شهرين ويبدأ كاس العالم، صك الغفران اللي مستنيه مجدي طلبة وطارق السعيد وتارديلي وكل الأجيال السابقة اللي عيشنا معاها انكساراتها، والحلم اللي "بنريّل" عليه من 28 سنة. دايمًا كنت مقتنع إننا هنصعد كاس عالم لما نبطل نهتم بالموضوع، جايز ده اللي حصل! طب حصل إيه سنة 90؟ في 90 كان بينا وبين آخر كاس عالم حضرناها 56 سنة! لازم الفرحة ساعتها كانت أكبر أو جايز برضه لقوا المنتخب بيصعد لما بطلوا يهتموا. المصريين عملوا إيه بعد جول حسام حسن في الجزائر وبعد تعادل هولندا في المونديال؟ الفكرة مش بس في الكورة، كل حاجة بتأثر على استقبالنا للحدث، لو كنا صعدنا في 2010 كان بقى طعمها أحلى من الصعود في 2018، على الأقل بالنسبالي.

كانوا بياكلوا إيه وبيسمعوا إيه؟ بيتفرجوا على إيه والجرايد بتقولهم إيه؟ حياة كاملة اتعاشت وفي وسطها كانت فرحة كاس العالم لناس الكورة بتهون عليهم حياتهم. رحلة الإجابة عن السؤال تبتدي من عند دار الكتب والوثائق المصرية، الأعداد القديمة من جرنال "الأهرام" هتكون مرجع مثالي. بسلم بطاقتي للأمن في الدور الأول، بطلع الدور التاني وبملى ورقة بأرقام الأعداد اللي بدور عليها. عاوز أعداد يونيه 1990، ونوفمبر 1989، يونيه دايمًا هو شهر كاس العالم ونوفمبر وقت صعودنا للبطولة. بستلم مجلد ضخم بيضم كل أعداد الشهر، "خد بالك ممنوع الموبايل ولو عاوز تصور بتملى ورقة وتطلع الدور السادس"، بيقولي الموظف المختص قبل ما يديني اللي جاي أدور عليه. بقلب في الصفحات. مابحبش حبر الجرايد على صوابعي. مابحبش إحساس التراب على إيدي، بس ريحة الورق القديم حلوة، نفاذة. الطريق لسنة 90، بيمر بالنسبالي بتواريخ تانية كتير.

28 يناير 2001 مش 2011

ماتش مصر والمغرب. متجمعين في بيت جدتي حوالين تلفزيون سامسونج 14 بوصة ألوان. مش فاهم ليه كان عندهم كاسيت كبير من أبو بابين بس عندهم تلفزيون صغير؟ ماكسبناش المغرب من سنة 86، بس لازم نكسب لو عاوزين نحافظ على فرصتنا في كاس العالم. حسام حسن راح الزمالك، بس لو هو اللي هيجيب الماتش يبقى مش مهم. عمارة رجله الشمال مسطرة، حسام وميدو الحظ مش معاهم، والله قربت. في الشوط التاني طارق السعيد كان لازم حد يدخل فيه يبطله كورة، ماعرفتش أسامحه غير لما كسبنا المغرب في 2017. خلص الماتش تعادل، في أمل لسه، لو كسبنا المغرب في المغرب والجزائر في الجزائر، نبوس المسيخ الدجال من بوقه أسهل!

صيف 2001

برنامج "اختراق" للإعلامي الشاب عمرو الليثي، حلقة بعنوان "نكسة عدم تأهل مصر لكأس العالم"، تستعرض الحلقة مشوار المنتخب القومي في التصفيات، وما تعرض له اللاعبون من اعتداء وتهديد في المباراة الأخيرة أمام المنتخب الجزائري في الجزائر. مخالفات بالجملة ارتكبها الفريق المضيف، قدمنا ملف كامل للفيفا للمطالبة بإعادة المباراة. لا ضرر من بعض "الكربلائيات"، لا نفع أيضًا. تقول أمي: "صعدنا مرتين من ساعة ما ربنا خلق البطولة سنة 30، نكسة إيه؟!"

18 نوفمبر 2009 مش 2011

كل الظروف مهيأة، كل حاجة كنا عاوزينها تحصل حصلت، كل حاجة بتقول إن مصر رايحة كاس العالم. موبايلي النوكيا عليه فولدر للأغاني اللي اتعملت عن الجزائر قبل الماتش. هنلعب في السودان، يعني الجمهور كله معانا. تريكة مصاب بس هيلعب ومتعب جاهز. دقايق ويبدأ الماتش، البلد فاضية، لو ليك مشاوير وهتعدي على كوبري أكتوبر انزل دلوقتي. الساعة 10:30 خرجنا من القهوة. إلى الآن أقسم بالله ما اعرف إيه اللي حصل، أنا بس نفسي أنساه، كله ساكت وباصص للأرض.

الاتحاد المصري يتقدم بشكوى للفيفا في ضوء تعرض اللاعبين والمشجعين المصريين للخطر والتهديد بالأسلحة المختلفة، قبل وأثناء وبعد المباراة. السيد علاء مبارك يؤكد أن من يشتم المصريين أو يتعرض لهم سيضرب بالحذاء. بعض "الكربلائيات" لا تضر، بعض "الكربلائيات" لا تنتهي. بعض الخيبات لا تعتاد. يا بخت جمهور 90

إيهاب توفيق مولع راس البر

نرجع لمونديال إيطاليا. الرحلة يلزمها ساوند تراك في الخلفية. "سنة 90 منير نزل بالبوم (يا إسكندرية) وكان مكسر الدنيا خصوصًا أغنية (المريلة الكحلي)، كمان سنة 90 شهدت ميلاد النجم إيهاب توفيق بألبومه الشهير (اكمني) اللي كان حديث جمصة ورأس البر، أما منير بقى، الإسكندرانية كانوا فرحانين بيه، لدرجة إنك  تسمع كل أغاني الألبوم وأنت بتتمشي بين المحلات". بيقولي تامر عبد الحميد، مصري في التلاتينات، ورغم إنه وقتها كان طفل، بس فاكر كويس. "اكمني" كان تاني تعارف بين الجمهور وإيهاب توفيق بعد أول ألبوم اللي كان مجمع لمواهب جديدة من ضمنها إيهاب. إيهاب هيكمل وهيوصل لأكتر من 18 ألبوم، بس هيفضل أول ألبوم ليه مرتبط في ذاكرة اللي بيسمعوه بسنة صعود مصر لكاس العالم.

17 نوفمبر 1989 بدء إجراءات محاكمة الريان

ماتقدرش توصل ليونيه 90 من غير ما تعدي على نوفمبر 1989، تحديدًا يوم 17. ماتش واحد بيفصل المصريين عن حلم إيطاليا. ماتش الذهاب خلص 0-0، وعشان نوصل لماتش مع الجزائر، عدينا بمجموعة تصفيات سهلة نوعًا ما، فيها فرق زي ليبيريا ومالاوي وكينيا. الماتش هيكون في ستاد القاهرة، لو كان يستوعب 2 مليون كان هيتملي. يوم الماتش، أو شروق يوم العملية، المانشيت الرئيسي في الأهرام "بدء إجراءات محاكمة الريان والتحفظ على أموال 10 من أسرته.. رئيس الوزراء يعقد اجتماعًا لتقييم الموقف حول شركات الريان". القضية الأشهر في نهاية التامنينات واللي بسببها اتسجن أحمد الريان 21 سنة. في نفس الصفحة، "رئيس الوزراء عاطف صدقي في مفاوضات مع البنك الدولي". خليك فاكر مصر جميلة وممكن مملة شوية!

"مصر والجزائر.. على التذكرة رقم 22 إلى إيطاليا". المانشيت الرئيسي في صدر صفحة الرياضة، وإعلان عن رحلة أسبوع لأي مكان في العالم للاعب اللي هيوصلنا كاس العالم، هنيالك يا حسام يا حسن.

- ماما، تفتكري إيه؟ عن فترة الصعود لكاس العالم 90؟

-- ماكناش في نفس الزخم والدوشة بتاعت دلوقتي، بس بعد ما روحنا كاس العالم بقى في دوشة على إننا عاوزين نروح تاني بعد ما دوقناها مرة. كان اللاعب المصري فيه عادة كدة إنه بيروح يمسك إيد الحكم كل لما يلاقيه هيطلعله إنذار، كانت الناس بتتريق إن الحاجات دي مش هتمشي في كاس العالم.

- اه دي الكوميكس اللي على أيامكم يعني، لعلمك هو إبراهيم حسن عملها في كاس العالم بس عشان ماكانش عاوز الحكم يصفر قبل ما نجيب جول في ماتش أيرلندا

-- طول عمره مجنون.

- مين كان النجم الأول من اللاعيبة؟

-- بالنسبة للجمهور ماكانش في اللاعيب اللي نهتف باسمه من بعد اعتزال الخطيب. الجوهري كان هو النجم الأول للمنتخب ده وهو اللي عمل قيمة لمنتخب مصر وخلاه فوق الأهلي والزمالك.

- والعيشة؟

-- كنت لسه متجوزة جديد وأبوك كان بيقبض حاجة وتلاتين جنيه، بيكفوا الأكل والشرب. اللبس والمرض بيكونوا ترف.

يونيه 90.. الزيادة المحدودة في الأسعار هدفها الإصلاح الاقتصادي وتأمين المستقبل

تصريحات للرئيس محمد حسني مبارك في اجتماعه مع الإعلاميين بتاريخ 1 يونيه 1990. في برنامج القناة الثانية لليوم، تشاهد مهرجان كان السينمائي وبرنامج "النجوم وكأس العالم" مع هاني شاكر. دور السينما تعرض أفلام "حنفي الأبهة"، "الراقصة والسياسي" و "عمالقة خارقون". أما الملاهي والكازينوهات فيحييها كبار نجوم الغناء:

- كازينو الليل: شريفة فاضل ومحمد قنديل
- كازينو الموعد: علي حميدة ونشوى
- كازينو بارادي: حسن الأسمر وعماد عبد الحليم.

صفحة الرياضة نشرت خبر إلغاء اتحاد الكورة لمسابقة سفر الجماهير لإيطاليا. المسابقة كانت عبارة عن استمارات بيشتريها الجمهور، سعر الاستمارة 5 جنيه، واللي اشتروا الاستمارات هيدخلوا سحب على تذاكر سفر لإيطاليا، بس بسبب ضعف الإقبال غير المتوقع على الاستمارات. في الصفحة الأخيرة تشاهد إعلان عن الكمبيوتر "صخر" أول كمبيوتر شخصي مصري، سعره 598 جنيهًا بدلًا من 636، بمناسبة وصول مصر لكأس العالم.

هل أنت من المؤيديين للجوهري أم لا سمح الله من المعارضين؟

شريف شافي، واحد من قليلين في مصر اللي ممكن يتقال عنهم مؤرخين كورة، مكالمة معاه هتكون مفيدة. "قبل بداية كأس العالم الجوهري كان بيتعرض لانتقادات كبيرة ومن وقت التصفيات كمان بسبب الأداء وبعض النتايج في الماتشات الودية وطبعًا اختياراته في بعض اللاعيبة، كمان الجوهري شاف إن الدوري دلوقتي مالهوش لازمة، قرر ببساطة يلغيه ويلعب ماتشات ودية كتير مع مدارس مختلفة عشان يحاول يقلل الفحوة بينا وبين اللاعيبة الأوربيين". بيحكي شريف اللي كان عنده 24 سنة وقت البطولة.

المنتخب لعب وديات مع تونس، اسكتلندا، كوليمبيا، ألمانيا الشرقية، خبرات مختلفة وناس جديدة علينا، بس ده مش معناه إنه كان دايمًا صح، تامر عبد الحميد "كوير" قديم وذهنه حاضر، بيقولي: "الجوهري أخد لاعيبة مالهاش لازمة وخرج ناس تانية مهمة زي بدر رجب، غير خناقته مع طاهر أبو زيد، والحقيقة الاتنين كان عندهم تضخم ذات مهول وصدامهم مع بعض كان ضروري، بس الجنرال كسب لأنه راجل عسكري وصاحب الكلمة". بتاريخ 2 يونيه 1990، اشتكى الجوهري لمحرر الأهرام من وصف الناس له بالديكتاتور والإمبراطور.

اشتباكات في فلسطين وحادثة نجلاء فتحي

قبل كاس العالم بأيام. التلفزيون بيعرض مسلسلات "بوجي وطمطم" و "أبدًا لم أكن أنا"، والسهرة مع برنامج نادي السينما وفيلم "كليوباترا". في السياسة كانت فلسطين بتعاني ب2 شهدا وإصابة 39 فلسطيني برصاص مستوطنين، ومقال بعنوان "حان وقت انسحاب إسرائيل من الأراضي العربية". تحقيق لصحفي الأهرام سيد علي، عن مشاريع تنمية سياسة وبشرى بإنجازات مهمة في الملف ده عن قريب، زي إقامة منطقة حرة، وتوصيل النيل لوسط سيناء ودلتا جديدة وسد عالي جديد. يا عيني على اللي حب ولا طالش.

عادل إمام كالعادة بيكتسح الإيرادات بفيلمه "حنفي الأبهة" وفي المركز التاني فيلم "الراقصة والسياسي". نجلاء فتحي بتستعد للعودة للسينما بفيلم "دعوني أعيش"، نجلاء فتحي ماعملتش فيلم اسمه "دعوني أعيش"، جايز الاسم اتغير، لكن الأهرام أهتمت بالخبر لكونه أول فيلم تشتغله نجلاء بعد حادثتها مع أحمد زكي. سنة 1990 كانت بتدور شائعات عن جواز أحمد زكي ونجلاء فتحي، رغم نفي الطرفين. العلاقة انتهت تمامًا بشوية كسور وكدمات، بعد حادثة عربية على طريق مصر إسكندرية. نجلاء قالت إنها وصديقها أحمد زكي كانوا مسافرين يتغدوا ويتناقشوا في تفاصيل فيلمهم الجديد اللي من إنتاج أحمد زكي.

نوبل محفوظ  وإيطاليا عاوزة فلوس كاس العالم

"هل عثر نجيب محفوظ على جائزة نوبل أم جائزة نوبل هي التي عثرت عليه"، ده السؤال اللي طرحته "نيويورك تايمز" في عددها الصادر يوم 5 يونيه 1990. في إيطاليا كانت بعثة التلفزيون المصري بتحجز مكانها وسط تلفزيونات العالم اللي بتستعد لنقل مبارايات المونديال، لكن كانت في مفاجأة في انتظار المعلق محمود بكر، إن الجانب الإيطالي مش كاتب اسمه، بسبب تأخر التلفزيون المصري في دفع مستحقات البث، في الوقت نفسه القنصلية الإيطالية بتمتنع عن منح تأشيرات جديدة للجمهور المصري، لوجود أكتر من 90 ألف مصري في إيطاليا بدون عقود عمل، المشرحة مش ناقصة قتلى!

8 يونيه 1990..  كيلو اللحمة ب4 جنيه

النهاردة افتتاح كاس العالم، الجوهري وفريقه وصلوا من كام يوم ونزلوا أول تمرين في باليرمو. الجمهور في مصر بيعد الساعات. العيد داخل ومافيش فلوس، بس وزير التموين على 500 طن لحمة يتباعوا في المجمعات بسعر 4 جنيه للكيلو. كيلو الرز ب80 قرش والسكر بجنيه. جرام الدهب قرب على 3 جنيه. هنتجوز ازاي؟ العلاج كمان مابقاش سهل، بس "الأهرام" قدرت تجمع 442 ألف جنيه و 82 ألف دولار، نبني بيهم مركز علاج السرطان في المنصورة ومركز علاج الفشل الكلوي في الشرقية.

هنعمل إيه قدام هولندا وإنجلترا؟ وقعنا في مجموعة الموت. الكمبيوتر توقع إن مصر هتخسر 8/1 من هولندا و 4/1 من إنجلترا، بس الجوهري واثق في لاعيبته. حسام جاهز وهيلعب. توقعات بتشكيلة المنتخب، بيقولوا احتمال طاهر يلعب، بس الجوهري متخانق معاه! الكاس اللي هيلعب أكيد. فاضل يوم على الماتش. هشام يكن مستعد لفان باستن. هاتها جمايل يا رب.

12 يونيه 1990.. إلى اللا نهائية وما بعدها

"أبويا ماكانش له في الكورة بس كان بيتفرج معانا لما لاقانا مهتمين، لما جات ضربة الجزاء قالي كوسة". "لسه فاكر مانشيت نزل في جرنال بعد الماتش على لسان هشام يكن بيقول فيه: فان باستن مين أنا جامد ومتين". "الشباب جابوا سلك مواعين وولعوا فيه بعد الماتش كنوع من الاحتفال وكنا بنقول اشرب بيبس اشرب بيره اصل هولاندا خيبتها تقيلة". "كان ممكن نكسب، جمال عبد الحميد الله **** ضيع 3 أجوان لوحده". تعليقات مجمعة من جمهور فاكر كويس يوم 12 يونيه 1990.

كل الناس اللي سألتها عن ذكرياتها عن الفترة دي، كانوا بيقولوا حاجات زي: الناس كانت مؤدبة – كنا على قد حالنا بس مبسوطين – ياريت ترجع الأيام دي تاني. ماعرفش بعد 30 سنة هقول إيه عن 18 وعن مونديال روسيا، ماعرفش هتمنى الأيام دي ترجع ولا أحمد ربنا على زوالها. هنكون فين وهنعمل إيه؟ هنكون روحنا كاس العالم كام مرة؟ ولا هنكون بنعافر عشان ولادنا يشوفوا اللي جربناه مرة من سنين؟ كل اللي عارفه إني هشوف مصر بتلعب كاس العالم وإني هيكون عندي حاجات افتكرها واحكيها عن الأيام دي.