لما بنفكر في الفن خصوصًا التشكيلي، بيجي في دماغنا صالات العرض في إسكندرية، ممكن نفكر في رسومات دهب، أو حتى الزمالك... لكن الفنان ده قرر يحط كفر الشيخ في قايمة مدن الفنون.

عبدالوهاب عبدالمحسن، فنان مصري اتربى وكبر في كفر الشيخ، وتربيته دي خليته يحب دلتا النيل حب خاص ويشوف جمالها، ويقرر يملاها بالفن، فبدأ في تطوير المناطق الريفية بمهرجان سنوي اسمه "البرلس للرسم على الجدران والقوارب"، المهرجان هدفه إن حيطاان كفر الشيخ والبرلس تتغير وتبقى كلها ألوان مليانة بالحياة والابتسامة.

قبل المهرجان، الحيطان كانت كلها رمادي وتراب، مافيهاش حياة، لكن شكل البرلس اتغير تمامًا بعد ما اتملت ألوان. المهرجان هدفه مساعدة السكان، خصوصًا الأطفال، إنهم يعبروا عن نفسهم بالفن والألوان، بيحكي الفنان عبدالوهاب عبد المحسن إن الناس خصوصًا الكبار، ماكانوش قابلين ده بسهولة، خصوصًا في المهرجان الأولاني، والأطفال كانوا عدوانيين جدًا، ومش عايزين يرسموا، لكن بمرور الوقت ورسومات الفنانيين بقوا متحمسين أكتر، لحد ما بقوا يجوا يرسموا من نفسهم.

مؤسسة عبدالوهاب عبدالمحسن اللي أسست المهرجان، كانت بتجمع الفنانيين من كل أنحاء العالم، علشان يعلموا سكان البلد ويعلموا الأطفال ويتواصلوا معاهم، وبقى طقس سنوي للرسم على حيطان البرلس وكفر الشيخ. المهرجان كان فيه فنانيين من كوريا والهند ومقدونيا وتونس وإيران والسودان والبحرين.