لما سألنا ناس كتير عن المسلسلات القديمة –ما قبل الألفينات- اللي تستاهل تتشاف، اتقال المسلسلات اللي ماختلفش اتنين عن إنها نجحت وفرقعت، زي "دموع في عيون وقحة، ذئاب الجبل، ليالي الحلمية، مين اللي مايحبش فاطمة"، بس على الجانب الآخر، فيه مسلسلات كانت عظيمة ومحتواها كويس، وماتسلطش الضوء عليها بالشكل اللي تستاهله، الميزة في مسلسلات التمانينات والتسعينات، إن عدد الحلقات بيكون من 15 لـ 20 حلقة، والمدة الفعلية للحلقة من 40 لـ 45 دقيقة، ومافيش مط وتطويل في الحلقات، خدلك فكرة عن 7 مسلسلات مصرية مأخدتش حقها بس هتعجبك.. 

1- اليقين:
"الأرض وفت بوعدها"، فكرة المسلسل كلها بتدور حوالين الجملة دي. أم ولادها التوأم اختفوا في حرب 56، وفضلت تدوّر عليهم أكتر من 20 سنة، رغم إن كل الناس حاولوا يقنعوها إن ولادها مش موجودين، وأكيد ماتوا مع العدوان، بس كان عندها "يقين" إنهم عايشين وهتلاقيهم.
المسلسل من بطولة محمود ياسين، شهيرة، محمد وفيق، تيسير فهمي، هشام سليم.


2- فيه حاجة غلط:
المسلسل ده رغم إنه تم إنتاجه سنة 83، بس سبق الزمن وواجهنا بالمشاكل اللي موجودة دلوقتي، واتناقش فيها بشكل عملي. أول حلقة بتتكلم عن رئيس المصلحة الحكومية اللي بيحاول يعالج المشاكل والفساد اللي موجودين في شغله، بعدها بيرجع ابنه من أمريكا متجوز واحدة أمريكية، وبيدور على شقة، فـ بيقابل "محمود المليجي" صاحب العمارة، اللي بيرهن بيعه للشقة بـ فوز الأهلي في الدوري، وصبي المعلم اللي بيشجع الزمالك من ورا المعلم.

كمان اتكلم عن مشاكل زي البيع بأسعار غير التسعيرة، وتجارة في السوق السودة، والتعصب الكروي، وفرص العمل برَّه مصر، في نهاية كل حلقة، لازم هتقول: "فيه حاجة غلط!". المسلسل من بطولة: حسن عابدين، كريمة مختار،محمود المليجي، محسن محيي الدين.


3- خالتي صفية والدير:
متاخد من رواية بنفس الاسم للروائي بهاء طاهر. أحداث المسلسل بتدور في قرية في الأقصر سنة 59، قصة حب "صفية" لـ "حربي" اللي بيفاجئها إنه بيخطبها للقنصل، وبتقرر "صفية" إنها تنتقم من "حربي" بكل الأشكال. ونجحت "صفية" في إنها تبين الصراع اللي جواها ما بين حبها ورغبتها في الانتقام للحب ده.

"خالتي صفية والدير" كان هيتعمل فيلم، بس رأي عاطف الطيب ونور الشريف إنه يكون مسلسل أفضل. وده المسلسل الوحيد اللي اتكلمت فيه "بوسي" بـ لهجة صعيدية، واتعمل مسلسل إذاعي لمدة 7 حلقات. "ممدوح عبد العليم" ظهر في لقاء بيشتكي من إن المسلسل ماحققش النجاح اللي كان مستنيه، رغم إنه تعب في الدور ده. المسلسل من بطولة: ممدوح عبد العليم، بوسي، سناء جميل، حمدي غيث، عمر الحريري


4- صابر يا عم صابر:
"فريد شوقي" و"كريمة مختار" من أكتر الثنائيات اللي اشتغلوا مع بعض في أفلام زي "بالوالدين إحسانًا" و"الليلة الموعودة" و"يارب ولد"، ومسلسلات زي "البخيل أنا" وفي مسلسل "صابر يا عم صابر"، القصة بتدور حوالين "عم صابر" اللي شغال سوَّاق خاص لوزير، وبيعاني من ارتفاع الأسعار، ومشاكل أسرته، ولحد ما وصل سن المعاش الحال بيضيق عليه أكتر وأكتر، فـ بيحاول يشتغل شغل تاني عشان يقدر يحل الأزمات اللي عايش فيها.

المسلسل من بطولة: فريد شوقي، كريمة مختار، أيمن عزب، رشوان توفيق.


5- الرجل والحصان: 
الأفلام والمسلسلات اللي قصصهم كانت بتتمثل في علاقة قوية بتربط الممثل بالحيوان، مش كتير، بس من أهم المسلسلات اللي اتكلمت عن الفكرة دي، هو المسلسل ده، علاقة قوية بتربط الشاويش طلبة بالحصان عنتر، اللي ماكانش بياكل غير من إيد الشاويش، لحد ما تقرر الحكومة إعدام الحصان "حسب الإجراءات وقتها"، لإنه مابقاش يقدر يطارد المجرمين زي الأول، لكن "طلبة" بيحاول ينقذه بإنه يشتريه، فيفكر في بيع الأرض ويقف أولاده قصاده.

"طلبة" ماكانش قدامه حل غير إنه يهرب بالحصان، ويتحكم عليه بالفصل من الخدمة وسارق عهدة، ويتقدم لمحاكمة عسكرية.المسلسل بطولة: محمود مرسي، هدى سلطان، محمد رضا، مديحة سالم.


6- وتوالت الأحداث .. عاصفة: 
مافيش حد ماسمعش جملة: "أنا البرادعي يا رشدي".. اللي قالها "حسن مصطفى" في واحد من أحسن 100 عمل في تاريخ الأعمال العربية، الظابط "رشدي إبراهيم"، بيطارد عصابة بتهرب دهب، وكل ما يقرب من إنه يمسك زعيم العصابة، بيطلع مجرد فرد فيها، رغم  النهاية الساذجة للمسلسل، لإنه بيكتشف في النهاية إن زعيم العصابة هو جاره الطيب، بس كان من أنجح المسلسلات وقتها.
 
المسلسل بطولة: عبدالله غيث، سهير البابلي، حسن مصطفى، وليلى علوي 


7- نهاية العالم ليست غدًا:
يعتبر من أول المسلسلات اللي اتكلمت عن الكائنات الفضائية، ونهاية العالم. الأستاذ "رياض عبد ربه" مدرس الفلسفة اللي بيحاول يعلّم تلاميذه حب مادته وإنهم يفهموا، مايحفظوش، وفي نفس الوقت بيواجه مشاكل في بيته مع أولاده، يتأثر "رياض" بجاره "الدرديري" اللي كل الناس بيقولوا إنه اتجنن عشان بيكلم "كائنات فضائية".

يموت بعدها "الدرديري"، فـ يحاول "رياض" إنه يفكر في نفس منطق جاره، لحد ما يقابل "كائنات فضائية" فعلًا بتهدده بنهاية العالم، وإنه يحاول يغيّر حال الأرض قبل ما يدمروها، وبالفعل وصل لإنه قابل قادة الدول وحاولوا يصلحوا الأحوال. المسلسل من بطولة: حسن عابدين، توفيق الدقن، حسن مصطفى، محمود الجندي.