رمضان يعني المسلسلات والمسلسلات يعني رمضان، فاضل أقل من شهر، اعرف المسلسلات اللي هتتعرض من دلوقتي واعرف هتتفرج عليها على إيه.

ليالي أوجيني

ظافر العابدين وأمينة خليل هيتشاركوا السنة دي في بطولة مسلسل متاخد من رواية إسبانية، عن بنت صغيرة اتولدت في إسبانيا وبقت إمبراطورة فرنسا في القرن اللي فات. بس معالجة المسلسل مش هتكون تاريخية. وللناس اللي بتهتم بالمخرجين أكتر من الممثلين، وجود مخرج زي هاني خليفة هيكون نقطة جذب زيادة، والناس بتستنى دايمًا عشان تشوف مخرج "سهر الليالي" هيقدم إيه.

بطولة: إنجي المقدم – انتصار – مراد مكرم – مريم الخُشت

تأليف: سماء عبد الخالق

إخراج: هاني خليفة

القنوات: CBC

كلبش 2

رائعة المخرج بيتر ميمي وأنشودة أمير كرارة الخالدة. الجزء التاني من مسلسل "كلبش" اللي جزءه الأول كسر الأرقام القياسية في المشاهدات السنة اللي فاتت. أمير كرارة بيتعاون مع نفس المخرج، وبرضه باهر دويدار هو المؤلف. ويا ترى يا هل ترى سليم الأنصاري هيحارب مين وينصر مين في الجزء ده ويا ترى هيعيش لحد ما يعملنا جزء تالت ولا ربنا هيشملنا برحمته؟

بطولة: روجينا – هالة فاخر – هيثم أحمد زكي – محمود البزاوي – أشرف زكي

تأليف: باهر دويدار

إخراج: بيتر ميمي

القنوات: ON E

أيوب

مصطفى شعبان مش بيتجوز ومش بيطلق ومش ماسك سبحة وبيقلد نور الشريف في العار للعام المش عارف كام على التوالي، لا ده احنا نتفرج بقى! تريلر المسلسل جاب مشاهدات عالية بعد كام ساعة من نزوله. كمان أول حاجة هتقراها في التريلر إنه مأخوذ عن قصة حقيقية، وده ممكن يخلي الناس تهتم أكتر. كمان مؤلف المسلسل هو محمد سيد بشير، اللي آخر أعماله كان "هروب اضطراري" ووصل بيه لأعلى إيرادات في تاريخ السينما المصرية، فيا ترى هيوصل لفين في مسلسله الجاي؟

بطولة: آيتن عامر – حسن حسني – محمد لطفي – هنا الزاهد

تأليف: محمد سيد بشير

إخراج: أحمد صالح

القنوات: MBC Masr

منطقة محرمة

خالد النبوي بعد ما عمل رائعة بهاء طاهر "واحة الغروب" السنة اللي فاتت، جاهز لرمضان ده بمسلسل "منطقة محرمة". المسلسل له تريلر قصير على يوتيوب، مش مبين أي حاجة بس المزيكا والمود العام بيقولوا إنه غموض وإثارة وتشويق وأكشن وحاجات كده. مخرج المسلسل هو محمد بكير، اللي معروف للجمهور بأعمال ناجحة زي "طرف تالت" و "المواطن إكس" و "السيدة الأولى"، هنشوف هيطلعلنا إيه السنة دي.

بطولة: محمود عبد المغني – محمد كيلاني – إنجي شرف

تأليف: يوسف حسن يوسف

إخراج: محمد بكير

القنوات: الحياة

ممنوع الاقتراب أو التصوير

في فيلم بنفس الاسم نزل سنة 2017 وكان من بطولة ميرفت أمين ويسرا اللوزي، وحسب موقع السينما، هو ماجابش نص مليون جنيه إيرادات، وده مش عيب فيه خالص،  بس فعلًا مش فاكر الفيلم تمامًا، نتمنى المسلسل يكون حظه أحسن من الفيلم. المسلسل بطولة زينة ولسه مافيش تريلر نزل بس في انتظاره يعني. مفروض بيتكلم عن بنت بتنتقل من إسكندرية للقاهرة عشان تدور على حلمها في الشهرة والنجومية، بس شوية "لبش" من الماضي بيطاردوها.

بطولة: فتحي عبد الوهاب – نسرين الإمام – محمد شاهين

تأليف: محمد الصفتي

إخراج: زياد الوشاحي

القنوات: MBC Masr

أرض النفاق

أنا هزعل جامد لو بوظتوا الفيلم وماطلعتوش مسلسل حلو، هزعل والله. بس متحمس أشوف الجمال اللي قدمه فؤاد المهندس عن رواية يوسف السباعي، هيتحول لمسلسل ازاي، متحمس كمان اتفرج على هنيدي في الدور ده، وعلى إبراهيم عيسى وهو بيمثل. المسلسل هيكون سيناريو أحمد عبدلله اللي قدم أعمال كوميدية عظيمة زي "الناظر" و "عبود على الحدود" وإخراج محمد العدل.

بطولة: هنا شيحا – إبراهيم عيسى – دلال عبد العزيز – بوسي

تأليف: أحمد عبدلله عن رواية يوسف السباعي

إخراج: محمد العدل

القنوات: الحياة

رسايل

مي عز الدين والله أعلم، عاملة في المسلسل دور بنت بتشوف المستقبل. بس والله هو لو علمتم الغيب لأخترتم الواقع يعني! المهم إن المسلسل من للمخرج إبراهيم فخر، اللي مي عملت معاه قبل كده مسلسلات "وعد" و "حالة عشق" وأشهر مسلسل ليه هو "ابن حلال". هنشوف المستقبل مخبي إيه لمي في رمضان الجاي.

بطولة: خالد سليم – مهما أحمد – أحمد حاتم – رازان مغربي

تأليف: محمد سليمان عبد الملك

إخراج: إبراهيم فخر

القنوات: ON E

طايع

تأليف محمد دياب وخالد دياب وشيرين دياب وإخراج عمرو سلامة وإنتاج رامي إمام وبطولة عمرو يوسف وأنا مش متفائل. المسلسل كانت حصلت عليه مشاكل قبل كده واتهامات لمحمد رمضان بسرقة المعالجة بتاعته وحوارات كتير كده. قصة المسلسل بتدور في إطار واحد بيحاول يثبت براءته وفي تهريب وطب وحاجات كده، بس ماتدورش على قصص وخليها مفاجأة وإن شاء الله خير.

بطولة: صبا مبارك – عمرو عبد الجليل – سهير المرشدي – مي الغيطي

تأليف: محمد دياب – خالد دياب – شرين دياب

إخراج: عمرو سلامة

القنوات: CBC - Saudi TV Channel

عوالم خفية

"عادل إمام" بيحجز وقت ليه كل رمضان على الفطار، السنة دي هيظهر في مسلسل "عوالم خفية" في دور صحفي بيدوَّر على مستندات حكومية متكتِّم عليها، وبينجح فعلًا في نشرهم بس بعدها حياته بتتقلب.

بطولة: عادل إمام، فتحي عبدالوهاب، هبة مجدي، بشرة، رانيا فريد شوقي وصلاح عبدالله.

إخراج: رامي إمام

تأليف: أمين جمال

هيتعرض على: CBC وقناة التلفزيون السعودية.

نسر الصعيد

"محمد رمضان" لتاني مرَّة هيظهر في دور ضابط في مسلسل "نسر الصعيد". القصة بتدور حوالين ضابط قوات مسلحة اتنقل من الصعيد لشمال سيناء عشان يواجه الإرهاب هناك.

بطولة: محمد رمضان، درة، سيد رجب، وفاء عامر، ومحمود الليثي.

إخراج: ياسر سامي

تأليف: محمد عبد المعطي

هيتعرض على: DMC وقناة دبي.

بني يوسف

هتشوف في المسلسل "يسرا" و"شيرين رضا" و"نجلاء بدر" و"أحمد حاتم" و"لطيفة فهمي"، التلاتة اشتغلوا مع بعض قبل كده في مسلسل "فوق مستوى الشبهات". السنة دي المسلسل بيدور حوالين حياة مستشارة قانونية والمشاكل اللي بتقابلها في شغلها.

بطولة: يسرا، شيرين رضا، أحمد حاتم، محمد شاهين، ونجلاء بدر.

إخراج: محمد علي

تأليف: عبد الله حسن، أمين جمال وإبراهيم محسن وخالد أبو بكر

هيتعرض على: قنوات الحياة

أبو عمر المصري

القصة متاخدة من رواية بنفس الإسم للروائي "عز الدين فشير" بتتكلم عن محامي بيحارب الفساد قبل ما يتطرف ويسافر السودان، والمسلسل من بطولة "أحمد عز" و"أروى جودة".

بطولة: أحمد عز، أمل بشوشة، عباس أبو الحسن، فتحي عبدالوهاب، ومحمد الشرنوبي.

إخراج: أحمد خالد موسى

تأليف: عز الدين شكري فشير

سيناريو وحوار: مريم نعوم

هيتعرض على: On E

إختفاء

"نيللي كريم" في رمضان .. نكد برضه؟ مسلسل "الإختفاء" بتمثل فيه "نيللي" دور مراة دكتور روسي اختفى فجأة.

بطولة: نيللي كريم، هشام سليم، بسمة، محمد ممدوح

إخراج: أحمد مدحت

تأليف: أيمن مدحت

هيتعرض على: DMC

بالحجم العائلي

"يحيى الفخراني" و"ميرفت أمين" لأول مرَّة بيتعاونوا من 31 سنة، في مسلسل بيجسد فيه "الفخراني" دور دبلوماسي سابق قرر يشتغل شيف بعد ما طلع على المعاش. بالمناسبة "يحيى" ماكانش ليه مسلسل السنة الفاتت في رمضان.

بطولة: يحيى الفخراني، ميرفت أمين، يسرا اللوزي، أحمد مجدي، ورمزي لينير.

إخراج: هالة خليل

تأليف: محمد رجاء

هيتعرض على: DMC والتلفزيون السعودي.

خط ساخن

خبر سار للي بيحبوا الفنانة السورية "سلاف فواخرجي"، هيلاقوها بتجسد دور ممرضة بتتعامل مع الحالات اللي بتحاول تنتحر بس فجأة بيتم إتهامها بجريمة قتل.

بطولة: سلاف فواخرجي، نضال الشافعي، حسين فهمي، صلاح عبدالله، وصابرين.

إخراج: حسني صالح

تأليف: فوزية حسين

هيتعرض على: TBC

ضد المجهول

من سنة 2010 و"غادة عبد الرازق" كل سنة ليها مسلسل في رمضان، السنة دي"غادة" طالعة موظفة بنك بتتطلق بسبب شغلها وجوزها بياخد منها بنتها، فكرة مش جديدة، لكن المختلف شوية إن بنتها هيتم إغتصابها وهي اللي هتنتقم بنفسها من المغتصب.

بطولة: غادة عبد الرازق، حنان مطاوع، روجينا، فارس سعيد ورانيا منصور.

إخراج: طارق رأفت

تأليف: أيمن سلامة

هيتعرض على: On E

ربع رومي

بطولة مطلقة لأول مرة لـ مصطفى خاطر، بعد ما قدر يثبت نجاحه في الدراما التليفزيونية. قصة المسلسل بتدور حوالين شابين من مستوى بسيط، بيحاولوا يحققوا نجاح في شغلهم بس بتصادفهم مشاكل. 
بطولة: مصطفى خاطر، هالة فاخر، بيومي فؤاد، إدوارد
تأليف: محمد الشواف
إخراج: معتز الرومي
القناة: ON

سك على اخواتك

من مسرح مصر لـ الدراما في رمضان، علي ربيع بيشارك في مسلسل قصته بتدور حوالين ممرض في الوحدة البيطرية في محافظة من محافظات الصعيد، ويعرف إن والده لسه عايش وغني وعنده شركات، فـ هيقرر السفر للقاهرة وحياته هتتغير.
بطولة: علي ربيع، سلوى خطاب، صلاح عبد الله
المخرج: وائل إحسان
القناة: MBC مصر

أفراح ابليس (الجزء التاني)

2009 كانت وش السعد على جمال سليمان، اللي عرفناه أول مرة بـ "أفراح إبليس – الجزء الأول" وحقق نجاح كبير
جزء جديد من المسلسل، بيظهر فيه "همام" رجل الأعمال، ومراته "جمالات" اللي بتشغل خدامة عندها بهدف العطف عليها، بس المفاجآة بتصل لما جمال سليمان يحبها.
بطولة: جمال سليمان، صابرين، محمود عبد المغني، كمال أبو رية.
تأليف: مجدي صابر 
المخرج: أحمد خالد أمين
القناة: MBC مصر

عزمي وأشجان

قصص الحب الأسطورية زي "روميو وجوليت" و"قيس وليلى"، انضمت لها في قصة حب جديدة ولعت في الدرة، بينها وبين الفنان كمال أبو رية في مسلسل طائر الحب، والمسلسل ماخدش حقه غير لما ابتدى تريند الكلام عنه على السوشيال ميديا، من هنا جت الفكرة لمسلسل "عزمي وأشجان"، القصة بتدور حوالين عصابة نصب مكونة من اتنين حرامية، وبتحصلهم مواقف كوميدية لما بيقرر ظابط انه يمشي وراهم.
بطولة: حسن الرداد، ايمي سمير غانم، نسرين أمين، ملك قورة
تأليف: أحمد محيي
إخراج: إسلام خيري
القناة: النهار

السهام المارقة

المسلسل ده من إنتاج معز مسعود، وبيجمع نجوم من الوطن العربي، من مصر هيشارك شريف سلامة وهاني عادل ووليد فواز، من تونس عائشة بن أحمد ومن لبنان دياموند أبو عبود ومن السعودية هشام فقيه ومن العراق كامل إبراهيم
المسلسل هيناقش قضايا اجتماعية مختلفة، منها الإرهاب.
بطولة: شريف سلامة، شيري عادل، هاني عادل
تأليف: محمد وخالد وشيرين دياب
إخراج: محمود كامل
القنوات: أبو ظبي، CBC

المعجزة

كنا مستنيين دينا الشربيني تظهر مع فريق العمل في حاجة مختلفة، بس هتظهر السنة دي مع مصطفى فهمي في مسلسل درامي قصته بتدور حوالين زوجة بتدخل في صدمة نفسية بعد ما جوزها يعمل حادثة.
بطولة: دينا الشربيني، مصطفى فهمي، عمر السعيد
تأليف: محمد سليمان عبد الملك
إخراج: شريف إسماعيل وهيشرف على الإخراج: أحمد نادر جلال
القناة: CBC

الوصية

أكرم حسني حجز مكانه كل رمضان، بمسلسل خفيف كوميدي والسنة دي هتكون لِيه اللبطولة المطلقة في مسلسل كوميدي حلقاته هتكون منفصلة.
بطولة: أكرم حسني، أحمد أمين، ريم مصطفى
تأليف: أيمن وتار 
المخرج: خالد الحلفاوي
القناة: CBC

رحيم

من سنة فاتت ماكنش حد ممكن يستنى مسلسل بطولة ياسر جلال بس بعد اللي عمله في ظل الرئيس بقت الناس مستنية ايه اللي هيعمله ياسر جلال، المسلسل تأليف نفس مؤلف ظل الرئيس وده هيخلي الناس عندها ثقة اكتر فيه.

بطولة: ياسر جلال، محمد رياض، نور

تأليف: محمد إسماعيل أمين.

إخراج: محمد سلامة.

قنوات CBC.

أمر واقع

هو أول بطولة مطلقة لكريم فهمي اللي بيلعب دور ظابط بيتكلف بمهمة لمكافحة الإرهاب.

بطولة: كريم فهمي، نبيل الحلفاوي، نجلاء بدر، ريم مصطفى.

تأليف: محمد رفعت.

إخراج: مجدي السميري.

قنوات DMC.

فوق السحاب

المسلسل بطولة هاني سلامة وهو مسلسل اكشن، -واضح كده إن الأكشن مسيطر السنة دي-، عن واحد هيتسجن ويهرب من السجن ويسعى للانتقام.

بطولة: هاني سلامة، سيمون، شادي ألفونس.

تأليف: حسان دهشان.

إخراج: رؤوف عبدالعزيز.

قنوات النهار.

الرحلة 710

المسلسل عن مجموعة أشخاص اتقابلوا على رحلة طيارة رقمها 710  طالعة من بيروت للقاهرة، وكلهم مرضى نفسييين بدرجات متفاوتة وبيخفوا مرضهم ده.

بطولة: باسل الخياط، مي سليم، ريهام عبدالغفور، محمود حجازي.

تأليف: نور شيشكلي وعمرو الدالي.

إخراج: حسام علي.

قنوات DMC.

اهو ده اللي صار

مين مش هيستنى مسلسل لروبي؟ خصوصا لو تأليف عبدالرحيم كمال اللي ابدع دهشة والرحايا والخواجة عبدالقادر.

بطولة: روبي، محمد فراج، احمد داود، سوسن بدر.

تأليف: عبدالرحيم كمال.

إخراج: حاتم علي.

قنوات ON

قانون عمر

لما بفكر إن حمادة هلال بيعمل مسلسل بفتكر صور الفوتوشوب لنجاح مسلسل "طاقة القدر" ومنافسة مسلسل الأسطورة، بس ما علينا خلينا نتمنى إن ده يكون مسلسل كويس.

بطولة: حمادة هلال، لقاء سويدان.

تأليف: فداء الشندويلي.

إخراج: أحمد شفيق.

قنوات MBC  مصر.

بركة

عمرو سعد ممثل شاطر، حتى لو مسلسلاته مبتنجحش النجاح الكافي، بس المسلسل ده في إطار كوميدي شوية اول مرة يعمله عمرو سعد، وأول تجربة للمؤلف والمخرج هو اللي عمل فيلم رغدة متحوشة فالموضوع يخوف، بس ادينا هنشوف.

بطولة: عمرو سعد، هالة صدقي، إنعام سالوسة.

تأليف: محمد الشواف.

إخراج: محمود كريم.

قنوات MBC مصر.