• اكتب معانا
  • ماتنسناش
  • تابعنا
الموضوع اللي جاي
مصمم سعودي بيتخيل لو مشاهير العالم اتولدوا في السعودية
الموضوع اللي فات
الإمارات هتزود سعر السجاير 100%

حوار مع "كريم مصطفى".. شاب مصري احترف الغوص مع القروش

مستعد علشان تغير فكرتك عن سمكة القرش؟

في يوم من الأيام بعد ما رجع كريم مصطفى من شغله للبيت، حس إنه عايز يعيش حياته بيغوص مع أكتر مخلوق مخيف في المية "القرش الأبيض"، وقتها قرر "مصطفى" يستقيل من عمله في السباحة ويكون المصري الوحيد اللي شغال في حماية القروش والمحافظة عليها.

وعكس مالناس بتتوقع، أسماك القرش مهمة للنظام البيئي، وزي ما بيقولنا "مصطفى"الحقيقة إن القروش هما الضحايا في الكون مش الجناة! "القروش بيتقتلوا وبيتم اصطيادهم علشان استخراج الزيوت وصناعة المكياج وعلشان الأكل الأسيوي، وعلشان الخوف منهم"، وعلى عكس مااتعودنا نشوف في أفلام هوليوود المرعبة عن القروش، مافيش داعي تخاف منه أصلًا.

"السنة اللي فاتت كام واحد في العالم كله راح علشان يعوم في البحار والمحيطات؟ مليارات، ومع وجود 400 نوع مختلف من القرش، كام حادثة حصلت للبني آدمين؟ 10، في المقبال كام قرش اتقتل؟ 100 مليون! يعني تخيل إن أكتر من عدد سكان مصر اتقتل في سنة واحدة" بيقول "مصطفى" اللي عاش حياته في البحر مع ناس بتحب المية وبتخاف من القروش، ودلوقتي بيفكر ازاي يغير فكرتهم عن المخلوقات دي.

لو أنت لوحدك في المية وشفت قرش بيعوم في أي شاطئ، خليك عارف إنه شايفك تهديد ليه وإنه أصلًا مابيحبش طعم البني آدمين، بينصحنا "مصطفى": "لو شفت قرش، اخرج من المية لو تقدر، لو ماتقدرش خليك هادي وثبت عينك عليه لو كمل عوم بعيد عنك، مافيش أي قلق، حاول تخلي نفسك صغير قد ما تقدر اركع على ركبتك، القرش غالبًا هيتجاهلك ويمشي بعيد عنك، افرد دراعك براحة ورجلك زي النجمة، أنت دلوقتي حر إنك تمشي".

"مصطفى" اشتغل مع القروش أكتر من سنة، وطول حياته بيرعى الحيوانات والأنواع المختلفة منها، لكنه بيقولنا إن القروش كائنات مميزة، "كل ما بدرسها كل ما بعجب بيها أكتر، الناس فهمتهم غلط، كل سمكة ليها شخصية مميزة وتصرفات معينة ليها".  بيحكي السباح المصري اللي سافر من جزر البهاما لسنغافورة لحد الصومال علشان يعوم مع أسماك القرش بكل أنواعها، واشتغل مع جمعيات وصناديق أهلية وحكومية للحفاظ على أسماك القرش وتثقيف الجمهور عنها، واشتغل مع علماء الأحياء البحرية علشان يحطوا علامات على القروش لمراقبة حركتها وهجرتها ويعرفوا أكتر عن حياتها.

القرش "نيكول"، حط "مصطفى" علامة على جسمها وقدروا يعرفوا إنها هاجرت من جنوب أفريقيا ل أستراليا ورجعت في حوالي 9 شهور، لكن ده بيحطنا قدام سؤال أخلاقي، وضع العلامات على القروش ممكن تضرهم وتأذي جسمهم؟ "مصطفى" بيقولنا إن الموضوع محتاج دراسة وإنه يكون عارف كويس هو بيعمل إيه، علشان سنتيمتر واحد ممكن يتسبب في قتل القرش وخسارة حياته، لكن العلامات هي اللى بتعرفنا أكتر عن حياتهم وبيهاجروا من فين لفين وامتى وبيعملوا إيه".

العلامة اللي سابها مصطفى على نيكول، ساعدتنا علشان نعرف إنها هاجرت من جنوب افريقيا لأستراليا ورجعت في 9 شهور، بيشرحلنا مصطفى "دلوقتي احنا عارفين إن الذكور بيهاجروا على طول الساحل لفوق ولتحت، عكس الإناث اللي بيحبوا المغامرة وبيدخلوا في مناطق أعمق بكتير، علشان كدة العلامة مهمة، لأن بدون بيانات ومعلومات دقيقة عن حياة القرش، هيكون حمايته والوصول ليه مستحيل".

في نص كلامنا مع كريم، خرجنا عن موضوعنا الأصلي شوية، وحبينا نستغل خبرته علشان يجاوبنا على سؤال مهم: إيه أحسن أماكن في مصر علشان تغوص فيها مع أسماك القرش، وكانت إجابته: "مرسى علم طبعًا، معظم الناس اللي قابلتهم في المجال ده راحوا هناك وانبهروا، لكن لو عاوز تغوص مع القرش الأبيض يبقى عليك وعلى جنوب أفريقيا وجنوب أستراليا والمكسيك"

مصطفى شايف إن الحل الوحيد علشان نحافظ على حياة أسماك القرش، خصوصًا في مصر، إن الناس تعرف أكتر عن القرش وصفاته "احتمالية إنك تموت من ثمرة جوز هند وقعت على راسك، أكبر من إحتمالية ظغنك تموت من هجوم سمكة قرش، أنا شخصيًا ساعدت ناس كتير يتخلصوا من خوفهم. كل اللي عليك تخرج من الكومفورت زون، وصدقني لو أسماك القرش اللي في الماية مرعبة، المية هتكون مرعبة أكتر بكتير من غير أسماك قرش".

Home
خروجات النهاردة
Home
Home