تقدر دلوقتي لما بابا يسألك ما بتذاكرش ليه وبتلعب بلاي ستيشن، تقول بكل ثقة "بستعد للبطولة"، عشان في بطولة كأس مصر للألعاب الإلكترونية هتتعمل يوم 18 نوفمبر اللي جي في صالة من الصالات المغطاة لاستيعاب العدد المتوقع إنه ييجي من الجمهور واللاعبين، واللي هيفوز في البطولة الفردية هيشارك في بطولة الخليج 2017 اللي هتتعمل في الإمارات في ديسمبر الجي.

كأس مصر هيتعمل في لعبة "فيفا 2017"، عشان ما تقعدش تدرب على "PES" بعدين تلاقي الماتش من بره المنهج. شريف عبد الباقى رئيس الاتحاد بيقول في بيان "إن البطولة هدفها وضع نواة لمشاركة الأندية والهيئات الشبابية الرسمية في بطولات الألعاب الإلكترونية، اللي بقت منتشرة وليها ميداليات وليها بطولات رسمية وعالمية واللي حققت إجمالي بطولاتها السنة اللي فاتت أرقام وميزانيات توصل ل 1.3 مليار دولار على مستوى العالم".