فرقة مستقلة بتقدم نوع مختلف من المزيكا، ده اللي بيقولوه عن نفسهم، ده اللي هتحس بيه أول ما تسمعهم، رغم كده أوقات كتير بيفكروا مايكملوش وأوقات كتير مش بياخدوا مكانتهم ورد الفعل اللي يستحقوه في المشهد الموسيقي المستقل في مصر. قابلنا دوبي صاحب فكرة ومؤسس الباند وسألناه عن حاجات كتير، بداية من تكوين الفرقة ووصولًا لخطواتهم اللي جاية، واللي قابلوه في النص ما بين ده وده.

ازاي دخلت في المزيكا؟

كان أخويا بيسمع مزيكا كتير وأنا كنت بسمع معاه و لما الكمبيوتر والنت دخلوا، كنت بتفرج على اليوتيوب، وكان أول تراك شوفته بتاع Biggie Smalls اللي اسمه big poppa، كان كليب والمغني تخين وأسمراني فكان خلاص أنا هبقى كده وبدأت اسمع راب أكتر و سمعت راب عربي بعدها، وكان تراك "الطوفان" لفريق "واي كرو". كان غريب إنك تسمع نوع المزيكا ده بالعربي.

وعملت راب عربي؟

أه عشان عجبني موضوع إن الواحد بيتكلم في أي حاجة هو عايزها. تقدر تقول كانت محاولات وسجلت أغنية واحدة كنت عامل مزيكتها. بعد فترة وقع في إيدي ألبوم Distant Relatives بتاع رابر "Nas" ومغني الريجي "Damia Marley"، ساعتها ماكنتش عارف Damian Marley ده بيعمل إيه، بس كنت فاكر إن ده راب عادي بس بيحط melodies كتير في الراب بتاعه، فاتشديت له أكتر وحاولت آخد نفس الميلوديز اللي في  التراكات بتاعته وأعربها بنفس اللحن. كل ده كنت مقتنع إن ده اسمه راب ومش ريجي عشان ماكنتش فاهم مزيكا.

وصلت للريجي ازاي وعرفت إنه ريجي؟

قعدت فترة كبيرة أدور ورا Damian Marley واحاول افهم إيه ده وإيه الفرق بينه وبين بوب مارلي؟  لاقيت المزيكا مختلفة  وطريقة الغناء مختلفة، لحد ما بدأت افهم إن ده نوع من أنواع الريجي اسمه Raggamuffin، وصلت إن ده نوع ريجي وأنا كدوبي هحاول اكتب كلمات تمشي على نفس طريقة Damian Marley.

ازاى جاتلك فكرة تكوين فريق؟

كان عندي صاحبي اسمه خولي درامر (أحد أعضاء الفريق) قالي تعالى معايا نحضر jam session" "يعني فرقة موسيقية في ستوديو بيتدربوا، عشان هو أصلا كان عنده فرقة بيلعب معاهم. لاقيت الموضوع لايف ومختلف عن المزيكا اللي بتتعمل بكمبيوتر أو أوقع منه والناس بتغلط عادي وتعيد من الأول، فحبيت الموضوع إن يكون جنبك 5 أفراد مشتركين معاك في نفس الحاجة اللي أنت عايز تقولها أو تعملها، بس كل واحد بطريقته سواء على جيتار أو  بيز أو درامز. طلعت من الJamming Room مقرر يبقى في باند  بنلعب المزيكا دي مع بعض.

وكونت الفريق ازاي؟

بعد ما ظبطت مع خولي إنه معايا، قعدت بقى اتفرج على اليوتيوب عشان أشوف فرقة الريجي محتاجة إيه، عرفت وروحت مع خولي الحفلة بتاعت الفرقة بتاعته، اسمها "بارانويا"، فقابلت واحد صاحبي في الحفلة دي اسمه "محمد فتحي" جيتاريست، عرضت عليه نلعب سوا ووافق. في نفس الحفلة اتعرفت على واحد اسمه "عمرو موكا" جيتاريست برضه، وخولي كلم صاحبه "عبدالله" بيلعب بيز جيتار. كده احنا كاملين وروحنا فعلا الاستوديو، بس ماكناش عارفين احنا هنعمل إيه تحديدًا.

قلت لهم خلاص يا جدعان نقعد كده مع بعض، أنا كاتب كلمات وتعالوا نشوف، نحاول نبعد عن الميتال والروك والبلوز ونشوف ده هيطلع إيه. عملنا ساعتها كورس "اللازمة"، طبعاً بالنسبة لدلوقتي هو بطيخ، بس كان حاجة غريبة وصوتها حلو وكل واحد فينا لعب حاجة جديدة عليه، عشان كده كملنا.

هنا بدأ مشوار الباند؟

اه، بدأ أعضاء الفرقة يحبوا الموضوع ويسمعوا ريجي، وعملنا جروب سري على فيسبوك اسمه "محمد باند"؛ ماكانش في اسم للباند فقررنا نسميه "محمد باند" (محمد ده اسمه هو دوبي). فضلنا نتمرن كتير لحد ما بقى كل واحد عنده خلفية عن الريجي وبقى في شكل احترافي.

 أنتجنا ساعتها 3 تراكات مش ريجي صرف ومانعرفش ده كان إيه، بس كان الصوت قريب من الريجي. وصلنا في النهاية إننا نلعب 50% ريجي والباقي خلفيات موسيقية مختلفة، سواء بلوز أو جاز أو روك وميتال، ده ريحني وريح باقي الباند. فضلنا نلعب وننتج تراكات واحنا اسمنا "محمد باند" لغاية ما جاتلنا أول حفلة، ساعتها فكرنا نغير اسمنا ووصلنا لـ"هجين" في اجتماع عملناه ع القهوة.

وما بعد الحفلة؟

قولنا لازم ناخد خطوة بجد ونظبط الكلمات والمزيكا أكتر، بس ماركزناش على نوع مزيكا معين؛ احنا عجبتنا فكرة إن الناس مش فاهمة ده إيه بالظبط، قولنا خلاص هنلعب ريجي فيوجين reggae fusion، بس نحاول نخلي الريجي زيادة عن الأول، نخليه 60% مثلًا.

ساعتها كنا محتاجين نعضم الريجي بكيبورد أكتر ونوزع أكتر عشان يبقى في حد يشيل الgroove  مع البيز جيتار، هنا ظهر ماريو، هو key player قديم و بيلعب في فرق كتير و يعرف الشباب برضه عشان كلهم في كلية واحدة، فكان مرة طالع من الاستوديو واحنا داخلين فقلناله ما تيجي تدرب معانا النهاردة، وافق وفرح لما عرف شكل المزيكا اللي بنلعبها وبقى واحد من الفرقة.

مين بيألف الكلمات والألحان؟

أنا بكتب الكلمات، بيكون في تخيل بسيط ازاى هقول الكلمات دي. بنكون في الاستديو وبقول الكلمات من غير أي حاجة ونشوف التراك رايح لفين، يعني بنشوف ازاي المزيكا هتخش ع الكلمات. خولي بيلعب بيت بعدين البيز بيلعب عليه Groove، ونسأل نفسنا: هنلعب ده من سلم إيه ونحط شكل الأغنية ومش شرط التراك يخلص في نفس اليوم.

في مشاكل واجهتكم في الحفلات؟

كان في فريق اسمه "صفصافة" صحابنا وكنا عايزين ننشر المزيكا دي، مدير الفريق اسمه رامي سليم قدر يعمل حفلة اسمها "جانشا تون"، دي أول حفلة ريجي بس تتعمل في إسكندرية، كان مكانها في ممر مركز الحرية والإبداع في العطارين، في الشارع يعني واحنا "الفرقتين" اللي دفعنا فلوس كل حاجة من أول المسرح والضوء والصوت، كانت تكلفة عاليه علينا كلنا.

أخدنا تصريح من الحرية والإبداع إن احنا نلعب في الممر اللي في الشارع، فكانت الناس بتعدي تقف تتفرج علينا، وصلنا إن احنا قفلنا شارع فؤاد جنب قسم العطارين، طبعًا جالنا البوليس وكانت الحفلة هتتلغي وسألونا بتعملوا إيه هنا وسألنا على التصريح، كانت المشكلة في الشارع مش في الممر، بس حاولنا ننجز  بسرعة عشان مايحصلش حاجات أوحش.

طب ومشاكلكم مع المنظمين والجمهور؟

بص هو في مشكلة الانطباع اللي بيتاخد من شكلك وشكل الجمهور، فبيبتدي الأمن يركز مع الجمهور اللي داخل، الناس دي إيه بقى؟ جوبات و لا إيه؟ برضه الناس فاهمة غلط، أنت شكلك شبه بوب مارلي يبقى بتحشش وفين الاصطباحة يا عم.

مرة في حفلة في "الجيزويت" كان الجمهور جاى مصطبح عشان في ريجي بقى، ده ستيريو تايب معروف، اليوم ده الجمهور كان كتير ومعاهم ازايز وبيرموا إفيهات يسألونا عن الاصطباحة، وإيه يا بوب فين البوب!

كمان فكرة إنك تعمل حفلة دي مشكلة أصلاً ؛ الأماكن محدودة ولو ماعندكش معارف مش هتعمل حفلة، مش هينفع تروح تقدم تقول أنا عايز اعمل حفلة بالسهولة دي، لو هتنزل حفلة في الصيف قدم لها في الشتا على ما تاخد موافقة.

 
بتعرفوا تجيبوا فلوس من المزيكا اللي بتلعبوها دي؟

ما بنعرفش نجيب فلوس لأ، يعني هو في فلوس بس هي مش فلوس، لو هتلعب حفلة في القاهرة هتجيب مصاريف القهوة. غير إن أنت كل شوية بتقف شوية وتفضل تفكر: هل ده هيبقى الكارير بتاعي ولا ابطل ولا اشتغل مزيكا بالليل بس؟

ووصلت لإيه؟

لحد دلوقتي أنا مش عارف ومش قادر آخد قرار ومعظم الباند زيي، لإن أنت بتجيلك لحظة الإحباط اللي هو الناس مابتسمعش والناس مابتقدرش والناس لسه مش فاهمة أو الناس رايحة لحتة واحدة اللي هي التجاري، بعدين تيجي حفلة تلاقي رد فعل الناس حلو جدًا أكيد الناس دي محتاجاك تكمل.

كل اللي احنا بنعمله ده تكلفة علينا، من أول التسجيل والاستديو وحتى قاعدة القهوة، غير المشاكل اللي في حياتك الطبيعية اليومية زي أهلك، الناس بتقولك هتعمل إيه حياتك؟ طب هتتجوز ولا هتشتغل؟ ولو حد جاله عقد سفر في الخليج هيعمل إيه؟