد مواقعهم باستخدام خاصية "GPS"، وبعد ما بيحدد موقعك، بيظهرلك أقرب حمام ليك على الخريطة، وإزاي توصل لِيه، وتفاصيل المكان اللي هتروحه.

التطبيق كمان هيوفرلك عرض الحمامات على شاشة تليفونك، اما عن طريق الخريطة، أو قايمة بتظهر ليك أقرب الحمامات ومعلومات اضافية عنها، زي مواعيد التشغيل، والحمام مخصص للجنسين ولا لأ، وهل فيه مكان لذوي الإحتياجات الخاصة ولا لأ.
وهيكون فيه امكانية للمستخدمين انهم يعلقوا على الحمام اللي استخدموه، وتقييمه بخمس نجوم أو أقل. 

التطبيق بيعتبر الأول من نوعه في الوطن العربي، ولسه في مرحلة الإختبار حاليًا، وهيكون متاح تنزيله من الـ Play Store قريب، وهيكون متاح للأندرويد في أول إصداره، وبعد كده هيكون متاح لمستخدمين الـ iOS.