أعلنت الحكومة إنها هتبدأ في تصنيع قطار بدورين لزيادة الطاقة الاستعابية، المشروع هدفه زيادة سعة التحميل للركاب بمعدل من 40 إلى 60% على السعة الحالية للقطارات العاملة فى خطوط السكك الحديدية، خصوصًا خطوط سكك حديد الوجه القبلي، وده لأنها بتعتبر أكتر خطوط زحمة على مستوى مصر.

وحسب المهندس عبدالرحمن حسين، رئيس «سيماف» إحدى مصانع الهيئة العربية للتصنيع، هيئة سكك حديد مصر اعتمدت الرسومات التصميمية للقطار الجديد، وحاليًا بيتم تدبير خامات ومستلزمات تصنيع نموذج أولى للقطارات الجديدة، عشان يتم اختبارها على أرض الواقع. 

وأضاف "حسين" إنه متوقع يتم الانتهاء من تنفيذ أول القطارات بنهاية 2018، بعدين تتعمله اختبارات داخلية بالمصنع، قبل تجريبه على خطوط السكك الحديدية، وهتكون الموافقة النهائية على تشغيله في نص 2019. نظام التهوية في القطارات دي هيعتمد على التهوية الديناميكية، وهو نفس نظام التهوية في الخط الأول للمترو اللى بيعتمد على تبريد خفيف داخل القطار، من خلال الهواء الناتج عن الحركة والمراوح الداخلية، ومش هيعملوا تكليف عشان بيزود التكلفة.