كتب ومجلات الكوميك خدت مكان كبير في القرن الـ21، وأفلامهم كمان، يمكن في مصر الموضوع مش منتشر أوي وماعندناش بطل خارق نتعامل معاه في الكوميك، لكن الكتاب الجديد "العصبة" ادانا 6 أبطال مصريين.

العصبة كتاب عن 6 أبطال خارقين مصريين جايين من 6 فترات زمنية مختلفة في التاريخ، الفريق ده بيحل ألغاز الجرائم وبيعالج مشاكل المجتمع المصري، أو زي ما بيتقال على صفحتهم على فيسبوك "العصبة، مجموعة أبطال مصريين من خلفيات مختلفة مهمتهم الوحيدة هي الدفاع عن مصر ضد الفساد و الظلم". جون ماهر -المهندس الصبح ومصمم الكوميك بليل- بيقولنا: "الكوميك دايمًا بيتكلم عن مشاكل المجتمع والقضايا جواه، وأنا مهتم بمشاكل المجتمع المصري". 

جون "مجنون كوميك" لكن كمان بيكتب وعنده فرقة مسرحية خاصة بيه، قرر يعمل الكتاب وينقل عالم الكوميك للواقع المصري، "قصص الكوميك الهزلية بره كلها عن أبطال خارقين وأشرار، لكن في العصبة أنا فكرت في وجود أبطال بيتكلموا عن مشاكل حقيقية في المجتمع، ليه ماتبقاش مشاكلنا هي الأشرار اللي بيحاربهم أبطالنا؟" بيقول "جون".

الـ6 شخصيات مختلفين عن بعض تمامًا، لكن ده سبب قوة القصص، "حورس جاي من مصر القديمة أو الفرعونية، وفيه شخصية تانية من مصر الحديثة وعندها أفكار تقدمية، ودايمًا مختلفين مع بعض، بس كل واحد بيبان نقطة قوته". بيقول "جون": في الثقافة المصرية دايمًا البطل بيكون من غير عيوب وملاك طول الوقت وبيظهر إنه مثالي، لكن الوضع مختلف في القصص المصورة والكوميك بره مصر، باتمان مثلًا بتظهر عيوبه الخاصة، أنا عايز القراء العرب يتواصلوا مع البطل ويحسوا إنه شبههم فيه عيوب ومشاكل بيتغلب عليها وعشان كده بقى بطل، وده اللى بيخليه زينا".

لو دخلت صفحتهم على فيسبوك هتلاقي مكتوب "احنا عندنا خطة إننا نبني عالم متكامل يجمع كل أبطالنا وأعدائهم. عالم من الكوميكس يعكس للقارئ الواقع المصري بكل ايجابياته و سلبياته المتمثلة في البطل و الشرير. الشخصيات اللي كانوا مجرد أفكار في رؤوسنا أصبحوا شخصيات مرئية علي الورق"

أول عدد من العصبة طلع من كذا سنة، جون ماهر وفريقه أحمد رأفت وماجد رأفت، شغالين على قصص جديدة من وقتها، ودلوقتي بدأوا ينشروا ده على الفيسبوك، "كل سنة بننتج 32 صفحة كوميك في نسخة مطبوعة في كايروكوميكس وأماكن تانية، وبننحاول ننشر 8 أو 12 صفحة كوميك تتنشر كل شهر على الإنترنت" بيقول "جون".

تقدر تشوف صفحتهم على فيسبوك وتطلب العصبة أونلاين.