ليه يعني اللاعيبة دول بالذات؟ قاصدين نحفل عليهم مثلًا؟ الحقيقة لأ، هما يعني مش اللاعيبة دول لوحدهم، الكورة في مصر شالت فوق طاقتها يرضي مين؟ بس الكورة في مصر يعني أهلي وزمالك، ولما اللاعيبة دول يوصلوا لمراكز أساسية في الأهلي والزمالك يبقى في حاجة غلط، وفي منهم اللي كان مبشر بس ماكملش، علشان في حاجة غلط برضه. لو متابع كورة على حق هتفتكرهم، ولا أنت مشجع تياري، يبقى حظك حلو ونسيتهم

 1- أحمد رضوان:
الأهلي في الفترة من 2000 ل 2004 مر عليه نماذج عظيمة، نفتكر منهم كابتن أحمد رضوان، الباك اليمين اللي اتنقل للأهلي سنة 2004، إلى الآن ماحدش عارف هو ليه راح الأهلي، وليه لمّا كان صغير قالوله أنت هتلعب باك يمين، ومين اللي قاله إن مستقبلك في الكورة أصلا!

2- أحمد غانم سلطان:
ممكن الناس تستغرب الاسم ده شوية، لأنه كان الباك اليمين الأساسي للزمالك لفترات مش قليلة، بس خليك متأكد إن جمهور الأهلي بيحبه أكتر بكتير من جمهور الزمالك، ومش هوضحلك أكتر من كدة. هو حاليًا فهم اللي فيها وساب الكورة واتجه للجيم والبادي بيلدينج، ربنا يرزقنا بفورمة شبه فورمته.

3- عمرو سماكة:
في قانون غير معلن كل الجمهور عارفه، بيقول إن أي لاعب الأهلي والزمالك بيقطعوا بعض عليه مابيفلحش. سماكة هو النموذج الأعظم، كان لاعب برنس كدة في نفسه، فشل في كل حاجة، فشل يبقى أساسي في الأهلي، وفشل يندّم جمهور الزمالك عليه، وبالمرة فشل في اختبار منشطات وساب الأهلي بفضيحة، وماحدش عارف هو كان عاوز إيه لما قرر يبقى لاعيب كورة؟!
 

4- أحمد علي:
ده تالت باك يمين في القايمة، مش عارف دي صدفة ولا في أزمة في مركز الباك اليمين؟! ظهر بشكل أساسي في الأهلي في الولاية الأولى لحسام البدري، يعني سنة 2009، بعدها راح الشرطة وبعدين المقاولين، أو العكس مش فارقة، المهم إنه ماطولش، وماعتقدش جمهور الأهلي فاكر هو راح فين أو هو حاليًا فين، ماعتقدش إنهم عارفين إيه الظروف اللي سمحت لأحمد علي يكون باك يمين أساسي في فريق كسب الدوري!

5- محمد المرسي:
الزمالك كان له عادة يعرفها جمهوره، أي لاعيب بيجيبله جونين تلاتة بيجروا يشتروه، تقريبًا ده كان بيبقى تخّوف من إنه يطلع لاعب كويس والأهلي يخطفه، فنخطفه احنا من بدري وهو ونصيبه بقى! محمد المرسي واحد من دول، لاعب في القسم التاني وجابله هاتريك في ماتش كان متذاع ع التلفزيون، هوب يلا بسرعة نشتريه، استمر في الزمالك 6 شهور، مش هفتكر منهم ولا يوم تقريبا، بعدها عمل شوية انتقالات في أندية الوسط، آخر خبر شوفته عنه كان في 2015 وبيقول إنه رجع المنصورة، يلا بالتوفيق.

6- سيد مسعد:
ده بقى مش قادر أعرف كان لاعب كويس وصادفه سوء حظ، ولا كان لاعب تعبان وحظه الحلو رماه في الزمالك 6 شهور علشان نفضل فاكرين اسمه؟ رغم إننا مش فاكرين حاجة من لعبه، الراجل يا دوب راح الزمالك وابتدى يبقى معروف جاتله إصابة، بس مش إصابة ملاعب لأ، دي كانت خناقة مع سواق تاكسي ضرب سيد بمطواة علشان كسر عليه، المرور ساعات بيبقى أصعب مما نتخيل. على ما الراجل رجع من إصابته كان خسر مكانه في الزمالك، آخر نادي شوفناه فيه كان تليفونات بني سويف، موسم 2013 – 2014.

 7- محمد طلعت:
وختامه مسك مع محمد طلعت، النجم الشاب اللي طالع بسرعة الصاروخ، كل جمهور الأهلي في فترة اعتبره مهاجم الفريق رقم 1، الغريب إنه اختفى بسرعة زي ما ظهر بسرعة، واتقال عنه الكلام اللي بيتقال عن لاعيبة كتير: غاوي سهر، مش ملتزم، بتاع بنات.  في الآخر النهاية واحدة، خسر مكانه في الأهلي، وبعدها خسر مكانه في الاتحاد السكندري، وبيلعب حاليا في نادي ""خابورة"" في الدوري العماني، بالنسبة لجمهور الكورة في مصر، طلعت خلاص بطل كورة، أو بالأصح مالحقش يلعب أصلا، رغم عمره اللي لسه ماكملش 30 سنة. 
عموما لما جينا نفكر في أسامي لاعيبة طلعوا كلهم من أهلي وزمالك، يمكن لأنهم الأكتر شهرة، وأساميهم معروفة ومحفوظة للجماهير، لكن تقدروا تشاركونا بأسامي لاعيبة كورة دخلوا مجال الكورة غلط، أو لاعيبة تنصحوهم يعملوا كارير شيفت بسرعة.