إنجليزي بس مش إنجليزي، عربي بس مش بالعربي، جواه أرقام بس مش للعد، عروستي؟ ولا عرفت إن الكلام عن الفرانكو؟ عمرك سألت نفسك في لحظة تجلَي، كيف بدأ الخل..، قصدي الفرانكو؟ ليه نستخدم ستة وعشرين حرف من الإنجليزي واحنا ربنا مدينا تمانية وعشرين حرف، كل حرف منهم قضينا وقت كتير نوصَل في نقط ونمشي ع الخط في المدرسة علشان نعرف نكتبه؟ أكيد في سبب يخلينا نعمل كدة في نفسنا ولا هي عقدة الخواجة يعني؟

الفرانكو هو كتابة العربي بحروف إنجليزي zay keda، وطبعًا بما إن العربي فيه حروف مش موجودة في الإنجليزي وبيطلع عينينا علشان نعرَف الأجانب ينطقوهم ازاي، الحروف العربي اللي مش موجودة في الانجليزي بدلناها بأرقام شبهها 3ashan ne7l el 2azma de. على قد ما إن الفرانكو مابدأش كعقدة خواجة، لكن الخواجة كان له يد في نشأته؛ الموضوع كبير وفيه حواديت من التاريخ البعيد شوية والقريب كمان. على عكس المتوقع، الفرانكو مابدأش من باب الروشنة، الفرانكو بدأ من باب الحاجة والمقاومة.

زمان، زمان أوي، بعد سقوط الأندلس من إيد العرب المسلمين سنة 1492 وظهور محاكم التفتيش الإسبانية، حال العرب المسلمين ماكانش جميل خالص. استخدام الحروف العربية كان ممنوع تمامًا وبيعرضهم للخطر، عملوا إيه العرب اللي عايزين يتكلموا عربي؟ اتصرفوا ومشّوا حالهم بالحروف المسموح الكتابة بيها، واللي هي الحروف اللاتينية المستخدمة في الإسباني -اللي هي زي حروف الإنجليزي يعني- تقدر تقول كتبوا حاجة زي الفرانكو –الله أعلم سموها إيه وقتها- من باب المقاومة. وآه، استخدموا الفرانكو قبل ما يبقى ماينستريم.

زمان تاني، بس مش زمان أوي خالص، أيام ما كان مواقع التواصل الإجتماعي اسمها مواقع دردشة وغرف محادثات، المواقع دي ماكانتش بتدعم الحروف العربية في بداية ظهورها. مش بس كدة، على حسب كلام جيل التمانينات اللي عاشر الفترة دي، المواقع اللي نعرفها دلوقتي زي هوتميل وياهو، لما كانوا "غرف محادثات" كانوا آه بيدعموا العربي، لكن مش بيدعموه أوي! كنت تقدر تكتب فيهم بالعربي، لكن ماكنتش هبقى متدلع زي لو كتبت بالإنجليزي. مثلًا، على هوتميل كنت تقدر تعمل كود بينك وبين أصحابك بحيث إن لو حد تاني قرا كلامكم مايفهمهوش، إزاي بقى؟ ببساطة، كنت تقدر تربط كلمة بإيموجي معين بحيث كل ما تكتبها تتحول للإيموجي ده، يعني كان ممكن تربط الإكس بتاعك بايموجي قرد مثلًا. حاجة روشة مش كدة؟ لكن الحلو مايكملش بقى، الخاصية دي كانت مع الإنجليزي بس العربي لأ، علشان احنا ولاد البطة السودة. حتى رسايل الSMS، اللي كانت حاجة مهمة وقتها زي ماسنجر دلوقتي، رغم إنها كانت بتدعم الحروف العربية، لكنها كانت بتسمح بنص عدد الحروف بس لو ناوي تكتب عربي، وده كان بيقيّد الشباب اللي كانوا عايزين يرغوا براحتهم وقتها

يعمل إيه الشاب التمانيناتي وهو متحاصر بغرف شات مش بتدعم العربي واللي بتدعمه مش بتدعمه أوي؟ كانت كل السُبل تؤدي إلى الاستسلام لقوى العولمة الشريرة ومَزج العربي بالإنجليزي زي ما عمل إخواننا في الأندلس من سنين كتير، حاجة تمشَي الحال كدة علشان الشباب ينطلق. دلوقتي تقريبًا العرب سيطروا شوية، أو ماسيَطروش يعني بس ع الأقل كل مواقع التواصل الاجتماعي تقدر تكتب فيهم بالعربي بحرَية –إحم-، مافيش محاكم تفتيش مانعانا ولا أي تقييد على الكتابة بالعربي، ليه بقى الفرانكو لسه مالي مواقع التواصل الاجتماعي و مصعّب علينا عيشيتنا ومخلّي ناس تشوفه ضياع للغة العربية الجميلة؟

 مش هننكر إن جزء منه روشنة، أنا مثلًا أول ما دخلت فيسبوك لقيت الناس بتكتب فرانكو لحد ما حسيت إن العربي شكله وحش، فعملت زيهم! ومع الوقت الواحد خد على الكيبورد الإنجليزي أكتر من العربي ونسي أصله بقى. بس برضه، في جزء تاني للموضوع علشان مانظلمش اللي بيكتبوا فرانكو. دلوقتي احنا بنستخدم كلمات إنجليزي كتير في وسط كلامنا علشان العولمة عاملة عمايلها معانا، علشان كدة ساعات بيكون تغيير الكيبورد من عربي لإنجليزي ف نص الكلام مُرهق أو بياخد ثانية زيادة في الكتابة واحنا في عصر السرعة بقى، مافيش وقت نقعد نغيّر، تقدر تقول الفرانكو بقى من باب الاستسهال دلوقتي.