الستات في العالم العربي بيعيشوا في صندوق معين ماينفعش يخرجوا منه، يمكن فيه كتير منهم بيكسر القوالب، وكتير بيتحدى المجتمع، بس بشكل عام بيفضل الموضوع ده أصعب من الستات في دول تانية، وكل مرة بتنجح ست إنها تكسر حيطة بتمنعها من الوصول لنقطة معينة، بيمشي وراها ستات تانيين ويحققوا إنجازات ويغيروا شكل الست في العالم العربي. "رها محرق" قدرت تغير في التاريخ سنة 2013، لما بقت أول ست سعودية تتسلق "إفرست" أعلى قمة جبل في العالم.

"رها" كانت أصغر عربية قدرت تتسلق أعلى 7 قمم في العالم، وبقت أول سفيرة عربية للعلامة التجارية السويسرية Tag Heuer وبتكتب دلوقتي كتاب لتشجيع الستات العربيات على متابعة أحلامهن، بغض النظر عن كل المشاكل الاجتماعية اللي ممكن تقابلهم، وكل ده هي عملته قبل ما تكمل 30 سنة، بتقولنا "رها": "أنا ماكنتش عايزة أكون جوه القالب اللي بيكون جواه الستات في مجتمعي وده كان سببي الأول عشان اطلع الجبل".

لو هنبص على الدول العربية من ناحية حرية الستات، فأكيد هتبقى نظرتنا إن الست في السعودية مابتاخدش حقوقها وبدأت مؤخرًا تاخد مميزات جديدة زي سواقة العربيات والشغل والحفلات والتشجيع في الملاعب، وعشان كده، اللي عملته "رها" من 5 سنين تأثيره كان أكبر، كفاية تعرف إنها خاضت حوارات ومشاكل مع والدها عشان تحصل على إذن بالتسلق موثق وممضي منه، بتحكيلنا "رها": "هو كان مش موافق عشان قلقان عليا، وعشان المشاكل الاجتماعية في السعودية اللي بتمنع الست تعمل أعمال تصنف ذكورية، بس لو كان قال لا كنت هفضل أعند واثابر لحد ما يوافق"، بتضحك المتسلقة السعودية وبتكمل كلامها: "كل مرة كنت بروح اتسلق قمة جديدة كانت معركة جديدة بأسباب تانية وكل مرة كنت بحارب وبكسب".

"رها" بتحكيلنا إنها قعدت مع والدتها قبل أول رحلة ليها وبصتلها وقالتلها: "أنتي عارفة اللي بتعمليه كويس؟" وردت "رها" اللي كان عندها 27 سنة وقتها، "أيوه أنا بواجه المجتمع وده هيدمر حياتي الاجتماعية هنا"، ردت الأم: "وأنتي مرتاحة وأنتي بتعملي ده؟ " فجاوبت البنت: "أيوه، لأني صادقة مع نفسي وبعيش حياتي زي ما أنا عايزة، لو ماعملتش كده مش هكون نفسي".

قوة "رها" مش بسبب إنها قدرت تتسلق الجبال وهو أمر صعب، لكن بسبب إنها قدرت تتسلق على المجتمع وقواعده وتقنع أسرتها، وكان عندها إرادة عشان تكون صادقة مع نفسها لحد ما توصل للي هي عايزاه، وده خلى الستات اللي في نفس ظروفها يبقى عندهم أمل أكبر، بتقولنا "رها": "اللي أنا بعمله مالوش علاقة بالنسوية، أنا بس مؤمنة إنك لازم تتمسك باللي عايزه أيا كانت العواقب، حتى لو هتخسر الحاجة، لازم تكون جرئ لحد ما توصل للي أنت عايزه.

الأيام دي كتير من البنات والستات بيطلبوا منها النصيحة عشان يتسلقوا الجبال، "رها" بتوضحلنا: "بنات من العالم كله بيبعتولي مسجات يطلبوا المشورة بخصوص تسلق الجبال، ودايمًا بكلم ناس ماعرفهمش شخصيًا من خلال Skype، دي حاجة رائعة إن حد مايعرفنيش يقرر يكلمني، فأكيد هرد عليه". بتحاول المتسلقة السعودية تمشي في طريقها لقدام، "الخوف من الفشل هو أكتر حاجة لازم اتغلب عليها، لو ماعملتش كده مش هوصل لأي حاجة".

سألناها عن التغييرات اللي بتحصل دلوقتي في السعودية وقالتلنا: "بصراحة ماكنتش متخيلة إني هعيش لليوم اللي الست هتبدأ تاخد فيه حقوقها وتقود عربيات في السعودية، بس ده تغيير إيجابي، ولو ده ممكن يتحقق يبقى كل حاجة تاني ممكنة". بالرغم من كل النجاحات اللي حققتها المتسلقة السعودية اللي بقى عندها 32 سنة، بتقولنا وهي بتضحك: "والدتي لسه بتسألني عن العريس".

You can follow her on Instagram @rahamoharrak.

All images courtesy of Tag Heuer.