"ايوو شمندورة منجنا بهر جاسكو مينجنا سجرى مالا واينا مورتنا ناواينا"
دي الكلمات اللي احنا عارفينها عن الأغاني النوبي، وكأن أغنية "الشمندورة" هي الأغنية الوحيدة النوبية في العالم، بس المزيكا النوبي والسلم الخماسي مش بس محمد منير، بالعكس، منير يمكن أقل المطربين النوبيين تمسكًا بالنوبة وأصولها، لكن فيه مطربيين نوبيين متمسكين بالأصول دي أكتر، ومنهم اللي اشتهر للعالم كله.

أحمد منيب
الأب الروحي لمحمد منير، وصاحب الفضل الأول عليه، منيب بدأ يظهر في الخمسينات، وبسبب عبد الرحيم منصور ومنير، الغنا النوبي اللي عمله منيب وصل لكل المصريين، هو ملحن أكتر ما هو مغني، لكن ألحانه بصوته ليها طعم تاني والأغاني منه مختلفة تمامًا عن منير وفيها طعم النوبة.

حمزة علاء الدين
ظهر اسمه وسط المصريين على sound cloud وبدأت أغانيه تنتشر الفترة الأخيرة، خصوصًا بعد موته في 2006، حمزة اتعرف في أمريكا وكان محتفى بيه في النوبة والعالم كله، ومصريين كتير ماكانوش لسه سمعوا عنه. "حمزة" كمان دخّل العود على الموسيقى النوبية وده خلى ليها طعم تاني.

علي كوبان
لقبه "أبو الغنا النوبي"، في سنة 1949 شارك في أوبريت العرس النوبي قدام الملك فاروق والنحاس باشا، وبعد حوالي 8 سنين من التاريخ ده، عمل أول فرقة نوبية بتستخدم آلات غير نوبية زي الأكورديون والابوا والسمسمية، وفاز بالأسطوانة الذهبية في مهرجان ألمانيا السنوي للفلكور 1990.

بحر أبو جريشة
نوبي اتولد في إسكندرية واسمه بحر، ده سبب كافي عشان تغرق في أغانيه! "بحر" كان شغال في البحرية، وفي الإجازات بيغني في أفراح حواري إسكندرية كمطرب شعبي عليه طلب كبير، ولما طلعت موضة أغاني الكاسيت سجل "بحر" أغاني على حسابه عشان تنزل بعد كده في ألبومين كسروا الدنيا، ومصر كلها كانت ماشية تسمع وتغني "مقادير".

محمد حمام
"يا بيوت السويس يا بيوت مدينتي" ماكانتش أغنية منير، كانت أغنية "حمام"، المطرب النوبي اللى غناها على الجبهة مع الجنود في السويس، "حمام" ماكانتش شغلانته الغنا، كان مهندس وبيصرف فلوسه عشان يغني وينشر التراث المصري في المهرجانات العالمية، أو يشارك مع الجيش بصوته. لما مات في سنة 2007 اتكرم عسكريًا ونكست الأعلام في السويس عشان دوره في الحرب.

خضر العطار
النوبة يعني خضر! هو كان أبو الثورة النوبية، مش مجرد بيغني أغاني عادية بلهجته المميزة، لكن بيغني للنوبة طول الوقت، لما بيروح فرح بيقول كلام حب في النوبة، ولما بيقعد وسط الناس بيبكي تراث النوبة، بيلف ال44 قرية في النوبة الجديدة يقول إنه فخور ببلده وتراثه، مات خضر في 2014 وفضل صوته عايش وحي.

عبدالرازق فيكا
من أشهر مغنيين النوبة اللي دايمًا كان بيغني أغاني شبابية، أكتر أغانيه اللي اشتهرت "كده كده يا تريلا" ومن كتر ما اتعرفت في مصر والخليج، غناها حسين الجسمي في حفلة ليه. فيه مغنيين مافيش عنهم معلومات، بس هما مهمين للنوبة والنوبيين، وعشان كده هنسمع أغانيهم.

رمضان محمد أحمد أو عندليب النوبة

محمد فوزي

الصورة من فندق آشري نارتي