مسلسلات رمضان ماعداش عليها أسبوع، رغم كده القواضي اشتغلت، وبقى في أكتر من مسلسل اترفعت عليهم دعاوى قضائية لأسباب مختلفة. موقع "الوطن" عمل تقرير مجمع بالقواضي اللي اترفعت على المسلسلات بعد نهاية أول 5 أيام من رمضان. 

مسلسل "كلبش 2":

أول حلقة في المسلسل تناولت وجود خلية إرهابية موجودة في الفيوم، وبيشارك سليم الأنصاري في حملة أمنية لتطهير المنطقة من الإرهاب. ده أغضب عدد من أهالي الفيوم، ووصل الموضوع لإن محامي في المحافظة رفع دعوى قضائية ضد فريق العمل وطلب بإيقافه.

مسلسل "نسر الصعيد":

ضباط في مدينة الرحاب رفعوا دعوى قضائية على على مسلسل نسر الصعيد بطولة محمد رمضان، بعد ما رمضان قال في المسلسل لضابط زميله: "وربنا أنت كان لازم تشتغل في قسم شرطة الرحاب"، 

مسلسل "أبو عمر المصري":

الروائي عز الدين شكري فشير اتفاجئ بإن اسمه مش على تترات المسلسل، رغم إن المسلسل متاخد من عملين روائيين ليه، اللي هما "أبو عمر المصري" و "مقتل فخر الدين"، وده اللي خلاه يقرر يرفع قضية على منتج المسلسل عشان يحفظ حقه الأدبي.

مسلسل "ربع رومي":

في محامي رفع قضية على أسرة المسلسل، اعتراضًا على مشهد بيهين مهنة المحاماة على حد وصف صاحب القضية، المحامي قال في البلاغ إن المسلسل بين المحامي بشكل ساذج وظهر القاضي وهو بيحلف بالطلاق وبيهدد المحامين.