مها محمد، بنت من إسكندرية ليها أصحاب كتير فنانيين وبيرسموا وبيشتغلوا، لكن لأنهم برّه القاهرة ماحدش بيركز عليهم والناس مبتسمعش عنهم. في مصر دايمًا هتلاقي الحفلات الكبيرة في القاهرة، الدعم للمشاريع الفنية في القاهرة، عشان تشوف أفلام مميزة ومختلفة لازم تكون في القاهرة، من هنا كانت فكرة الحملة اللي بدأتها "مها" مع أصحابها وعملتلها هاشتاج اسمه Art has no place، وكان هدفها إنها تقول إن الفن مالوش مكان وإنك تقدر بفنك توصل لكل الناس في العالم كله. 

Art has no place بدأت من مجموعة أصحاب وكبرت لحد ما وصلت لكل الفنانيين. مها وأصدقائها اختاروا الدرامز رمز للحملة لأنها حسب كلامها: "الدرامز هو اللي بيظبط إيقاع الفرقة كلها، بس دايمًا موجود ورا والناس أحيانًا بتنسى وجوده ومش بتعرف عنه، رغم إنه أهم واحد، ده حال فنانيين باقي مصر". صور فيها عازف درامز وعليها شعار الحملة انتشرت على الفيسبوك مع الهاشتاج اللي الناس بدأت تشارك عليه.

«عينك مش هتشوف إلا الفراغ .. فراغ كبير، مسرح فاضي مافيهوش جمهور.. بس لازم تعرف إنك مش مجرد شخص في الخلفية، أنت الإيقاع اللي من غيره كل حاجة تقع، أنت موجود بس هما اللي مش شايفينك». كلمات بتتقال في فيديو الحملة بصوت يوسف التهامي الـVoice Over المعروف، بتقول مها عن شريف: "كلمناه ورحب جدًا يشاركنا في الفكرة وعمل معانا الإعلان مجانًا عشان نوصل صوتنا". 26 محافظة في مصر فيها فنانيين أكتر من القاهرة بس مش قادرين يوصلوا صوتهم، وعلشان كدة الحملة هي كانت صوتهم.

فاعليات كتير اتعملت على هامش الهاشتاج ده، فنانيين عرضوا لوحاتهم، ومصورين نشروا صورهم كلها تحت نفس الهاشتاج.