زي ما في بلاي ليست بتقول اسمعوا يا جماعة الناس دي بيلعبوا مزيكا أو بيغنوا راب حلو، في برضه رابرز أخفقوا -من وجهة نظري- في مزيكتهم أو نقدر نقول إن في كسل فني واضح جدًا في أعمالهم. لو الموسيقي مهما كان النوع اللي بيلعبه، اشتغل على مزيكته بالقدر الكافي وتقبل فكرة النقد الفني، أكيد ده هيغير المشهد الموسيقي في مصر.

الراب المصري من أكتر الأنواع الموسيقية اللي فرضت نفسها بقوة في الكام سنة اللي فاتوا، عشان كده بنقول في الموضوع ده مين هما الرابرز اللي ممكن يكون ليهم تأثير سلبي على مشهد الراب وعلى اللي بيسمعوه، ويكون اللي بيسمع فاكر إن ده راب، بس هو مش راب، أو راب معمول بشكل غلط أو ساذج أو ناقصه إبداع.

1 - شادي شرور - فين الصحاب

شادي سرور يوتيوبر بس واضح إنه بيحب الراب، وطبيعي يكون عنده جمهور كبير من حلقاته على اليوتيوب، فقرر يعمل تراكين راب، الأول كان مع رابر اسمه ويزي كمان استعان بمنتج موسيقي اسمه راكان عشان يعمله المزيكا، عشان كده الأغنية إلي حدًا ما كويسة. بس في المرة التانية قرر يخوض التجربة الفنية لوحده، فعمل أغنية اسمها فين الصحاب وكانت النتيجة سيئة جدا. كلمات أولى ابتدائي وطريقة تناول الموضوع نفسه كان فيها مشكلة.

2 - الشبكشي - بطلة العالم في النكد

الشببكشي هو ملك التريندات، الأغنية عنده مالهاش مستوى ولا كلمات ولا مزيكا و لا أداء، كل تركيزه إنه يعمل حاجة سهلة السمع، فقيرة في المحتوى الكتابي والموسيقي، هو بس بيركز على التريند ويعملها فيديو عشان تنتشر أسرع، غير انه كمان لازم يكتب جنب اسم الاغنية +18 و يحط تاجز من نوعية جنس وسكس.

3 - ام تي ثري - انتحار بالبطئ

في فرق بين الراب السياسي اللي كان بيعمله رابر زي محمد أسامة وراب الأحداث والتريندات السياسية واستعطاف الجمهور، وده اللي عمله رابر اسمه ام تي ثري. ام تى ثري عمل تراكات راب زمان بيعبر فيها عن نظرته للمجتمع، زي تراك "ثقافة شعب" وكان ماشي على الشكل المناسب للراب، لكن بعد ما عمل أغنية اسمها الكابوس، والأغنية ضربت بحكم إنها سياسية، قرر يمشي على نفس الوتيرة (اعمل اللي يجيب فيوز)، في المقابل أهمل أي عنصر تاني زي الكلمات أو حتى المزيكا نفسها.

4 - محمود من فريق إم تي إم

فريق ام تي ام هو أول فريق راب مصري ظهر على قنوات التليفزيون سنة 2003، ده لايشفع للفريق إنه كان فيه رابر مش راكب عليهم، اللي هو محمود طبعاً؛ صوته وأسلوبه خلى ناس كتير تفهم إن دي الطريقة اللي بيتقال بيها الراب، اللي هي طريقة المنولوجات الممزوجة بإلقاء طفولي، رغم إن مؤسس فريق "ام تي ام" هو تاكي وهو واحد من الليعملوا الراب في مصر.

5 - لفتي ام

لفتي أم من الرابرز اللي كان بينتج 10 أغاني في اليوم مثلًا، باعتبار إنه سلق بيض، وكله كم على حساب الكيف، هو بيحاول يعمل أسلوب سريع في الإلقاء لكن النتيجة مؤسفة جدًا.

6 - حسام الحسيني (من فريق اربيان نايتس)

فريق اربيان نايتس من الفرق اللي أثرت وغيرت في الراب المصري، بس أكيد مش كل الفريق، نقدر نقول واحد أو اتنين فيهم زي رابر اسمه E-money على سبيل المثال، على عكس زميله اللي معاه في الفريق حسام الحسيني، اللي كان أضعف رابر جه في الفريق، يعني أي تراك فيه حسام كان لازم يكون فيه خلل فني. تقريبًا وجود حسام في الفريق كان سببه إنه شخصية اجتماعية مهمة، باعتبار إنه ابن فنانين وكده، وليس لأغراض أو مكسب فني.

هو تالت واحد بخش يراب في التراك ده

سؤال لازم تسأله لنفسك قبل ما تتسرع في الرد: هل لولا إنهم أصلاً مشهورين كنت هتسمعهم أو تسمع عنهم؟ هما التلاتة اللي جاين

7 - أحمد الفيشاوي

مافيش خلاف إن الفيشاوي ممثل مبدع، طب هل هو محسوب على مشهد الراب المصري ولا هو بيخش يعمل راب على أساس ترفيهي ومضيعة للوقت؟ أحمد الفيشاوي بيقول في حوار له في التلفزيون إنه بيغني وهو عنده 9 سنين! لما بسمع أغانيه اللي عاملها، بلاقيها مجرد أغاني راب معمولة بمنطق "أنا ممثل وبعمل راب برضه".

صعب الفيشاوي يكون سمع راب وهو صغير، ممكن يكون سمع ويل سميث و تأثر بيه، وطبيعي زيه زي شادي سرور، يستعين بناس من الراب المصري زي فريق "اربيان نايتس" عشان يعمل أغنية راب لكن النتيجة إن الراب بتاعه آخره يكون موجه لجمهور فيشاوي اللي بيحبه، حاجة كده زي لما عمرو دياب يقرر يلعب ماتش كورة ويصور نفسه ويقول إنه أصلا بيلعب كورة من عمر 9 سنوات.

إيه التأثير السلبي للموضوع؟ ده في حد ذاته يضر بالنوع الموسيقى في ان الناس تفهم ان الراب هو ده اللي بيعمله الفيشاوى فتبدا الناس تقول ان الراب هو ده رغم ان الراب نوع موسيقي صعب جداً و متشعب و متفرع جدًا.

8 - زاب ثروت

زاب هو مؤسس مدرسة التنمية البشرية في الراب المصري، وده في حد ذاته يخليه يحتل المرتبة الأولى في التأثير السلبي على الراب والجمهور، بسبب تشويه الراب المصري، زاب ممكن يخلي الناس تفهم لازم الراب يكون فيه هدف ورسالة على حساب المهارات الكتابية والإلقائية، واللي بيزيد الموضوع صعوبة على الودن، هو إن كلماته بدائية جدًا.

9 - مكي - أغلى من الياقوت

مكي هو الرابر اللي هيختلف عليه ناس كتير بسبب حبهم لمكي الممثل ومش حبهم لمكي الرابر وده طبيعي، عشان الناس لما بتسمع أغنية لمكي بتسمع الكبير أو حزلقوم، مش الرابر، الفرق بين مكي أو زاب شعرة، إن مكي نبرة صوته أقرب للرابرز، بس الاتنين مشتركين في إن المزيكا بتاعتهم مش راب ولكن بوب صرف.

10 - الرابر العاشر ده من اختيار الجمهور.

أنا متفهم إن أكيد في حد من القائمة دي ممكن يكون مفضل عندك، بس تأكد من إن الأسباب اللي بنقولها كلها فنية، من نوعية إن مفيش (مهارات كتابية وأسلوب ضعيف في الإلقاء، ده غير إن الإنتاج الموسيقي تقليدي ومافيهوش أي إبداع. أخيرًا، مافيش محاولات مننا لفرض رأي على الناس وخلينا نشوف إيه رأيكم وتعليقاتكم.