حوار مع كريم قاسم وشريف الدسوقي

في مهرجان القاهرة السينمائي اتعرض فيلم "ليل خارجي"، دخلت القاعة اللي كانت محجوزة بالكامل وأنا متوقعة إني هشوف فيلم جميل عشان مخرجه أحمد عبدالله اللي أنا مستنية فيلمه الجديد، لكن أكيد فيه مشاكل وهنفضل نفندها ونلوم فيه شوية، ساعة ونص من الضحك والانبساط والابتسامة اللي مفارقتش وشي حتى في اللحظات الحزينة من كتر ما أنا مبهورة بالفيلم، واتاكدت إن انطباعي عن الفيلم صح لما سمعت الناس كلها بتسقف رغم عدم حضور أبطال الفيلم، يعني مفيش أي مجاملات، ومع نزول الفيلم للسينمات التجارية قابلنا كريم قاسم وشريف الدسوقي أبطال الفيلم عشان نعرف منهم عن كواليسه.

من ممثل مش معروف لجائزة أحسن ممثل في مهرجان القاهرة السينمائي

وأنا بتفرج على الفيلم سألت نفسي مين الممثل العظيم اللي عمل دور سواق التاكسي ده؟ وعرفت إنه شريف الدسوقي، ممثل مسرح إسكندراني، سألنا  "شريف" إزاي اتعرف بالفيلم وقالنا: "علاقتي مع أحمد عبدالله بدأت من أيام فيلم "ميكروفون" وكان عارفني بسبب أدواري في الأفلام المستقلة، وفي 2017 عرض عليا الدور".

دور سواق التاكسي مش سهل، مفردات شارع حافظها، وحركات بيفهمها اللي عايشين ليلهم نهارهم في الشارع، شريف الدسوقي بيقولنا إنه بصفته حكاء وممثل مسرح كان بيجمع الشخصيات في  باله، "لما أحمد عبدالله قالي إن الشخصية سواق تاكسي استرجعت كل الكلام والصفات اللي في بالي والجلسات اللي مع أحمد قبل الفيلم كانت مفيدة".

في ختام مهرجان القاهرة السينمائي ووسط حضور وأفلام اجنبية تم الإعلان عن فوز شريف الدسوقي بجائزة أحسن ممثل، "مكنتش حتى اجرؤ احلم بده وسط كم الأفلام المعروضة، وأنا داخل القاعة المنظمين قالولي اقعد على الطرف، قلت يبقى جائزة للفيلم متوقعتش إني اخد جائزة احسن ممثل، ولحد النهارده مش مصدق ومبسوط إنهم وثقوا فيا وأنا و ش مش معروف عشان اعمل الدور ده".

الارتجال سيد الفيلم

أحمد عبدالله ضد سياسة حفظ الدور، وده اللي بيخلي المشاهد يحس إن الفيلم طبيعي وحقيقي وخارج من روح المممثلين، بيحكيلنا كريم قاسم: "في أي ورشة بنتعلم ازاي نشتغل بالطريقة دي، لكن في كل الأفلام والمسلسلات الناس بتسلم بعض كلمة عشان نبتدي منها الجملة، لكن ده ماكنش موجود في فيلم ليل خارجي، ده كان مريح بالنسبالي عشان اشتغل بالطريقة اللي بتدرب بيها، لكنه مقلق، ازاي هنعمل مونتاج؟ مفيش مرة بنعمل المشهد زي المرة اللي بعدها، كل مرة بنقول كلام مختلف وبندي ريأكشنات مختلفة".

"كريم" شايف إن الطريقة دي في الشغل بتدي حالة من المصداقية، وبيكمل ويقول: "شريف كان بيرتجل كتير في الفيلم وأنا بمسك نفسي من الضحك في وسط المشهد ومش مصدق إنه بيقول كل ده".

شريف الدسوقي بيحكيلنا إنهم اتفاجئوا بعد البروفات إن بعد قراءة المشهد للمرة الأولى أحمد عبدالله بياخد منهم الاسكربت وبيطلب منهم يمثلوا، "ده صعب بس بيخلي الممثل مركز ومش سايب أي حاجة للحظ" بيقولنا "شريف"

المشاهد صامتة

أحمد عبدالله بيشتغل بتكنيك موجود لكنه جديد في مصر، وهو إنه بيعيد كل المشاهد تاني من غير كلام، بيحكيلنا كريم قاسم: "بعد ما بنخلص المشهد، أحمد بيطلب مننا نعيده كله تاني من غير كلام، نفس ردود الأفعال، نفس الانفعالات بس من غير كلام، وده بيخلي المشهد يتحرك من عقلنا ويبقى في جسمنا ومشاعرنا وكل حتة فينا، ميبقاش مجرد كلام بنقوله".

التصوير في شوارع القاهرة

شريف الدسوقي سواق تاكسي، طول الفيلم بيسوق العربية في وسط زحمة شوارع القاهرة، "شريف" بيحكيلنا إنه دي كانت أصعب حاجة في الفيلم إنه يفضل سايق ومركز في الدور، "كريم" بيكمل وبيقولنا إن كل المشاهد اتصورت في الشوارع وده وقعهم في ممواقف كتير، "احنا كنا بنصور في الشارع وبنلف في حارة قدام قهوة وفي المرة التالتة وقفوا قدام العربية ونزلونا وسألونا بتصوروا ايه، لكن كان معانا من الإنتاج 2 بموتوسكيل منهم واحد من المنطقة، دخل وخلص الموضوع".

عرض الفيلم في مهرجان القاهرة السينمائي

شريف الدسوقي كان أول مرة يشوف الفيلم في عرضه الأول مع الجمهور في مهرجان القاهرة السينمائي، "أنا ماكنتش عايز ابقى متوقع رد فعل، وردود الأفعال فرحتني جدًا، الناس خارجة بتقول إنه فيلم مختلف ومميز".

وبيحكي كريم قاسم وهو بيضحك عن عرض الفيلم في مهرجان القاهرة: "الناس كانت داخلة القاعة الكبيرة متخيلة إن الفيلم جد وعميق ومستقل، لكن مع ايفيه في التاني، الناس بدأت تضحك وهي مكسوفة عشان ميحرجوناش، بس بعد شوية بدأوا يضحكوا من قلبهم لحد آخر لحظة والتصقيف في آخر الفيلم".

فيلم مستقل ولا تجاري؟

كريم قاسم بيرفض التصنيف وبيقولنا برد مختصر: "السينما هي السينما"، وبيكمل كلامه: "أنا ممكن أعمل فيلم تجاري بـ20 مليون، واعمل فيلم مهرجانات بـ2 مليون، وعشان كده أنا رافض التصنيف ده"، ليل خارجي قدر يحقق المعادلة ويدمج بين الأفلام اللي بتتنافس في مهرجانات عالمية زي تورنتو والقاهرة السينمائي، ويكون فيلم خفيف كوميدي.

شريف الدسوقي بيقتبس كلام أحمد عبدالله وبيقول: "مافيش مخرج فيلم مستقل، بيقول يلا نمثل تمثيل مستقل، مفيش حاجة اسمها كده"، وعشان كده رأي الأبطال إن بالوقت بيحصل ذوبان للمصطلحات دي.

الفيلم تم تصويره وإنتاجه بالكامل من غير شركة إنتاج كبيرة، معدات التصوير كانت من شركة Canon، والموسيقى والأغاني بأسعار رمزية من نجوم اف ام، وبيحكيلنا كريم قاسم: "احنا صورنا 21 يوم على مدار 8 شهور، أوقات كتير ماكنش بيبقى معانا فلوس فبنوقف تصوير ونرجع نكمل بعد كده، وده كان تحدي بالنسبالنا كممثلين اننا نحافظ على حالة اليوم الواحد واحنا بنصور على فترات متباعدة".

فيلم ليل خارجي موجود في السينمات المصرية، شوفوه واحكولنا عن رأيكم

.Shoot by @MO4Network's #MO4Productions