أعلنت الدكتورة رانيا المشاط وزيرة السياحة إن مصر هتستقبل أول رحلة حج على خطى العائلة المقدسة من 17 إلى 21 يونيو، وهيكون فيها حوالي 70 شخص، وهيتم الإعلان عنها في مقر الفاتيكان، الكلام ده قالته الوزيرة المصرية يوم الجمعة 1 يونيو في احتفالية إحياء ذكرى دخول العائلة المقدسة إلى مصر، اللي أقيمت بالمتحف القبطي بمصر القديمة تحت رعاية البابا تواضروس الثاني. 

وزير الآثار خالد عناني قال إن الدولة مهتمة بملف توثيق رحلات العائلة المقدسة، وتسجيلها على قائمة اليونسكو، وإنهم 25 نقطة في مصر مرت عليهم العائلة المقدسة في القرن الأول القبطي على مسافة 2000 كم من سيناء حتى أسيوط.

الرحلة هتبدأ من الفرما التابعة للعريش، وصولًا لتل بسطة لحد مسطرد وبلبيس، ومدينة سمنود في محافظة الغربية اللي فيها شجرة جميز اتبنى مكانها كنيسة للعذراء في القرن الرابع الميلادي، وقرية سخا اللي فيها حجر رملي طبع عليه قدم المسيح، وهتوصل لوادي النطرون.

المرحلة التانية من الرحلة هي المطرية اللي فيها شجرة مريم، وكنيسة العذراء عند باب زويلة، وبعدين بتتجه الرحلة لكنيسة أبي سرجة اللي في مصر القديمة وكنيسة العذراء في المعادي، والمرحلة الثالثة والأخيرة من الرحلة في الصعيد عند جبل درنكة في أسيوط، وصولًا لجبل الطير.