في وقت ماكانش فيه التليفزيون موجود بقوة زي دلوقتي، وماكنش فيه الكم ده من المسلسلات في شهر رمضان، كانت الإذاعة هي البريمو، فكان أغلب المصريين عندهم طقوس معينة بتبدأ بالفطار ثم فزورة آمال فهمي في البرنامج العام، وبعد كده المسلسل الإذاعي على نفس الإذاعة، وبسرعة تتغير المحطة على الشرق الأوسط عشان المسلسل اللي بعده. أبطال السينما كانوا بيتنافسوا في المسلسلات دي، وكتير من الأفلام اتحولت لمسلسلات اذاعية، ونجاحها ماقلش عن نجاح الأفلام السينمائية، يمكن هتلاقي المسلسلات اللي هنا أغلبها متاخد من أفلام أو إنها سبقت أفلام، بس النهايات مختلفة. خدلك فكرة عن أهم وأنجح المسلسلات الإذاعية وقتها وعن اللي بتتعرض السنة دي:

*تنويه: 
فيه حرق لأحداث ونهايات المسلسلات، لو عايز تتابعهم ادخل على اللينكات على طول.

1- دندش:

قصته بتدور حوالين: "دندش" (وردة الجزائرية) جميلة الحتّة، واللي بيتنافس على حبها أهالي المنطقة، عايشة مع جوز أمها، وبيحبها "مرسي" (صلاح قابيل). بتحاول تهرب من معاكسات جوز أمها "كوع" (توفيق الدقن)، فـ تهرب لبيت خالتها، واللي بيرفض جوزها إنها تقعد معاهم لضيق حالتهم المادية، تهرب للمرة التانية وماتبقاش عارفة هي رايحة فين، تقع في الشارع وتلاقيها ست طيبة فـ تقعد معاها. في الوقت نفسه، بيحاول "المعلم مدبولي" (محمود المليجي) إنه يخلي مرسي يشتغل معاه في تزوير الفلوس، ويحصل ده، وتدور الأيام ويتقابل مرسي بـ دندش تاني ويتجوزوا، بس المرة دي محمود المليجي يحاول يأثر على جوازهم، وتهرب للمرة التالتة على فرقة بتغني في الأفراح، لحد ما تحقق نجاح يغطي على "أنوس" (ميمي شكيب) صاحبة الفرقة، وتأسس فرقة لنفسها، وتتجوز عبد المنعم مدبولي في النهاية.
المسلسل ده حقق نجاح كبير جدًا، وكان موسيقى وألحان محمد الموجي، وتأليف واخراج: سمير عبد العظيم

2- أرجوك لا تفهمني بسرعة:

العمل الإذاعي الوحيد اللي شارك فيه عبد الحليم حافظ، وكان بيتذاع على إذاعة الشرق الأوسط سنة 73، لكن ماتذاعش بشكل كامل بسبب حرب أكتوبر، وتمت إذاعته الصيف اللي بعده.

قصة المسلسل بتدور حوالين قصة حب بين "سامي" (عبد الحليم حافظ)، و"ليلي" (نجلاء فتحي). وبتقابلهم صعوبات في علاقتهم بسبب دراستهم، بتدخل حياة سامي الممثلة الرئيسية للفرقة "نادية" (ماجدة الخطيب)، واللي بيألف لها المسرحيات. نادية بتحاول بكل الطرق إنها تفرَّق بينه وبين حبيبته، لحد ما ده يحصل فعلًا لكن بيرجعوا لبعض في النهاية.

حليم غنّى مع عادل إمام أغاني الفرقة، ويُقال إن حليم حبس مؤلف المسلسل الكاتب محمود عوض لحد ما يخلص الكتابة. المسلسل من إخراج محمد علوان.


3- أحلام بالتقسيط المريح:

المسلسل ده سبق فيلم أحلام حقيقية بـ 30 سنة مثلًا. "عادل" (عبد المنعم إبراهيم) بيحلم أحلام وبتتحقق، ولما أهل الحتة عنده يعرفوا ده، بيبدأوا يروحوا له ويتقربوا منه عشان يحلم لهم أحلام تحقق اللي هما عايزينه، وبيدخل في مغامرات وتفاصيل كتير مع الناس.
المسلسل ضم ثلاثي عظيم، من عبد المنعم إبراهيم وجورج سيدهم ونبيلة السيد. ومن تأليف: عصام الجمبلاطي، وإخراج: محمد حامد

4- لست شيطانًا ولا ملاكًا:

لازم نقول إن من أهم الحاجات الجميلة في المسلسل ده إن اللي غنّى التتر "ليلى مراد"، وإن المسلسل بالنسبالي أفضل من الفيلم.

المسلسل بيبدأ بمشهد بتتخانق فيه "كوثر" (نجلاء فتحي) مع أبوها عشان تتجوز "شميس" (صلاح منصور)، بسبب غناه اللي هينقذها هي وأهلها من الفقر. بنكتشف بعدها إنها سابت "أحمد" (محمود ياسين)، عشان تتجوز شميس، وبتبدأ كوثر تدخل مجال الأعمال، وبتتحول لست محبوبة من العمال، لحد ما تقترح على شميس إنه يشتري مشروع "مضرب رز"، اللي بيشتغل فيه أحمد، في الوقت ده بيُعجب أحمد بـ "ناهد" (مديحة كامل) وبيشغلها معاه في المضرب، وتتوالى الأحداث ويموت شميس، ويظهر احتياج كوثر لأحمد.
مع الوقت بيقرر "سامي" (كمال حسين) ابن جوزها إنه يخطط لقتلها عشان ياخد منها اللي ورثته من أبوه، وبيحصل اللي خطط له، لكن بتعيش في نهاية المسلسل. الفيلم بنفس الاسم بس بأبطال مختلفين، سهير رمزي ونور الشريف.

5- الصبر في الملاحات:

تهمة حيازة مخدرات بتلبسها سناء جميل لـ "الست حُسنية" (تحية كاريوكا) وبسببها تتحبس 25 سنة، وسايبة عيالها وراها، بتحس بتأنيب الضمير فتروح تزور ولاد الست اللي حبستها، وتاخد معاها بنت منهم وتربيها. تكبر "وفاء" (نبيلة عبيد)، وتدخل كلية الشرطة، وبيصادفها مقابلة أخوها الحرامي اللي بالتدريج وبدون قصد هيدلها على الحكاية من أولها، بتبدأ وفاء رحلة البحث على الست حسنية، وتلاقيها بالفعل وتسمع منها الحكاية كلها وتكتشف وفاء إن سناء جميل مش أمها. وتحصل المواجهة.
بينتهي المسلسل بـ إن كوثر تروح تعترف على نفسها، وتخرج حسنية من السجن. المسلسل قصة واخراج: سمير عبد العظيم

6- كل هذا الحب:

صوت محمود ياسين في مقدمة المسلسل وهو بيقول "كل هذا الحب" من أعظم الأصوات اللي عدت على الإذاعة. "كل هذا الحب" قصة من قصص الحب في السينما اللي انتهت بشكل مآساوي، واللي اتحوّلت لمسلسل إذاعي ونجاحه ماقلش عن نجاح الفيلم.

قصته بتحكي عن اتنين تجار بتجمعهم صداقة وشراكة، اشتغلوا مع بعض وده اتجوز وده اتجوز، وفي يوم تاجر منهم رجع البيت لقى مراته بتخونه، فقتلها ودخل السجن ومات فيه، والتاجر التاني أخد ابن صاحبه، وبقى بيعامله زي أولاده، الولد بدأ يميل لبنت التاجر، والبنت بتبادله نفس المشاعر. الأب ماكنش راضي عن الجوازة، عشان أبوه قتل أمه وأمه كانت خاينة، فـ استحالة الجوازة تتم. البنت تهرب مع الولد، ويتجوزوا ويخلفوا، بعدها الأب يلفق تهمة اختلاس للولد، ويدخله السجن.

تعدي الأيام وتروح الزوجة السجن ومعاها الولد، جوزها بيشوفه ويسألها عن تفاصيل، زي مكان ما هي قاعدة والناس اللي قاعدة عندهم، في الوقت اللي هي بتسأله عن تسمية الولد، "أسمي الولد إيه؟ أسمي الولد إيه؟" ومابيردش
بعد ما خرجت من الزيارة، تلاقي رجالة أبوها خاطفينها، وأبوها يعنفها ويأنبها، لحد ما هي تموت.

الأب بيخرج من السجن، عشان يدور على ابنه، مش لاقيه، يورح للناس اللي البنت كانت قاعدة معاهم، يقولوا "وديناه القسم والقسم وداه ملجأ" يروح الملجأ يلاقيه اتاخد، وتبدأ رحلة البحث عن الولد بشكل أوسع، وبقى بيقابل أطفال كتير في محاولة منه إنه يتعرف على ابنه.
وفي النهاية بعد يأس كبير، لقى ولد بيرسم، وحس إنه شبهه ونفس الأسلوب – واتبناه على أساس إنه ابنه.

7- ومن أهم المسلسلات اللي كانت بتتذاع في السبعينات، مسلسل "سيد مع حرمه"، كان بيعرض مشاكل المحتمع المصري عن طريق مونولوجات لمدة 5 دقايق لكل حلقة.
مجموع حلقات المسلسل 52 حلقة، هتلاقيهم هنا:

المسلسل كان من بطولة سهير البابلي، وسيد الملاح
وكتابة حسين غباشي.

8- علشان سواد عيونها:

طالما بنتكلم عن مسلسلات إذاعية، يبقى نتكلم عن أشهر ثنائي عمل مسلسلات إذاعية، فؤاد المهندس وشويكار، طبعًا من أشهر المسلسل الإذاعية اللي عملوها سوا: "أنت اللي قتلت بابايا" و "شنبو في المصيدة" و "لو يا دنيا" و "دنيا بنت دنيا" و "دليلة" و "الفك المفترس"
بس حبيت اختار منهم المسلسل المفضل بالنسبالي.
قصته بتحكي عن ممثل مشهور وبيحب بيّاعة فل، وبتبيعه قدام المسرح اللي بيمثل فيه كل يوم، والتفاصيل بتدور حوالين قصة الحب دي، بس بينتهي المسلسل على إنهم مايتجوزوش.

تقدر تشوف مسلسلات تانية كاملة ونادرة من هنا 
ومسلسلات مجمعة على صفحة الإذاعة المصرية على اليوتيوب 

2018 كانت محظوظة بضم عدد مش قليل من الملسلسلات الإذاعية اللي بتتذاع حاليًا، بعد ما أكد مصدر في الإذاعة إن تكلفة ميزانية المسلسلات الإذاعية اللي بتتعرض على كل الشبكات في ماسبيرو حوالي مليون جنيه، هتقسمهم الإذاعية نادية مبروك، رئيسة الإذاعة على كل الشبكات حسب النجوم الموجودين اللي هيشاركوا في كل عمل.
ومن أهم المسلسلات اللي بتتعرض حاليًا:
- مسلسل "لحن بتلو" بطولة هنيدي ونرمين الفقي، وبيتذاع على اذاعة 9090، وعلى نفس الإذاعة هتقدر تسمع "الجن الأزرق" اللي بيشارك فيه أبطال مسرح مصر.
- مسلسل "كمال جت تالنت" بيجمع بين ماجد الكدواني وحنان مطاوع في أول تعاون بينهم، وهيتذاع على إذاعة Drn
- مسلسل "رحلة حرب الشبكشي" بطولة هبه مجدي وأحمد رزق وأشرف عبد الغفور على إذاعة القاهرة الكبرى 
- مسلسل "ألف نهار ونهار" لـ هاني رمزي ونشوى مصطفى على راديو وان
- مسلسل "لست وحدك" بطولة الفنان جمال سليمان، ومنة فضالي ونضال الشافعي على إذاعة البرنامج العام
- مسلسل "أنا والفلوس وهواك" بطولة مي كساب وسامح حسين وبيتذاع على إذاعة الشباب والرياضة
- مسلسل "هارب من عش الزوجية" بطولة حسن الرداد وسهر الصايغ على إذاعة صوت العرب
- مسلسل "دوخيني يا لمونة" بطولة ياسمين عبد العزيز وكريم محمود عبد العزيز على نغم FM
- مسلسل "رسالة إلى الوايلي" اللي بيشارك فيه يسرا وحسن حسني وصلاح عبد الله وعبد الرحمن أبو زهرة على نجوم FM
ولمحبين الرياضة فيه خبر سعيد، إن بيتم عرض مسلسل "شارع المونديال"، من تأليف الدكتور ياسر أيوب، ومن بطولة مجموعة من نجوم الرياضة زي شوبير وخالد الغندور وإسماعيل يوسف ومجدي عبد الغني على إذاعة الشباب والرياضة، الساعة 3:30 العصر، وعلى إذاعة راديو مصر الساعة 5 مساءً.
المسلسل قصته بتحكي أحداث وكواليس حصلت في تاريخ كأس العالم.