هاي دام فريق إسكندراني اتأسس سنة 2012، بيلعب أنواع موسيقية زي "الأفريكان بوب" و"النوبي" و"ريجي"، اهتم الفريق بإعادة التوزيع وتطوير التراث الموسيقي النوبي. الفريق دائمًا في حالة نشاط فني مستمر وحفلاتهم بيكون فيها ناس حافظة أغانيهم، الصعوبة في إن لازم تكونلك هوية موسيقية تميزك عن باقي الفرق، وده اللي "هاي دام" عرفوا يعملوه في المشهد الموسيقي المستقل، عشان يكونلهم شكل خاص بيهم ويقدموا الأفريكان بوب. قابلنا ريمو من فريق "هاي دام" وكان لنا معاه الحوار ده

الفريق فيه كام واحد؟

بوني بيلعب جيتار من "جوبا" في جنوب السودان، هو يعتبر الضلع الأساسي في المزيكا وهو المينتور بتاع الفريق، ومحمد جمعة بيلعب بيركشن، أحمد خيري (طبلة ودف وكونجا)، كيشو اللي هو كريم محمود، بيلعب درامز، كريم جولا كيبورديست، وريمو بيز جيتار، وحسن جامايكا هو الصوت الرئيسي وهو اللي بيكتب الكلمات، وفي أغاني كاتبها شاعر إسكندراني معروف هو أحمد سعد.

هل الأفرو بوب لون مش منتشر في مصر والناس بتخلط بينه وبين الأغاني اللي فيها طعم نوبي؟

الفكرة إن الخلط ده مش دايمًا بيكون حاجة سيئة أو إن احنا بنحاول نتخلص منها، لأن الحقيقة المشروع بتاعنا ابتدا إن احنا بنعيد توزيع التراث النوبي بشكل مودرن أكتر عشان الناس تسمعه، احنا في الأساس بنقدم re-arrangement يعني إعادة توزيع للموسيقى النوبي اللي من التراث وبنقدم ريجي وأفريكان، ومؤخرًا بدأنا من بداية السنة دي إن احنا نغير شوية صوت الباند في الأغاني الأوريجينالز أو التراكات بتاعتنا اللي احنا بنعملها، لسكة الافريكان بوب. احنا بنقدم 3 أنواع من المزيكا فموضوع الخلط مش أزمة  وكمان الناس لسه معندهاش الوعي الكافي إنها تفرق بين أنواع المزيكا، احنا لسه بنروح حفلات بيطلب مننا أغاني لفرق تانية لمجرد إن احنا بنقدم نفس نوع المزيكا، يعني بالنسبة للجمهور هي كلها مزيكا بترقص ولطيفة فبيسمعوها.

طب والناس تميز المزيكا ازاي؟ يعني واحد مستمع عادي ازاي يقدر يميز الأنواع عن بعض؟

اللي بيميز الأنواع عن بعض هي الإيقاعات، يعني احنا عشان نفرق بين المزيكا دي بنعملها من خلال البيتس والإيقاعات هي الأساس، بعد كده في الإخراج النهائي للتراك اللي هو البرودكشن، يعني في سامبلز معينة وأصوات معينة ممكن تستخدمها في الأفرو بوب مش مستخدمة أوي في النوبي والعكس، بس غالبا الايقاعات هي الفيصل في الموضوع، عشان الناس من الإيقاع تقدر تعرف الفرق بين النوبي والأفريكان والريجي.

وليه الناس رابطة الافرو بوب بالنوبي يعني ؟

عشان الناس بتتعامل مع المزيكا النوبي والأفريقي على إنها black music ده غير إن الناس مش مهتمة تعرف وتفرق الأنواع، هو بيسمع أغنية حلوة وخلاص.

نقدر نقول إن محمد منير بيعمل أفرو بوب؟

دي قضية حساسة جدًا عشان أنا مقدرش اتكلم في النقطة دي، بس لو فكرنا هنلاقي منير عنده ألبومات كتير جدًا في كل حقبة زمنية من حياته بتقدم مزيكا بشكل معين ومتاثر بحد معين، يعني الإنتاج الموسيقي في الأول غير بعد كده اللي عملها مع رومان بونكا غير المزيكا الجديدة، يعني منير قدم حاجات كتير وكلها مختلفة فمقدرش أصنفه.

ليه الفرق اللي بتعمل النوبي والريجي وكل ما هو مشتق من الثقافة الأفريقية متأثرين بـ منيب؟

منيب هو الأب الروحي للمزيكا النوبي، والناس متاثرة بيها عشان هو اللي بدأ المزيكا دي والناس عرفتها من خلاله وهو اللي قدر يعمل فيها حاجة جديدة.

النوع ده ممكن يكون له جمهور في مصر؟

اه له جمهور في مصر كبير جداً وفي فرق سبقتنا بتعمل النوع ده زي "بلاك تيما"، وأنا شايف إن أي مزيكا حلوة لها جمهور كبير، مش شايف إن الموضوع له علاقة بأي انتماء ثقافي، يعني في ناس كتير بتحب المزيكا اللاتين واحنا ملناش علاقة بالثقافة دي، الفكرة اما بتحب نوع مزيكا معين بتسمعه بغض النظر هو من ثقافتك ولا لأ، كمان الناس في مصر عندها استعداد تسمع بس احنا محتاجين الموسيقيين يكون عندهم إصرار أعلى من كده.

علمتوا حفلات في مصر وطلعتوا بره مصر، في دعم من أماكن الحفلات إنكم تعملوا حفلات ولا لأ؟

عملنا حفلات من أول اسكندرية لحد طابا ومرسى علم ومطروح وكفر الشيخ ومدن القنال ودمياط ولسه الفترة الجاية في أماكن أكتر. بره مصر اتقبلنا في كذا مهرجان بس كنا بنقابل صعوبات عشان الفيزا والأوراق المطلوبة، يعني اتقبلنا في مهرجان "زينزيبار" مرتين ورا بعض ومعرفناش نروحه ومهرجان "تونس" بعتلنا دعوة وبرضه معرفناش، غير كده مش كل الأماكن بتدعمنا، يعني في أماكن بتدعمنا جدا وفي أماكن اللعب فيها مش مجدي خالص والناس اللي فيها مش متعاونة

شايف إن الأفرو بوب والنوبي والريجي يقدر يلاقي مكان في بلد أغلبها بتسمع بوب ونوع واحد بس؟

أنا شايف إن أي مزيكا سواء مرتبطة بثقافة أو لأ، هي لها جمهور طول ما الناس اللي شغالة على المزيكا بتراعي إنها تقدم حاجة توصل للناس ولازم المحتوى اللي ييتقدم يكون قريب لودان المستمع، يعني احنا بقالنا فترة كبيرة بننتقد أنواع من المزيكا موجودة في مصر ونقول ليه الناس بتسمع الكلام ده والحقيقة الناس بتسمع الكلام ده عشان هو الأقرب ليهم، يعني هو ده اللي بيناقش حياتهم ومشاكلهم هما، ف احنا مانقدرش نفضل نلعب مزيكا بتناقش مواضيع مش مهمة بالنسبة للناس أو نلعب أنواع مزيكا صعبة على ودان الناس وبعد كده نعترض إنها مش بتوصل

استمرار فريق هاي دام معتمد علي إيه؟

بص، استمرار أي فرقة في الدنيا معتمد على الإنتاجية بتاعتهم وعلى مدى التزام الناس بالمشروع الموسيقي، يعني أي فرقة في الدنيا تستمر لو الناس مكرسة وقتها للمشروع وشايفة إنها مش مجرد وقت فراغ، بالعكس لازم يكون في هدف وتتعامل مع المزيكا على إنها شغل واللي بيدي وقته للمزيكا وبيعاملها كشغل، المزيكا هتديله في المقابل، كمان يكون في خطة نمشي عليها وإن الفرقة تبقى productive مزيكا وكوميرشال كمان عشان تعرف تجيب فلوس، لأن دي حاجة مهمة جدا، عشان لو المشروع اللي أنت بتصرف عليه ماجبش فلوس في فترة معينة يبقى هيقف.